ആംവെ മേധാവിയുടെ അറസ്റ്റില് കേന്ദ്രം പ്രതിഷേധമറിയിച്ചു; തിരുവഞ്ചൂര് അന്വേഷണത്തിന് ഉത്തരവിട്ടു
ആംവെ മേധാവിയായ അമേരിക്കന് പൗരന് പിങ്ക്നി സ്കോട്ട് വില്ല്യമിനെ അറസ്റ്റു ചെയ്ത നടപടി ഉത്തരമേഖലാ എ.ഡി.ജി.പി ശങ്കര് റെഡ്ഡി അന്വേഷിക്കും. ആഭ്യന്തരമന്ത്രി തിരുവഞ്ചൂര് രാധാകൃഷ്ണനാണ് അന്വേഷണത്തിന് ഉത്തരവിട്ടത്. പിങ്ക്നിയുടെ അറസ്റ്റിനെതിരെ കേന്ദ്രം രംഗത്തെത്തിയ പശ്ചാത്തലത്തിലാണ് നടപടി.
ആംവേ ഇന്ത്യാ മേധാവിയെ കേരള പോലീസ് അറസ്റ്റ് ചെയ്തത് ശരിയായില്ലെന്ന് കേന്ദ്ര കോര്പ്പറേറ്റ് അഫയേഴ്സ് മന്ത്രി സച്ചിന് പൈലറ്റ് ഇന്നലെ പറഞ്ഞിരുന്നു. കേരളത്തില് വെച്ച് ഇങ്ങനെയൊരു സംഭവം ഉണ്ടായതില് നിരാശയുണ്ടെന്നും അദ്ദേഹം പറഞ്ഞു. ഇത്തരം നടപടികള് രാജ്യത്തെ നിക്ഷേപക അന്തരീക്ഷത്തെ ബാധിക്കുമെന്നും തിരിമറികള് നടത്തുന്ന കമ്പനികള്ക്കെതിരേ ശക്തമായ നടപടി സ്വീകരിക്കുമ്പോഴും നിയമം പാലിച്ച് പ്രവര്ത്തിക്കുന്ന കമ്പനികളെ പ്രവര്ത്തിക്കാന് അനുവദിക്കണമെന്നും സച്ചിന് പൈലറ്റ് ആവശ്യപ്പെട്ടു.
സാമ്പത്തിക ക്രമക്കേട് നടത്തിയെന്ന കുറ്റത്തിന് ആംവെയുടെ ചെയര്മാനും ഇന്ത്യന് ഘടകം സിഇഒയുമായ അമേരിക്കന് പൗരന് പിങ്ക്നി സ്കോട്ട് വില്യം, ആംവെ ഡയറക്ടര്മാരായ അംശു ബുദ്രജ, സഞ്ജയ് മല്ഹോത്ര എന്നിവരെ ക്രൈംബ്രാഞ്ച് തിങ്കളാഴ്ച്ചയാണ് അറസ്റ്റ് ചെയ്തത്. ആംവെ കമ്പനി 1000 കോടിയുടെ സാമ്പത്തിക ക്രമക്കേട് നടത്തിയതായി ക്രൈംബ്രാഞ്ചിന്റെ സാമ്പത്തിക വിഭാഗം കണ്ടെത്തിയിരുന്നു. 2012 ഒക്ടോബര് 29ന് കുന്ദമംഗലം സ്വദേശിനി വിശാലാക്ഷി നല്കിയ പരാതിയെ തുടര്ന്നാണ് ക്രൈംബ്രാഞ്ചിന്റെ അറസ്റ്റ്.
https://www.facebook.com/Malayalivartha