മലയാളികള് ഒന്നിച്ചപ്പോള് വിജയന് സാര് ഒന്നാമതെത്തി; ഇന്ത്യന് ഓഫ് ദ ഇയര് ജനപ്രിയ പുരസ്കാരം പി. വിജയന്; കല്ലുവെട്ടിയും മണ്ണ് ചുമന്നും വളര്ന്ന സാധാരണക്കാരന്
സിഎന്എന് ഐബിഎന് ഇന്ത്യന് ഓഫ് ഇയര് 2014ലെ ജനപ്രിയ പുരസ്കാരം ഇന്റലിജന്സ് ഡിഐജി പി. വിജയന്. ഇന്ത്യയില് മുഴുവന് നടത്തിയ ഓണ്ലൈന് വോട്ടെടുപ്പിലൂടെയാണ് അദ്ദേഹം പുരസ്കാരം സ്വന്തമാക്കിയത്. തെലങ്കാന മുഖ്യമന്ത്രി ചന്ദ്രശേഖര റാവുവും ഈ പുരസ്കാരം സ്വന്തമാക്കി.
ലൈഫ് ടൈം അച്ചീവ്മെന്റ് അവാര്ഡ് ഐഎസ്ആര്ഒ ചെയര്മാന് എ.എസ്. കിരണ് കുമാറും മുന് ചെയര്മാനും മലയാളിയുമായ ഡോ. കെ. രാധാകൃഷ്ണനും പങ്കിട്ടു. ഭാവി ശോഭനമാണെന്ന് പുരസ്കാരം സ്വീകരിച്ചുകൊണ്ട് പ്രതികരിച്ചു.
പ്രധാനമന്ത്രി നരേന്ദ്ര മോദിക്കാണ് ഇന്ത്യന് ഓഫ് ദ ഇയര് 2014 പുരസ്കാരം. നോബല് സമ്മാന ജേതാവ് കൈലാഷ് സത്യാര്ഥി, മൈക്രോസോഫ്റ്റ് ചെയര്മാന് സത്യ നഡേല, വിപ്രോ ചെയര്മാന് അസിം പ്രേമംജി, എഴുത്തുകാരന് ചേതന് ഭഗത്, എന്. ചന്ദ്രശേഖരന് തുടങ്ങിയവരും വിവിധ മേഖലകളില് പുരസ്കാരത്തിന് അര്ഹരായി.
പബ്ലിക് സര്വീസ്, രാഷ്ട്രീയം, സ്പോര്ട്സ്, ബിസിനസ്, വിനോദം, രാജ്യാന്തര ഇന്ത്യന് എന്നീ വിഭാഗങ്ങളിലായി ശ്രദ്ധേയരായ വ്യക്തികള്ക്കാണ് ഓരോ വര്ഷവും ഇന്ത്യന് ഓഫ് ദ ഇയര് അവാര്ഡ് നല്കി വന്നിരുന്നത്. സ്റ്റുഡന്റ്സ് പൊലീസ് സംവിധാനം രാജ്യത്തിന് മാതൃകാപരമായി നടപ്പാക്കുന്നതിന് നല്കിയ സംഭാവനയാണ് പി. വിജയനെ നേട്ടത്തിന് അര്ഹനാക്കിയത്.
കല്ലുവെട്ടിയും മണ്ണ് ചുമന്നുമാണ് ഈ സാധാരണക്കാരന് ഐപിഎസിന്റെ പടികയറി ഇന്ന് ഡിഐജി സ്ഥാനത്തിരിക്കുന്നത്. ഈ ഐപിഎസ് ഓഫീസറുടെ കഥ ആരെയും ആവേശം കൊള്ളിക്കുന്നതാണ്. പൊലീസ് ഉദ്യോഗസ്ഥര്ക്കിടയിലെ സൗമ്യ വ്യക്തിത്വത്തിന് ഉടമയായ വിജയന് ദീര്ഘമായ തന്റെ പൊലീസ് ജീവിതത്തില് കറപുരളാത്ത വ്യക്തിത്വം കൂടിയാണ്.
കോഴിക്കോട് പന്തീരങ്കാവ് സ്വദേശിയായ വിജയന് പൊലീസ് സര്വീസില് എത്തിയത് കഠിനാധ്വാനം കൊണ്ടു മാത്രമാണ്. വിജയന് തടസമായി നിന്നത് പണമായിരുന്നു. എന്നാല് തോല്ക്കാന് മനസില്ലാത്തതിനാല് കല്ലും മണ്ണും ചുമന്ന് പണം സമ്പാദിച്ചാണ് ഒടുവില് പോലീസ് സേനയിലെ ഉന്നതിയില് എത്തിയത്. ദാരിദ്ര്യം കാരണം പത്താംക്ലാസില് വച്ച് പഠനം ഉപേക്ഷിക്കേണ്ട ഘട്ടത്തില് നിന്നാണ് വിജയന്റെ ഈ വിജയം. കേരള പോലീസില് സ്തുത്യര്ഹമായ സേവനമാണ് പി വിജയനുള്ളത്.
പി. വിജയന്റെ വിജയത്തിനായി മലയാളി വാര്ത്തയും ശക്തമായ പ്രചരണം നല്കിയിരുന്നു. വോട്ടെടുപ്പിന്റെ നിര്ണായക ഘട്ടങ്ങളില് മലയാളി വാര്ത്തയുടെ ലോകത്തെമ്പാടുമുള്ള വായനക്കാര് പി. വിജയന് വോട്ട് ചെയ്തിരുന്ന കാര്യവും ഇവിടെ അഭിമാനത്തോടെ ഓര്മ്മിക്കട്ടെ. വിജയന് സാറിന്റെ വിജയം സാധാരണക്കാരുടെ വിജയമാക്കിയ നമുക്ക് അഭിമാനിക്കാം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha