മറ്റൊരാളെ സ്ഥാനാര്ത്ഥിയാക്കിയാല് തോല്ക്കും; അരുവിക്കര മണ്ഡലത്തില് കാര്ത്തികേയന്റെ പത്നി ഡോ സുലേഖയെ സ്ഥാനാര്ത്ഥിയാക്കാന് കോണ്ഗ്രസ് നീക്കം
സ്പീക്കര് ജി. കാര്ത്തികേയന്റെ നിര്യാണത്തെത്തുടര്ന്ന് ഉപതിരഞ്ഞെടുപ്പ് വരുന്ന അരുവിക്കര മണ്ഡലത്തില് അദ്ദേഹത്തിന്റെ പത്നി ഡോ. എം.ടി. സുലേഖയെ സ്ഥാനാര്ത്ഥിയാക്കാന് നീക്കം. മറ്റൊരാളെ സ്ഥാനാര്ത്ഥിയാക്കിയാല് വിജയ സാധ്യത കുറവെന്നാണ് നേതൃത്വത്തിന്റെ കണക്കുകൂട്ടല്. സഹതാപ തരംഗത്തിലൂടെ സീറ്റ് നിലനിറുത്താനാണ് കോണ്ഗ്രസ് നീക്കം.
ഇക്കാര്യത്തില് അനൗപചാരിക കൂടിയാലോചനകളാണ് ഇപ്പോള് നടക്കുന്നത്. മറ്റേതെങ്കിലും കോണ്ഗ്രസ് നേതാക്കളെ സ്ഥാനാര്ത്ഥിയാക്കിയാല് ഗ്രൂപ്പ് സമവാക്യം അടക്കം നോക്കേണ്ടിവരും. അത് തര്ക്കങ്ങള്ക്ക് ഇടയാക്കും. സീറ്റ് നഷ്ടപ്പെടുന്ന തരത്തിലേക്ക് അത് കാര്യങ്ങളെ എത്തിച്ചാല് കോണ്ഗ്രസിന് അത് വലിയ തിരിച്ചടിയാകും. അടുത്തകൊല്ലം നിയമസഭാ തിരഞ്ഞെടുപ്പ് നടക്കുന്നതിനാല് അതിനുതൊട്ടുമുമ്പ് നടക്കുന്ന ഉപതിരഞ്ഞെടുപ്പില് വിജയിക്കേണ്ടത് അനിവാര്യവുമാണ്. ഈ സര്ക്കാര് അധികാരത്തിലെത്തിയശേഷം നടന്ന രണ്ടു ഉപതിരഞ്ഞെടുപ്പുകളിലും യു.ഡി.എഫിന് വിജയിക്കാനായി. പിറവം, നെയ്യാറ്റിന്കര ഉപതിരഞ്ഞെടുപ്പുകളാണിത്.
എന്നാല്, അതില്നിന്നൊക്കെ വ്യത്യസ്തമായി ഇപ്പോള് സര്ക്കാര് കനത്ത വെല്ലുവിളി നേരിടുന്ന സമയമാണ്. വിവാദങ്ങള് ഒന്നൊഴിയാതെ പിടികൂടിയിരിക്കുന്നു. പ്രതിപക്ഷം നിരന്തര പ്രക്ഷോഭത്തിലുമാണ്. അതിനാല്, ഈ ഉപതിരഞ്ഞെടുപ്പില് പരാജയപ്പെട്ടാല് അത് പ്രതിപക്ഷ ആക്ഷേപങ്ങളെ ശരിവയ്ക്കും തരത്തിലാകും. അതിനാല്, വിജയിക്കാന് കഴിയുന്ന സ്ഥാനാര്ത്ഥിയെ തന്നെയാകും അരുവിക്കരയില് കോണ്ഗ്രസ് കണ്ടെത്തുക.
കാര്ത്തികേയന് മണ്ഡലത്തിലെ ജനങ്ങളുമായി നല്ല അടുപ്പമായിരുന്നു. മണ്ഡലവുമായി എപ്പോഴും വൈകാരികമായ ബന്ധം അദ്ദേഹം കാത്തുസൂക്ഷിക്കുകയും ചെയ്തിരുന്നു. അതുകൊണ്ടുതന്നെയാണ് കാര്ത്തികേയന്റെ പിന്മാഗിമായി അദ്ദേഹത്തിന്റെ പത്നിയെ മത്സരിപ്പിക്കണമെന്ന ആവശ്യം കോണ്ഗ്രസ് നേതാക്കളില് നിന്നുണ്ടാകുന്നത്. പാര്ട്ടിയിലെ ഉന്നത നേതാക്കളെല്ലാം ഇതിന് അനുകൂലമാണ്. സുലേഖ എന്ന ഒറ്റപേര് മാത്രമാണ് ഇപ്പോള് ഉയര്ന്നിരിക്കുന്നത്. അനൗപചാരിക ചര്ച്ചകള് മാത്രമാണ് നടക്കുന്നതെങ്കിലും മറ്റു പേരുകളൊന്നും സ്ഥാനാര്ത്ഥിയായി ഇപ്പോള് ചര്ച്ച ചെയ്യപ്പെടുന്നില്ല. സര്വവിജ്ഞാനകോശം ഡയറക്ടറാണ് ഡോ. എം.ടി. സുലേഖ.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha