ഉപഭോക്തൃകമ്മീഷനായി സിപിഐക്കാരെ നിയമിച്ചത് മുഖ്യമന്ത്രി; നിയമനം പൊട്ടിത്തെറിയിലേക്ക്
ഉപഭോക്തൃ തര്ക്ക പരിഹാര ഫോറം ജില്ലാ അധ്യക്ഷനായി സിപിഐ നേതാവിനെ നിയമിച്ചത് ഭക്ഷ്യമന്ത്രി അറിയാതെ മുഖ്യമന്ത്രിയാണെന്ന് സൂചന. ഇക്കാര്യം പുന:പരിശോധിക്കണമെന്ന് ആവശ്യം ഉയര്ന്നെങ്കിലും മുഖ്യമന്ത്രി അക്കാര്യത്തില് തീരുമാനമെടുത്തിട്ടില്ല. സിപിഐ സ്ഥാനാര്ത്ഥി കെപിസിസി ജനറല് സെക്രട്ടറിക്കെതിരെ മത്സരിച്ച വ്യക്തിയെയാണ് ജില്ലാ ഉപഭോക്തൃ തര്ക്ക പരിഹാരഫോറം ജില്ലാ അധ്യക്ഷനായി സര്ക്കാര് നിയമിച്ചത്. കോണ്ഗ്രസിലെ പ്രമുഖരെ പിന്തള്ളിയാണ് നിയമനം നടന്നത്.പാലക്കാട് ഡി.സി.സി പ്രസിഡന്റ് സി.വി. ബാലചന്ദ്രനാണ് ഇക്കാര്യം കെപിസിസി യോഗത്തില് അവതരിപ്പിച്ചത്.
ഇതെങ്ങനെ സംഭവിച്ചു എന്ന് ബാലചന്ദ്രന് ചോദിച്ചപ്പോള് വകുപ്പ് ഭക്ഷ്യമന്ത്രിയുടേതല്ലേ എന്നായിരുന്നു മറു ചോദ്യം. എന്നാല് മന്ത്രിസഭയുടെ അനുമതിയോടെയാണ് പ്രസ്തുത നിയമനം നടത്തിയതെന്ന് ബാലചന്ദ്രന് തിരിച്ചടിച്ചു. അതായത് മുഖ്യമന്ത്രിയാണ് നിയമനം നടത്തിയത്. മന്ത്രിസഭാ യോഗത്തിന്റെ അധ്യക്ഷ മുഖ്യമന്ത്രിയാണ്. സിപിഐയെ വരുതിയിലാക്കുകയായിരുന്നു മുഖ്യമന്ത്രിയുടെ ലക്ഷ്യം. കേരള കോണ്ഗ്രസ് എം യുഡിഎഫ് വിടുമെന്ന അഭ്യൂഹം ശക്തമായിരുന്ന കാലത്താണ് സിപിഐയുമായി മുഖ്യമന്ത്രി ചങ്ങാത്തം കൂടിയത്. മന്ത്രിസഭയെ ഏതു വിധേനയും താങ്ങി നിര്ത്തുകയായിരുന്നു മുഖ്യന്റെ ലക്ഷ്യം. എന്നാല് വിഎം സുധീരന് ഇക്കാര്യം അറിഞ്ഞിരുന്നില്ല.കെപിസിസി യോഗം കഴിഞ്ഞയുടന് ഇതു സംബന്ധിച്ച് മുഖ്യമന്ത്രിയേയും കെപിസിസി അധ്യക്ഷനും ആശയ വിനിമയം നടത്തിയെന്നാണ് കേള്ക്കുന്നത്. എന്നാല് ജില്ലാ അധ്യക്ഷനെ തോന്നുന്നതു പോലെ നീക്കാന് കഴിയില്ല.
കാരണം അത് ജില്ലാ ജഡ്ജിയുടെ പദവിയാണ്. ഒന്നരലക്ഷം രൂപയോളം ഇവര്ക്ക് ശമ്പളം ലഭിക്കുന്നുണ്ട്. അഞ്ചു കൊല്ലത്തെ കാലാവധി കഴിഞ്ഞാല് മാത്രമേ ഇവരെ ഒഴിവാക്കാനാവുകയുള്ളൂ എന്നാണ് വ്യവസ്ഥ.കോണ്ഗ്രസ് സര്ക്കാര് ഭരിക്കുമ്പോള് ഇടതു പക്ഷം കാര്യങ്ങള് നേടുന്നു എന്ന ആരോപണം ശക്തമാണ്. കെപിസിസി ഇക്കാര്യത്തില് ശക്തമായ നിലപാട് സ്വീകരിച്ചിരിക്കുകയാണ്. ഇതിന് മന്ത്രിസഭയുടെ പിന്തുണയുണ്ടെന്നാണ് കേള്ക്കുന്നത്. ഘടക കക്ഷി മന്ത്രിമാരുടെ വകുപ്പുകളിലും ഇതു തന്നെയാണ് നടക്കുന്നത്. കോണ്ഗ്രസ് പ്രവര്ത്തകര്ക്ക് അതൃപ്തിയുണ്ടാക്കാതെ കാര്യങ്ങള് നടത്തണമെന്ന നിര്ദ്ദേശം പലവട്ടം കേരള സര്ക്കാരിനു നല്കിയെങ്കിലും ഫലമില്ലെന്നാണ് കെപിസിസിയുടെ നിരീക്ഷണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha