പരിശോധനയ്‌ക്കെത്തിയ ഡിഡി ഓഫീസിലെ ഉദ്യോഗസ്ഥരുടെ ഭീഷണിയില്‍ പരിഭ്രാന്തയായ പ്രഥമാദ്ധ്യാപിക മസ്തിഷ്‌കാഘാതത്തെ തുടര്‍ന്ന് മരിച്ചു. കുഞ്ചിത്തണ്ണി ഗവ. ഹൈസ്‌കൂള്‍ പ്രധാന അദ്ധ്യാപിക കണ്ണൂര്‍ മയ്യില്‍ മുല്ലക്കൊടി ഇ പി ഹൗസില്‍ ഇ പി പുഷ്പലത(52)യാണ് കോലഞ്ചേരി മെഡിക്കല്‍ കോളജില്‍ മരിച്ചത്.
തൊടുപുഴ വിദ്യാഭ്യാസ ഡപ്യൂട്ടി ഡയറക്ടറുടെ ഓഫിസിലെ ഉദ്യോഗസ്ഥര്‍ കഴിഞ്ഞ വെള്ളിയാഴ്ച സ്‌കൂളില്‍ പരിശോധനയ്‌ക്കെത്തിയിരുന്നു. സംഘത്തിലുണ്ടായിരുന്ന അഡ്മിനിസ്‌ട്രേറ്റീവ് അസിസ്റ്റന്റിന്റെ മാനസിക പീഡനവും ഭീഷണിയുമാണ് മസ്തിഷ്‌കാഘാതത്തിനു കാരണമെന്നാണ് ബന്ധുക്കള്‍ പറയുന്നത്.
സ്‌കൂളിലെ ക്ലാര്‍ക്കിന് അനധികൃതമായി അവധി അനുവദിച്ചതിന്റെ പേരില്‍ ഹെഡ്മിസ്ട്രസിനോട് സംഘം വിശദീകരണം ചോദിച്ചിരുന്നു.
ക്ലാര്‍ക്കിനെ സസ്‌പെന്‍ഡു ചെയ്യുമെന്നും പുഷ്പലതയ്‌ക്കെതിരെ നടപടിയെടുക്കുമെന്നും ഭീഷണിപ്പെടുത്തിയതായി മാതാവ് ലക്ഷ്മി പറഞ്ഞു. നേരിട്ടും ഫോണിലും ഭീഷണിയുണ്ടായെന്നും ഇതേ തുടര്‍ന്നു മാനസികമായി തകര്‍ന്നാണ് പുഷ്പലതയ്ക്ക് മസ്തിഷ്‌കാഘാതമുണ്ടായതെന്നും ലക്ഷ്മി പറഞ്ഞു.
അഡ്മിനിസ്‌ട്രേറ്റീവ് അസിസ്റ്റന്റിനെതിരെ മുഖ്യമന്ത്രി, വിദ്യാഭ്യാസ മന്ത്രി, പൊതുവിദ്യാഭ്യാസ ഡയറക്ടര്‍ എന്നിവര്‍ക്കു പുഷ്പലതയുടെ അമ്മ പരാതി നല്‍കി. 2014 ജൂലൈയിലാണ് കുഞ്ചിത്തണ്ണി സ്‌കൂളില്‍ പുഷ്പലത സ്ഥലം മാറിയെത്തിയത്. കാഞ്ഞങ്ങാട് മുന്‍ ഡിഇഒ മോഹനന്റെ ഭാര്യയാണ്.
വിദ്യാഭ്യാസ ഡപ്യൂട്ടി ഡയറക്ടര്‍ ഓഫിസിലെ അഡ്മിനിസ്‌ട്രേറ്റീവ് അസിസ്റ്റന്റ് കെ എന്‍ ശശിധരനും സീനിയര്‍ സൂപ്രണ്ട് ഇസ്മായിലുമാണ് കുഞ്ചിത്തണ്ണി ഗവ. ഹൈസ്‌കൂളില്‍ പരിശോധനയ്‌ക്കെത്തിയത്. ക്ലാര്‍ക്ക് അനഘയ്ക്ക് ഹെഡ്മിസ്ട്രസ് പുഷ്പലത അനധികൃതമായി അവധി അനുവദിച്ചെന്ന പരാതിയില്‍ തെളിവെടുപ്പിനാണ് ഇവര്‍ എത്തിയത്. ക്ലാര്‍ക്കിനെ വഴിവിട്ടു സഹായിച്ചതിനെക്കുറിച്ചു വിശദീകരണം ആവശ്യപ്പെടുക മാത്രമാണ് ചെയ്തതെന്നും ഭീഷണിപ്പെടുത്തിയെന്ന ആരോപണം ശരിയല്ലെന്നും കെ എന്‍ ശശിധരന്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha