മൂവാറ്റുപുഴയിലും പരിസര പ്രദേശങ്ങളിലും പ്ലാസ്റ്റിക് അരി വ്യാപകമെന്നു പരാതി
മൂവാറ്റുപുഴയിലും പരിസര പ്രദേശങ്ങളിലും പ്ലാസ്റ്റിക് അരി വ്യാപകമെന്നു പരാതി ഉയരുന്നു. കഴിഞ്ഞ ദിവസം വാഴപ്പിള്ളി കരിക്കനാക്കുടി സാജിദ് വാഴപ്പിള്ളിയിലെ കടയില് നിന്നും വാങ്ങിയ അരിയില് പ്ലാസ്റ്റിക് അംശം ഉള്ളതായി പരാതിപ്പെട്ടിരുന്നു. ഇതേ തുടര്ന്ന് മൂവാറ്റുപുഴ, പായിപ്ര, വാഴപ്പിള്ളി, ആയവന എന്നിവിടങ്ങളില് നിന്നും പ്ലാസ്റ്റിക് കലര്ന്ന അരി കണ്ടെത്തിയതായി പരാതി ഉയരുന്നുണ്ട്. അത്യന്തം മാരകമായ പ്ലാസ്റ്റിക്ക് അരി അസുഖങ്ങള് ക്ഷണിച്ചു വരുത്താന് സാധ്യതയുള്ളതാണെന്ന് അധികൃതര് പറയുന്നു.
നേരത്തേ റേഷന് അരി വാങ്ങി കൊണ്ട് പോയി റെഡ് ഓക്സൈഡും ചേര്ത്ത് കുത്തരിയാക്കി വില്ക്കുന്ന പതിവുണ്ടായിരുന്നെന്നും, ഇപ്പോള് ഇത്തരം പ്രവണത കാണുന്നില്ലെന്നും ഉദ്യോഗസ്ഥര് വ്യക്തമാക്കി. നിലവില് റേഷന് അരിയില് തവിട് ചേര്ത്ത് പോളീഷ് ചെയ്ത് വില്പന നടത്തുന്നുണ്ടെന്ന പരാതിയുണ്ടെങ്കിലും ഇതൊന്നും കണ്ടെത്താന് കഴിഞ്ഞിട്ടില്ല. ഇതിനിടെ ലോക്കല് അരിയിലല്ല പ്രശ്നമെന്നും, ബ്രാന്റ് നെയ്മില് വില്പന നടത്തുന്ന വലിയ കമ്പനികളുടെ അരിയിലാണ് പ്ലാസ്റ്റിക് കലര്ന്നിരിക്കുന്നതെന്നും ഉപഭോക്താക്കളും ചൂണ്ടിക്കാട്ടി.
അരി തിളയ്ക്കുമ്പോള് ഉയരുന്ന ദുര്ഗന്ധവും രുചി വ്യത്യാസവും പാത്രത്തിന് മുകളില് രൂപപ്പെടുന്ന പാടയിലെ പ്ലാസ്റ്റിക് സാന്നിധ്യവുമാണ് അരിയില് പ്ലാസ്റ്റിക് കലര്ന്നതായുള്ള സംശയത്തിന് കാരണം. പുതിയ സാഹചര്യത്തില് പരിശോധന കര്ശനമാക്കാനാണ് ഭക്ഷ്യ സുരക്ഷാ ഉദ്യോഗസ്ഥരുടെ തീരുമാനം.
ഈ സാഹചര്യത്തില് ചില ബ്രാന്റ് അരികളുടെ സാമ്പിളുകള് പരിശോധനക്കായി ശേഖരിച്ചിട്ടുണ്ടെന്നും പരിശോധനാ റിപ്പോര്ട്ട് കിട്ടിയാലെ എന്ത് മായമാണ് അരിയില് കലര്ന്നിട്ടുള്ളതെന്ന് കണ്ടെത്താന് കഴിയുകയുള്ളൂവെന്നും ഭക്ഷ്യ സുരക്ഷാ ഉദ്യോഗസ്ഥര് പറയുന്നു. അരിയില് പ്ലാസ്റ്റിക് കലര്ത്താന് സാധ്യതയില്ലെന്നും മറ്റ് വസ്തുക്കള് എന്തെങ്കിലും ചേര്ത്തിട്ടുണ്ടൊ എന്ന് പരിശോധിച്ച് വരികയാണെന്നും അവര് പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha