ആധാറെടുത്ത ബി.പി.എല്. കുടുംബനാഥന് സഹായധനമായി 150 രൂപ
ആധാര് കാര്ഡ് ലഭിച്ച ബി.പി.എല്. കുടുംബങ്ങള്ക്ക് 150 രൂപ സഹായധനം നല്കുന്നു. രണ്ടരവര്ഷം മുമ്പ് എല്ലാവര്ക്കും ആധാര് നിര്ബന്ധമാക്കുന്നതിന്റെ ഭാഗമായി കേന്ദ്രസര്ക്കാര് പ്രഖ്യാപിച്ചതാണിത്. നടപടിക്രമങ്ങള് പൂര്ത്തിയാക്കി ഇപ്പോഴാണ് ഇത് സംസ്ഥാനത്ത് വിതരണം ചെയ്യുന്നത്. മാര്ച്ച് 10 മുതല് പഞ്ചായത്തുകളിലൂടെയും നഗരസഭകളിലൂടെയും തുക നേരിട്ട് വിതരണം ചെയ്യുമെന്ന് കളക്ടര് പി.ബാലകിരണ് പറഞ്ഞു.
ആധാര് കാര്ഡ്, ബാങ്ക് അക്കൗണ്ട് നമ്പര്, ബി.പി.എല്. റേഷന് കാര്ഡ് എന്നിവ ഹാജരാക്കിയാല് ഗൃഹനാഥന് പഞ്ചായത്ത് നഗരസഭകളില്നിന്ന് 150 രൂപ നേരിട്ട് നല്കും. 73 ലക്ഷം രൂപ ഇതിനായി ജില്ലയ്ക്ക് ലഭിച്ചിട്ടുണ്ട്. 5.25 ലക്ഷം ബി.പി.എല്. കാര്ഡുടമകളാണ് ജില്ലയിലുള്ളത്. ഇതില് 40 ശതമാനം പേര്ക്ക് വിതരണം ചെയ്യാനുള്ള തുക മാത്രമാണ് അനുവദിച്ചിട്ടുള്ളത്. ആദ്യമെത്തുന്നവര്ക്കായിരിക്കും വിതരണം ചെയ്യുക. ബാക്കിയുള്ളവര്ക്ക് രണ്ടാംഘട്ടത്തില് പണം നല്കും. സംസ്ഥാനത്ത് 9 കോടി രൂപയാണ് ആദ്യഘട്ടവിതരണത്തിന് അനുവദിച്ചിട്ടുളളത്.
ഒരു കുടുംബത്തിലെ എല്ലാവരും ആധാര് കാര്ഡെടുത്താല് അവര്ക്ക് 150 രൂപവീതം നല്കാനായിരുന്നു കേന്ദ്രസര്ക്കാരിന്റെ പദ്ധതി. സംസ്ഥാന ഐ.ടി.മിഷനായിരുന്നു പരിശോധന ചുമതല. എന്നാല്, എല്ലാവരുടെയും ആധാര് പരിശോധിച്ച് തുക നല്കുന്നത് പ്രായോഗികമല്ലെന്ന് ഐ.ടി.മിഷന് ഉദ്യോഗസ്ഥര് സര്ക്കാരിനെ അറിയിച്ചു.
കുടുംബനാഥന്റെ ബാങ്ക് അക്കൗണ്ടിലൂടെ നല്കാനുള്ള ആലോചന നടന്നെങ്കിലും അത് ഫലപ്രദമായില്ല. ഇതാണ് പണം നല്കുന്നത് വൈകാന് കാരണം. സാമ്പത്തികമായി പിന്നോക്കം നില്ക്കുന്നവര് തൊഴില് നഷ്ടപ്പെടുത്തി ആധാര് കാര്ഡ് എടുക്കാന് പോകില്ലെന്ന വിലയിരുത്തലിന്റെ അടിസ്ഥാനത്തിലാണ് കേന്ദ്രസര്ക്കാര് ഈ പദ്ധതി തുടങ്ങിയത്. ഒരുദിവസത്തെ വേതനത്തിനുള്ള ചെറിയ പരിഹാരമെന്ന നിലയിലാണ് തുക നല്കാന് നിശ്ചയിച്ചത്.
സര്ക്കാരിന്റെ കണക്കനുസരിച്ച് സംസ്ഥാനത്ത് മുതിര്ന്നവരില് 95 ശതമാനം പേരും ആധാര് എടുത്തിട്ടുണ്ടെന്നാണ് കണക്കാക്കപ്പെട്ടിരിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha