സുലേഖയ്ക്കെതിരായ പട നീക്കം ചെന്നിത്തലയുടെ നേതൃത്വത്തില്; ഉമ്മന്ചാണ്ടിയുടെ നിലപാടിനെതിരെ ഐ ഗ്രൂപ്പ് രംഗത്ത്
ജി.കാര്ത്തികേയന്റെ പത്നി സുലേഖയെ അരുവിക്കരയില് സ്ഥാനാര്ത്ഥിയാക്കണമെന്ന എ ഗ്രൂപ്പിന്റെയും ഉമ്മന്ചാണ്ടിയുടെയും നിലപാടിനെതിരെ ഐ ഗ്രൂപ്പ് രംഗത്ത്. രമേശ് ചെന്നിത്തലയുടെ നേതൃത്വത്തിലാണ് ഐ ഗ്രൂപ്പ്, മുന് എം എല് എ മോഹന് കുമാറിനു വേണ്ടി രംഗത്തെത്തിയത്. ഒരു കാരണവശാലും കാര്ത്തികേയന്റെ ഭാര്യയെ മത്സരിപ്പിക്കരുതെന്നാണ് രമേശിന്റെ ആവശ്യം. എന്നാല് തന്റെ പഴയ സഹപ്രവര്ത്തകന്റെ കുടുംബത്തെ വേദനിപ്പിക്കാന് ആഗ്രഹമില്ലാത്തതിനാല് രമേശ് പരസ്യമായി രംഗത്തെത്തില്ല. ഐ ഗ്രൂപ്പിന്റെ തിരുവനന്തപുരത്തെ നേതാക്കള് സുലേഖയ്ക്കെതിരെ പട നയിക്കും.
അതേ സമയം തിരുവനന്തപുരം ഡി.സിസി പ്രസിഡന്റ് മോഹന്കുമാറിന്റെ പരസ്യ പ്രസ്താവനയെ തുടര്ന്ന് അരുവിക്കരയില് സ്ഥാനാര്ത്ഥിയാകണമെന്ന ഐ ഗ്രൂപ്പിന്റെ ആവശ്യത്തോട് സുലേഖ സമ്മതം മൂളില്ല. കാര്ത്തികേയന്റെ സീറ്റ് അദ്ദേഹത്തിന്റെ കുടുംബത്തിനു നല്കാന് ഇത് വ്യവസായമല്ലെന്ന രൂക്ഷമായ ഭാഷയിലാണ് മോഹന്കുമാര് പ്രതികരിച്ചത്.
മോഹന്കുമാറിനെ പ്രകോപിപ്പിച്ചത് എന്താണെന്നറിയില്ല. തിരുവനന്തപുരത്തുകാരനായ കോണ്ഗ്രസുകാരനെ മത്സരിപ്പിക്കണമെന്ന് മോഹന്കുമാര് ആവശ്യപ്പെട്ടതിലൂടെ സീറ്റ് തനിക്ക് വേണമെന്നു തന്നെയാണ് അദ്ദേഹം പറയാതെ പറഞ്ഞത്. തിരുവനന്തപുരത്തുകാരനാണ് മോഹന്കുമാര്. നേരത്തെ നോര്ത്തിനെ പ്രതിനിധീകരിച്ചിരുന്നു.
അതേസമയം മുരളീധരനെ കടന്നാക്രമിക്കാനും മോഹന്കുമാര് മറന്നില്ല. തിരുവനന്തപുരത്തുകാരനല്ലാത്ത ഒരാള്ക്കാണ് പഴയ നോര്ത്ത് മണ്ഡലമായ ഇപ്പോഴത്തെ വട്ടിയൂര്ക്കാവ് നല്കിയതെന്ന് മോഹന്കുമാര് പറഞ്ഞു. മുരളി ഐ ഗ്രൂപ്പ് നേതാവാണ്. വട്ടിയൂര്ക്കാവില് മുരളി മത്സരിക്കാതിരുന്നെങ്കില് അത് മോഹന്കുമാറിന് ലഭിക്കുമായിരുന്നു.
ഏതായാലും സുലേഖ മത്സരിച്ചാല് മാത്രമാണ് ജയസാധ്യതയെന്ന് ഉമ്മന്ചാണ്ടി കണക്കുകൂട്ടുന്നു. കാരണം സര്ക്കാരിന്റെ ഇമേജ് തീര്ത്തും മോശമാണ്. വി. ശിവന്കുട്ടിയുടെ വകയില് കിട്ടിയ ഇമേജ് ജമീലപ്രകാശിന്റെ പത്ര സമ്മേളനത്തോടെ നഷ്ടപ്പെട്ടു. ഇത്തരമൊരു പശ്ചാത്തലത്തില് കാര്ത്തികേയന്റെ ദു:ഖം വിറ്റ് കാശാക്കിയിട്ടേ കാര്യമുള്ളൂ എന്ന് ഉമ്മന്ചാണ്ടി മനസിലാക്കുന്നു. എന്നാല് അങ്ങനെ ഉമ്മന്ചാണ്ടി ജയിക്കേണ്ടെന്നാണ് രമേശിന്റെ മനസിലിരുപ്പ്.
ഉമ്മന്ചാണ്ടിയും രമേശും അരുവിക്കരയുടെ പേരില് കൊമ്പുകോര്ക്കുന്നതിനിടയിലൂടെ ആര് എസ്പിയും രംഗത്തെത്തി. അവര്ക്ക് സീറ്റ് വേണമെന്ന ആവശ്യം അംഗീകരിക്കാനിടയില്ലെങ്കിലും ഡെപ്യൂട്ടി സ്പീക്കര് സ്ഥാനമെങ്കിലും നല്കേണ്ടി വരുമെന്നാണ് കണക്കൂകൂട്ടല്. സിപിഎമ്മിനെ പ്രതിനിധീകരിച്ച് അരുവിക്കരയില് മുന്മന്ത്രി എം.വിജയകുമാര് മത്സരിക്കുമെന്നാണ് പറഞ്ഞു കേള്ക്കുന്നത്. വിജയകുമാറിന് ബന്ധുബലവും സുഹൃദ്ബലവും ഏറെയുള്ള മണ്ഡലമാണ് അരുവിക്കര.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha