സഹതാപ തരംഗം മുതലാക്കാന് യുഡിഎഫ്, അരുവിക്കരയില് ഉപതെരഞ്ഞെടുപ്പ് ഉടന്; ആന്റണി മുഖ്യ പ്രചാരകന്
വൈകാതെതന്നെ, അന്തരിച്ച സ്പീക്കര് ജി കാര്ത്തികേയന്റെ മണ്ഡലമായ അരുവിക്കരയില് ഉപതിരഞ്ഞെടുപ്പിന് സാധ്യത. അരുവിക്കരയിലേക്ക് ജൂലൈയില് തെരഞ്ഞെടുപ്പ് ഉണ്ടായേക്കുമെന്നാണ് സൂചന. എന്നാല് എത്രയും വേഗം വോട്ടെടുപ്പ് വരട്ടേ എന്ന നിലപാടിലാണ് സംസ്ഥാന സര്ക്കാരും യുഡിഎഫും.കാര്ത്തികേയന്റെ ഭാര്യയായ സുലേഖയെ സ്ഥാനാര്ത്ഥിയാക്കാനാണ് കോണ്ഗ്രസിലെ പ്രമുഖര്ക്ക് താല്പ്പര്യം. വേഗത്തില് തെരഞ്ഞെടുപ്പ് നടത്തിയാല് സഹതാപതരംഗം ഗുണകരമാകുമെന്നാണ് വിലയിരുത്തല്.
ജൂണില്തന്നെ തെരഞ്ഞെടുപ്പ് നടത്താമെന്നു സര്ക്കാര് തെരഞ്ഞെടുപ്പ് കമ്മീഷനെ അറിയിക്കണമെന്ന് ഇന്നലത്തെ യുഡിഎഫ് യോഗത്തില് നിര്ദേശമുയര്ന്നു. എന്നാല് സ്ഥാനാര്ത്ഥി നിര്ണയത്തില് അവസാനതീരുമാനം കൈക്കൊണ്ടശേഷം ഇക്കാര്യം അറിയിച്ചാല് മതിയെന്നാണ് നേതൃത്വത്തിന്റെ തീരുമാനം. തെരഞ്ഞെടുപ്പ് പ്രചരണത്തിനു എ.കെ ആന്റണിയെ ചുമതലപ്പെടുത്തണമെന്നും ആവശ്യമുയര്ന്നതായും സൂചനയുണ്ട്.
മുഖ്യമന്ത്രി ഉമ്മന് ചാണ്ടി ഉള്പ്പെടെ രാഷ്ട്രീയമായി പ്രതിരോധത്തിലായിരിക്കുന്ന സാഹചര്യത്തില് മന്ത്രിസഭയ്ക്കു പുറത്തു നിന്നൊരാളെ തെരഞ്ഞെടുപ്പുചുമതല ഏല്പ്പിക്കണമെന്നാണ് പ്രധാനമായും ഉയര്ന്ന ആവശ്യം. യുഡിഎഫ് സ്ഥാനാര്ത്ഥി ആരായാലും സഹതാപതരംഗത്തില് വിജയിക്കുമെന്ന് ഉറപ്പിക്കാനാകില്ലെന്നും രണ്ടുതവണ കുറഞ്ഞ ഭൂരിപക്ഷത്തിലെങ്കിലും വിജയിക്കാനായത് കാര്ത്തികേയനായതുകൊണ്ടു മാത്രമാണെന്നും അഭിപ്രായമുയര്ന്നു. സംശുദ്ധരാഷ്ട്രീയത്തിന്റെ പ്രതീകമായി വിശേഷിപ്പിക്കപ്പെടുന്ന എ.കെ. ആന്റണിയുടെ സാന്നിധ്യം ഗുണംചെയ്യുമെന്നാണ് കൂടുതല്പേരും പറഞ്ഞത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha