പെണ്‍കുട്ടിയെ ലൈംഗികമായി ഉപദ്രവിച്ചശേഷം മൊബൈല്‍ ഫോണില്‍ ചിത്രങ്ങള്‍ റെക്കോര്‍ഡ് ചെയ്ത് ഇന്റര്‍നെറ്റില്‍ പ്രചരിപ്പിക്കുമെന്ന് ഭീഷണിപ്പെടുത്തിയ യുവാവ് പിടിയില്‍. കൊല്ലം ഈസ്റ്റ് ഉപാസനനഗര്‍ സ്വദേശിയും ഇപ്പോള്‍ കേരളപുരത്ത് താമസിക്കുന്ന മുഹമ്മദ് ശ്യാമാ(31)ണ് അറസ്റ്റിലായത്.
ബന്ധുവായ പെണ്‍കുട്ടിയുടെ വീട്ടില്‍ ഇയാള്‍ നിത്യസന്ദര്‍ശകനായിരുന്നു. അതുവഴി പെണ്‍കുട്ടിയുമായി അടുപ്പം സ്ഥാപിക്കുകയും പെണ്‍കുട്ടിയുടെ വീട്ടില്‍ ആരുമില്ലാതിരുന്ന സമയത്ത് ഇയാള്‍ ലൈംഗികമായി ഉപദ്രവിക്കുകയായിരുന്നു. തുടര്‍ന്ന് പ്രതി ചിത്രങ്ങള്‍ മൊബൈല്‍ ഫോണില്‍ റെക്കോര്‍ഡ് ചെയ്ത് സൂക്ഷിക്കുകയും ചെയ്തു.
വിവരം പുറത്തു പറഞ്ഞാല്‍ ചിത്രങ്ങള്‍ ഇന്റര്‍നെറ്റില്‍ പ്രചരിപ്പിക്കുമെന്നും ഇയാള്‍ പെണ്‍കുട്ടിയെ ഭീഷണപ്പെടുത്തി. ഭയംമൂലം പെണ്‍കുട്ടി വിവരം മറ്റാരോടും പറഞ്ഞില്ല. രണ്ടുമാസം മുമ്പ് പ്രതി പെണ്‍കുട്ടിയുടെ ബന്ധുവിന്റെ വീട്ടിലെത്തി ചിത്രീകരിച്ച രംഗങ്ങള്‍ കാണിച്ചശേഷം രണ്ടരലക്ഷം രൂപ പെണ്‍കുട്ടിയുടെ വീട്ടുകാര്‍ നല്‍കണമെന്നും അല്ലാത്തപക്ഷം ചിത്രങ്ങള്‍ ഇന്റര്‍നെറ്റില്‍ പ്രചരിപ്പിക്കുമെന്നും ഭീഷണിപ്പെടുത്തുകയായിരുന്നു. ബന്ധു ഈ വിവരം പെണ്‍കുട്ടിയുടെ പിതാവിനെ അറിയിച്ചു. തുടര്‍ന്ന് പെണ്‍കുട്ടിയുടെ പിതാവ് പ്രതിയുമായി ബന്ധപ്പെട്ടു. ഒന്നുകില്‍ രണ്ടരലക്ഷം രൂപയോ അല്ലെങ്കില്‍ വസ്തുവോ എഴുതി കൊടുക്കണമെന്നും അല്ലെങ്കില്‍ ചിത്രങ്ങള്‍ ഇന്റര്‍നെറ്റ് വഴി പ്രചരിപ്പിക്കുമെന്നുള്ള ഭീഷണി പ്രതി ആവര്‍ത്തിച്ചു. തുടര്‍ന്ന് പെണ്‍കുട്ടിയുടെ പിതാവ് പോലീസില്‍ പരാതി നല്‍കി.
പോലീസിന്റെ നിര്‍ദേശാനുസരണം, പെണ്‍കുട്ടിയുടെ വീട്ടുകാര്‍ പണം നല്‍കാമെന്നും മൊബൈല്‍ ഫോണുമായി പ്രതിയോട് വരാന്‍ പറയുകയും ചെയ്തു. വീട് പോലീസിന്റെ നിരീക്ഷണത്തിലായിരിക്കെ പ്രതി മൊബൈല്‍ ഫോണുമായി പെണ്‍കുട്ടിയുടെ വീട്ടില്‍ എത്തുകയായിരുന്നു. തുടര്‍ന്ന് സമീപമുണ്ടായിരുന്ന പോലീസ് പ്രതിയെ വളഞ്ഞു പിടികൂടുകയായിരുന്നു. ഇയാളില്‍ നിന്നും മൊബൈല്‍ ഫോണ്‍ പോലീസ് കണ്ടെടുത്തു. തുടര്‍ന്ന് ഇയാളുടെ വീട്ടില്‍ നടത്തിയ പരിശോധനയില്‍ ലാപ്‌ടോപ്പുകളും കണ്ടെടുത്തു. ഇവ പരിശോധനയ്ക്കായി ഫോറന്‍സിക് ലാബില്‍ അയയ്ക്കുമെന്ന് പോലീസ് അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha