തന്നെ അപമാനിച്ചത് മുഖ്യമന്ത്രി നോക്കിയിരിക്കെയെന്ന് ജമീല പ്രകാശം, അപമാനിച്ചവര്‍ക്ക് ശിക്ഷകിട്ടാന്‍ ഏതറ്റംവരെയും പോകും
ബഡ്ജറ്റ് അവതരിപ്പിച്ച ദിവസം കെ.ശിവദാസന്‍ നായര്‍ എം.എല്‍.എ തന്നെ അപമാനിച്ചത് മുഖ്യമന്ത്രി ഉമ്മന്‍ചാണ്ടി നോക്കിയിരിക്കെയാണെന്ന് പ്രതിപക്ഷ എം.എല്‍.എ ജമീല പ്രകാശം ആരോപിച്ചു. ശിവദാസന്‍ നായര്‍. ബെന്നി ബഹനാന്‍, ഡൊമിനിക് പ്രസന്റേഷന്‍ എന്നിവരാണ് തന്നെ ആക്രമിച്ചത്. ശിവദാസന്‍ നായരോട് തന്റെ ശരീരത്തില്‍ നിന്ന് കൈയെടുക്കാന്‍ ആവശ്യപ്പെട്ടിരുന്നു. എന്നാല്‍ അദ്ദേഹം അതിന് തയ്യാറാവാതെ വന്നതോടെയാണ് ശിവദാസന്‍ നായരെ കടിക്കേണ്ടി വന്നത്. ഡൊമിനിക് ജാതി പറഞ്ഞ് തന്നെ അധിക്ഷേപിക്കുകയായിരുന്നു. ഇത് കണ്ടാണ് എല്‍.ഡി.എഫ് എം,എല്‍.എമാര്‍ രോഷാകുലരായതെന്നും ജമീല നിയമസഭയിലെ ദൃശ്യങ്ങള്‍ മാദ്ധ്യമ പ്രവര്‍ത്തകര്‍ക്ക് മുന്നില്‍ നിരത്തി വിശദീകരിച്ചു.
പ്രതിപക്ഷ നേതാവ് വി എസ് അച്യുതാനന്ദന്റെ സാന്നിധ്യത്തില്‍ നടത്തിയ വാര്‍ത്ത സമ്മേളനത്തില്‍ ചിത്രങ്ങളുടെ സഹായത്തോടെ മുഖ്യമന്ത്രി ഉമ്മന്‍ ചാണ്ടിയുടേയും ശിവദാസന്‍ നായര്‍ അടക്കമുള്ള കോണ്‍ഗ്രസ് നേതാക്കളുടേയും നിലപാടുകളെ ജമീലാ പ്രകാശം തള്ളിക്കളഞ്ഞു. ബോധപൂര്‍വ്വമുള്ള സ്ത്രീപീഡനം നിയമസഭയില്‍ ശിവദാസന്‍ നായര്‍ നടത്തിയെന്ന് ജമീലാ പ്രകാശം വിശദീകരിച്ചു.
സ്ത്രീ പീഡനക്കുറ്റം ചുമത്തേണ്ട കുറ്റമാണ് ശിവദാസന്‍ നായര്‍ ചെയ്തതെന്നും ജമീല പ്രകാശം പറഞ്ഞു. സ്പീക്കര്‍ക്ക് പരാതി നല്‍കിയിട്ടും പൊലീസിന് കൈമാറാത്ത സാഹചര്യവും നിലവിലുണ്ടെന്ന് കോവളം എംഎല്‍എ വിശദീകരിച്ചു. ഫോട്ടോഗ്രാഫുകളുടെ സഹായത്തോടെയാണ് ജമീല കാര്യങ്ങള്‍ വിശദീകരിച്ചത്. നിയമസഭയില്‍ ചിത്രങ്ങള്‍ പകര്‍ത്തിയ പത്ര ഫോട്ടോഗ്രാഫറാണ് ഈ ചിത്രങ്ങള്‍ നല്‍കിയതെന്നും ജമീലാ പ്രകാശം വിശദീകരിച്ചു. ഇടതു പക്ഷത്തെ മറ്റ് വനിതാ എംഎല്‍എമാരും ജമീലാ പ്രകാശത്തോടൊപ്പം ഉണ്ടായിരുന്നു.
പ്രതിപക്ഷ എം.എല്‍.എമാര്‍ക്കെതിരെ നടപടി എടുത്തതില്‍ മുഖ്യമന്ത്രി ഉമ്മന്‍ചാണ്ടിക്ക് ഇരട്ടത്താപ്പാണെന്ന് പ്രതിപക്ഷ നേതാവ് വി.എസ്.അച്യുതാനന്ദന്‍ പറഞ്ഞു. മുഖ്യമന്ത്രിയും ആഭ്യന്തര മന്ത്രി രമേശ് ചെന്നിത്തലയും നോക്കിയിരിക്കെയാണ് സഭയില്‍ ഭരണപക്ഷത്തെ ദുശാസനന്മാര്‍ അഴിഞ്ഞാടിയത്. വനിതാ എം,എല്‍.എമാരോട് മോശമായി പെരുമാറിയ ഭരണപക്ഷ എം.എല്‍.എമാര്‍ക്കെതിരെ പീഡനക്കുറ്റത്തിനു കേസെടുക്കാവുന്നതാണെന്നും വി.എസ് പറഞ്ഞു. ജമീല പ്രകാശം അടക്കമുള്ള വനിതാ പ്രതിപക്ഷ എം.എല്‍.എമാര്‍ക്കൊപ്പം വാര്‍ത്താ സമ്മേളനം നടത്തുകയായിരുന്നു അദ്ദേഹം.
സ്പീക്കര്‍ എന്‍.ശക്തനെയും വി.എസ് വിമര്‍ശിച്ചു. സഭയില്‍ നടന്നത് എന്താണെന്ന് സ്പീക്കര്‍ കാണാതെ പോയത് അദ്ദേഹത്തിന്റെ കണ്ണിന് മാത്രമല്ല മനസിനും കുഴപ്പമുള്ളതു കെണ്ടാണ്. തന്റെ പരാമര്‍ശം അണ്‍പാര്‍ലമെന്ററി എന്നു പറഞ്ഞ് സഭാരേഖകളില്‍ നിന്ന് മാത്രമെ നീക്കാനാവു. എന്നാല്‍ ജനങ്ങളുടെ മനസില്‍ സത്യം എന്നും നിലനില്‍ക്കും.
മന്ത്രി ഷിബു ബേബി ജോണ്‍, കെ.ശിവദാസന്‍ നായര്‍, ഡൊമിനിക് പ്രസന്റേഷന്‍, എം.എ. വാഹിദ്, എ.ടി.ജോര്‍ജ് എന്നിവര്‍ വനിതാ എം.എല്‍.എമാരോടു കാട്ടിയ തോന്ന്യവാസത്തിന്റെ ദൃശ്യങ്ങള്‍ നിയമസഭയിലെ വിഡിയോ ദൃശ്യങ്ങളിലുണ്ട്. മുഖ്യമന്ത്രി ആദ്യം പറഞ്ഞത് ഒരുമിച്ചിരുന്ന് ദൃശ്യങ്ങള്‍ കണ്ട് തീരുമാനിക്കാം എന്നാണ്. എന്നാല്‍, പ്രതിപക്ഷ എം.എല്‍.എമാര്‍ക്കതെിരെ മാത്രം നടപടിയെടുത്തു. ഭരണകക്ഷിയിലെ എം.എല്‍.എമാര്‍ എന്തെങ്കിലും ചെയ്‌തോ എന്നറിയാന്‍ ദൃശ്യം പരിശോധിക്കാമെന്നാണ് ഇപ്പോള്‍ മുഖ്യമന്ത്രി പറയുന്നത് ഇതിനെയാണ് പച്ചമലയാളത്തില്‍ ഇരട്ടത്താപ്പെന്ന് പറയുന്നത്. ഈ ദൃശ്യങ്ങള്‍ പരിശോധിക്കാന്‍ തയാറായാല്‍, പണ്ട് മുഖ്യമന്ത്രിയുടെ ഓഫീസില്‍ സരിത എസ്.നായര്‍ വന്നതിന്റെ സിസിടിവി ദൃശ്യങ്ങള്‍ മാഞ്ഞുപോയതുപോലെ ഈ ദൃശ്യങ്ങളും മാഞ്ഞുപോകാന്‍ സാധ്യതയുണ്ടെന്നും വി.എസ്. ആരോപിച്ചു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
