ചലച്ചിത്ര വികസന കോര്‍പ്പറേഷന്‍ ചെയര്‍മാനായി രാജ് മോഹന്‍ ഉണ്ണിത്താനെ നിയമിക്കുന്നതില്‍ സിനിമാ മേഖലയിലുള്ളവര്‍ക്ക് പ്രതിഷേധം. ഇതേതുടര്‍ന്ന് കോര്‍പ്പറേഷന്‍ ഭരണസമിതിയിലുള്ള മണിയന്‍ പിള്ള രാജു അടക്കമുള്ളവര്‍ രാജിയ്‌ക്കൊരുങ്ങുന്നുവെന്നാണ് സൂചന. ഉണ്ണിത്താനെ ചെയര്‍മാനായി അംഗീകരിക്കാനാവില്ലെന്നാണ് ഇവരുടെ നിലപാട്.
നിരവധി കാലത്തെ പരിചയവും അനുഭവ സമ്പത്തുമുള്ള പലരെയും തഴഞ്ഞാണ് രാജ്‌മോഹന്‍ ഉണ്ണിത്താനെ നിയമിക്കാനുള്ള നീക്കം. കെ സി അബുവിന് സമിതിയില്‍ അംഗത്വം നല്‍കിയതിലും സിനിമാമേഖലയിലുള്ളവര്‍ എതിര്‍പ്പ് പ്രകടിപ്പിച്ചിട്ടുണ്ട്.
വിരലില്‍ എണ്ണാവുന്ന സിനിമകളില്‍ മാത്രം അഭിനയിച്ച ഈ കോണ്‍ഗ്രസ് നേതാവിനെ ചെയര്‍മാന്‍ സ്ഥാനത്തേക്കു പരിഗണിച്ചതില്‍ കടുത്ത അമര്‍ഷമാണ് സിനിമാ പ്രവര്‍ത്തകര്‍ക്കുള്ളത്. ഇതില്‍ പ്രതിഷേധിച്ച് കെഎസ്എഫ്ഡിസിയില്‍ നിന്ന് കൂട്ടരാജിക്ക് ഒരുങ്ങുകയാണ് സിനിമാരംഗത്തെ പ്രമുഖര്‍. മണിയന്‍ പിള്ള രാജുവും ഷാജി കൈലാസും ഛായാഗ്രാഹകന്‍ എസ് കുമാറുമെല്ലാം ഇത്തരത്തില്‍ രാജിക്കൊരുങ്ങുകയാണെന്നാണ് റിപ്പോര്‍ട്ടുകള്‍.
രാഷ്ട്രീയ ലക്ഷ്യം വച്ചുള്ള നീക്കത്തെ എതിര്‍ത്താണ് സിനിമാ പ്രവര്‍ത്തകര്‍ മുന്നോട്ടു പോകുന്നത്. രാഷ്ട്രീയം സിനിമയില്‍ കലര്‍ത്താനുള്ള നീക്കത്തെയാണ് എതിര്‍ക്കുന്നതെന്ന നിലപാടാണ് സിനിമാപ്രവര്‍ത്തകര്‍ക്കുള്ളത്. സംവിധായകന്‍ ഷാജി കൈലാസും ഫെഫ്ക പ്രതിനിധി ബി ഉണ്ണിക്കൃഷ്ണനുമെല്ലാം ഇക്കാര്യത്തില്‍ നിലപാടു വ്യക്തമാക്കിക്കഴിഞ്ഞു.
വ്യക്തിപരമായി ഉണ്ണിത്താനോട് വിരോധമൊന്നുമില്ലെന്ന് മണിയന്‍ പിള്ള രാജു പറഞ്ഞു. എന്നാല്‍, സിനിമാമേഖലയില്‍ മികച്ച അറിവുള്ള കമ്മിറ്റിയില്‍ വളരെ പെട്ടെന്ന് ഒരു രാഷ്ട്രീയക്കാരനെ ഉള്‍പ്പെടുത്തിയതിലുള്ള എതിര്‍പ്പാണ് തങ്ങള്‍ക്ക്. കലയെ രാഷ്ട്രീയവല്‍ക്കരണത്തിന് ഉപയോഗിക്കുന്നതിനെതിരെയാണ് തങ്ങളുടെ പ്രതിഷേധമെന്നും മണിയന്‍ പിള്ള രാജു പറഞ്ഞു. തിങ്കളാഴ്ച രാവിലെ രാജിവയ്ക്കുമെന്നാണ് രാജു മാദ്ധ്യമങ്ങളെ അറിയിച്ചത്.
വലിയ തോതിലുള്ള വികസനപ്രവര്‍ത്തനങ്ങള്‍ നടക്കുന്നതിനിടെയാണ് ചെയര്‍മാനായിരുന്ന സാബു ചെറിയാനെ മാറ്റി രാജ്‌മോഹന്‍ ഉണ്ണിത്താനെ സര്‍ക്കാര്‍ പ്രതിഷ്ഠിക്കുന്നത്. ഇതില്‍ പ്രതിഷേധിച്ചാണ് സിനിമാപ്രവര്‍ത്തകര്‍ സമിതിയില്‍ നിന്ന് കൂട്ടരാജിക്കൊരുങ്ങുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha