അഡ്ജസ്റ്റ്‌മെന്റ് സമരങ്ങള്‍ക്ക് കൂട്ടുനില്‍ക്കില്ലെന്ന വ്യക്തമായ സൂചന നല്‍കിക്കൊണ്ട് ഗവര്‍ണര്‍ പി. സദാശിവം. നിയമസഭയില്‍ അക്രമം കാട്ടിയ എംഎല്‍എമാര്‍ക്കെതിരെ ഒരു നടപടിയും ഇതുവരെ എടുത്തിരുന്നില്ല. ഇക്കാര്യം മലയാളി വാര്‍ത്ത നേരത്തേതന്നെ ചൂണ്ടിക്കാട്ടിയിരുന്നു.

ബജറ്റ് ദിവസം നിയമസഭയില്‍ പ്രശ്‌നങ്ങളുണ്ടാക്കിയ എംഎല്‍എമാര്‍ക്കെതിരെ നടപടി വേണമെന്ന് സദാശിവം പറഞ്ഞു. സംഭവിക്കാന്‍ പാടില്ലാത്ത കാര്യങ്ങളാണ് കഴിഞ്ഞ ദിവസം നിയമസഭയില്‍ ഉണ്ടായത്. ഇക്കാര്യങ്ങള്‍ കാണിച്ച് രാഷ്ട്രപതിക്ക് റിപ്പോര്‍ട്ട് നല്‍കുമെന്നും ഗവര്‍ണര്‍ വാര്‍ത്ത കുറിപ്പില്‍ അറിയിച്ചു. ഭരണസ്തംഭനം ഉണ്ടാകുമ്പോള്‍ റിപ്പോര്‍ട്ട് നല്‍കുന്ന ഭരണഘടനയുടെ 356ആം വകുപ്പുപ്രകാരം പോലും റിപ്പോര്‍ട്ട് നല്‍കാവുന്ന സംഭവങ്ങളാണിത്. 
അതേസമയം, ബജറ്റിന്റെ കാര്യത്തില്‍ ഇടപെടില്ലെന്നും ബജറ്റിന് അനുമതി നല്‍കിയതായി സ്പീക്കര്‍ അറിയിച്ചിട്ടുണ്ടെന്നും ഗവര്‍ണര്‍ വാര്‍ത്താക്കുറിപ്പില്‍ വ്യക്തമാക്കി. മാര്‍ച്ച് 31ന് മുന്‍പ് ധനാഭ്യര്‍ഥനകള്‍ പാസാക്കണമെന്നും ഗുരുതര പ്രതിസന്ധി സൃഷ്ടിക്കരുതെന്നും ഗവര്‍ണര്‍ ആവശ്യപ്പെട്ടു. നിയമസഭയിലുണ്ടായ പ്രശ്‌നങ്ങള്‍ സംബന്ധിച്ച് പ്രതിപക്ഷവും മുഖ്യമന്ത്രിയും നേരിട്ട് ഗവര്‍ണറെ കണ്ടതിനു പിന്നാലെയാണ് ഗവര്‍ണറുടെ വാര്‍ത്തക്കുറിപ്പ് പുറത്തിറങ്ങിയത്.
ഇന്നലെ നടന്ന കാര്യങ്ങളുമായി ബന്ധപ്പെട്ട് സ്പീക്കര്‍ ഗവര്‍ണര്‍ക്ക് കത്ത് നല്‍കിയിരുന്നു. നിയമസഭാ സെക്രട്ടറിയും റിപ്പോര്‍ട്ട് സമര്‍പ്പിച്ചു. തന്റെ അനുമതിയോടെയാണ് ബജറ്റ് അവതരിപ്പിച്ചതെന്ന സ്പീക്കറുടെ വിശദീകരണം ഗവര്‍ണര്‍ അംഗീകരിച്ചു, നിയമസഭയിലെ വിഡിയോ ദൃശ്യങ്ങളും മാധ്യമവാര്‍ത്തകളും ഗവര്‍ണര്‍ പരിശോധിക്കും. ഇതിനു ശേഷമാണ് രാഷ്ട്രപതിക്ക് റിപ്പോര്‍ട്ട് സമര്‍പ്പിക്കുക. 
ഇന്നലെ ധനമന്ത്രി കെ.എം. മാണി ബജറ്റ് അവതരിച്ചത് ചട്ടപ്രകാരം തന്നെയെന്ന് മുഖ്യമന്ത്രി ഉമ്മന്‍ചാണ്ടി ഗവര്‍ണറെ അറിയിച്ചിരുന്നു. ബജറ്റിന് സാധുതയില്ല എന്ന് പ്രതിപക്ഷം ഇന്നലെ ഗവര്‍ണറോട് പരാതിപ്പെട്ടിരുന്നു. ഇതേത്തുടര്‍ന്നാണ് മുഖ്യമന്ത്രി നേരിട്ടെത്തി ഗവര്‍ണര്‍ക്കു വിശദീകരണം നല്‍കിയത്. 
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha