ദം ബിരിയാണിയുമില്ല, ചൈനീസ് സ്പെഷ്യലുമില്ല, ജയിലില് നിസാമിന് ദോശയും ചമ്മന്തിയും
ചന്ദ്രബോസ് വധക്കേസിലെ പ്രതി നിസാമിന് വിയ്യൂര് ജയിലില് ജയില് ഉദ്യോഗസ്ഥരുടെ ഒത്താശയോടെ ലഭിച്ചിരുന്ന വിവിഐപി പരിഗണനകള് ഡിജിപി സെന്കുമാര് ഇടപെട്ട് നിര്ത്തിച്ചു. ഇതോടെ നിസാം ജയിലിലെ ഭക്ഷണം കഴിക്കാന് നിര്ബന്ധിതനായിരിക്കുകയാണെന്നാണ് റിപ്പോര്ട്ട്. ജയില് ഡിജിപി ടിപി സെന്കുമാറിന്റെ കര്ശന ഇടപെടലുകളാണ് ഇതിന് കാരണം. നിസാമിന് ഇഷ്ട ഭക്ഷണം എത്തിക്കുന്നവര്ക്കെതിരെ കര്ശന നടപടിയുണ്ടാകുമെന്ന് ഡിജിപി വ്യക്തമാക്കിയിട്ടുണ്ട്.
ബംഗളുരുവില് നിന്ന് ശനിയാഴ്ച പുലര്ച്ചെ രണ്ടരയോടെയാണ് ഇവിടെ വിയ്യൂര് സെന്ട്രല് ജയിലില് നിസാമിനെ എത്തിച്ചത്. അന്ന് ഒന്നും കഴിച്ചില്ല. ആരോടും സംസാരിച്ചതുമില്ല. ഇന്നലെ രാവിലെ പ്രഭാതഭക്ഷണത്തിന് ദോശയും ചമ്മന്തിയും ആയിരുന്നു. വേറൊന്നും കിട്ടില്ലെന്ന് ഉറപ്പായതോടെ അല്പം കഴിച്ചു. ഊണിന് പച്ചക്കറി വിഭവങ്ങളായിരുന്നു. ശീലിച്ചുപോയ ചൈനീസ് വിഭവങ്ങളോ ഇഷ്ട റസ്റ്റോറന്റിലെ ഭക്ഷണമോ ആവശ്യപ്പെട്ടാല് കിട്ടില്ലെന്ന് നിസാമിന് മനസിലായി. ആദ്യം നിരസിച്ചെങ്കിലും പിന്നീട് ഭക്ഷണം കഴിക്കാന് തയ്യാറാവുകയായിരുന്നു.
നിസാമിന് ജയിലിനകത്ത് പ്രത്യേക സൗകര്യങ്ങള് ഒന്നും അനുവദിക്കരുതെന്ന് ഡി.ജി.പി ടി.പി. സെന്കുമാര് കര്ശനനിര്ദ്ദേശം നല്കിയെന്നാണ് സൂചന. നിസാം ജയിലിനകത്ത് ആരുമായും ബന്ധപ്പെടാതിരിക്കാനും ജയിലധികൃതര് ശ്രദ്ധിക്കുന്നുണ്ട്. ജയിലിനകത്ത് ശാന്തനാണെങ്കിലും കൂടുതല് പ്രശ്നങ്ങള് ഉണ്ടാക്കാതിരിക്കാനും ആരോപണങ്ങള് ഉണ്ടാകാതിരിക്കാനും ജയില് സൂപ്രണ്ടിന്റെ നേതൃത്വത്തില് പ്രത്യേകസംഘത്തെ ചുമതലപ്പെടുത്തിയിട്ടുണ്ട്.
വിയ്യൂര് സെന്ട്രല് ജയിലിലെ നിരീക്ഷണകാമറകള് ഭൂരിഭാഗവും പ്രവര്ത്തനസജ്ജമായി. മൊത്തം 67 കാമറകളുള്ളതില് 57 കാമറകളും പ്രവര്ത്തനക്ഷമമാക്കി കഴിഞ്ഞു. ജയിലില് എല്ലായിടത്തും കാമറകള് സ്ഥാപിച്ചിട്ടുണ്ടെങ്കിലും ഭൂരിഭാഗം കാമറകളും അറ്റകുറ്റപ്പണികള് നടത്താത്തതിനാല് കേടായിരുന്നു. സെല്ലിനകത്ത് കാമറകള് ഇല്ല; സെല്ലിന്റെ പ്രവേശനകവാടത്തിലാണ് കാമറ സ്ഥാപിച്ചിരിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha