വിട്ടുവീഴ്ചയ്ക്കില്ലെന്ന് മാണി, പിസി ജോര്ജ്ജ് പുറത്തേക്ക്, യുഡിഎഫില് പ്രതിസന്ധി രൂക്ഷം
പിസി ജോര്ജ്ജിന്റെ കാര്യത്തില് മാണി നിലപാട് കടുപ്പിച്ചു. മുഖ്യമന്ത്രിയും കുഞ്ഞാലികുട്ടിയും മാണിയുമായി ചര്ച്ച നടത്തിയെങ്കിലും മാണി വിട്ട് വീഴ്ചയ്ക്ക് തയ്യാറായയില്ല. ഇതോടെ പിസി ജോര്ജ്ജിന് പുറത്തേക്കുള്ള വഴി തുറന്നു. പി.സി. ജോര്ജിന്റെ കാര്യത്തില് വിട്ടുവീഴ്ചയ്ക്കില്ലെന്ന് കേരള കോണ്ഗ്രസ് ചെയര്മാന് കെ.എം. മാണി അര്ഥശങ്കയ്ക്കിടയില്ലാതെ വ്യക്തമാക്കിയിട്ടുണ്ട്. ജോര്ജിനെ മാറ്റാന് ആവശ്യപ്പെട്ടത് പാര്ലമെന്ററി പാര്ട്ടി യോഗമാണ്. എട്ട് എംഎല്എമാര് ചേര്ന്നെടുത്ത തീരുമാനം മാറ്റേണ്ടതില്ലെന്നാണ് കരുതുന്നതെന്നും മാണി പറഞ്ഞു. പി.കെ. കുഞ്ഞാലിക്കുട്ടിയുമായുള്ള കൂടിക്കാഴ്ചയിലാണ് മാണി ഇക്കാര്യം അറിയിച്ചത്. യുഡിഎഫ് കാര്യങ്ങള് പരിശോധിക്കുമെന്ന് കൂടിക്കാഴ്ചയ്ക്കു ശേഷം കുഞ്ഞാലിക്കുട്ടി പറഞ്ഞു.
പി.സി. ജോര്ജ് ചിഫ് വിപ്പ് സ്ഥാനത്തുനിന്ന് തല്ക്കാലം രാജിവയ്ക്കില്ല. രാവിലെ മുഖ്യമന്ത്രി ഉമ്മന്ചാണ്ടിയുമായി ക്ളിഫ് ഹൗസില് ചര്ച്ച നടത്തിയശേഷമാണ് തീരുമാനം. രാജിക്കത്തുമായാണ് ജോര്ജ് മുഖ്യമന്ത്രിയെ കണ്ടത്. എന്നാല് രാജിക്കത്ത് വാങ്ങാന് മുഖ്യമന്ത്രി തയ്യാറായില്ല. സമവായ ശ്രമങ്ങളാണ് മുഖ്യമന്ത്രി നടത്തിയത്.
രാവിലെ എട്ടരയ്ക്ക് തുടങ്ങിയ കൂടിക്കാഴ്ച ഒന്നേകാല് മണിക്കൂര് നീണ്ടു. രാജി സന്നദ്ധനായാണ് പോയതെങ്കിലും തെറ്റു ചെയ്യാത്ത താന് എന്തി രാജിവയ്ക്കണമെന്ന് ജോര്ജ് മുഖ്യമന്ത്രിയോട് ചോദിച്ചതായും വിവരമുണ്ട്. യു.ഡി.എഫ് നേതാക്കളുമായി ചര്ച്ച നടത്തിയശേഷമാകും ജോര്ജിന്റെ കാര്യത്തില് തുടര് നടപടി ഉണ്ടാകുക. തല്ക്കാലം രാജിയില്ലാതെ സമവായത്തില് കൊണ്ടുപോകാനാണ് മുഖ്യമന്ത്രി ശ്രമിക്കുന്നത്. ഇന്നുവൈകിട്ട് യു.ഡി.എഫ് യോഗം ചേരുന്നുണ്ട്. അപ്പോള് ഈ വിഷയം ചര്ച്ച ചെയ്യും. കെ.എം. മാണി അടക്കമുള്ള നേതാക്കളുമായും മുഖ്യമന്ത്രി കൂടിയാലോചന നടത്തും.
രാവിലെ മുഖ്യമന്ത്രിയെ കണ്ടശേഷം പുറത്തിറങ്ങിയ ജോര്ജും ഇക്കാര്യം സ്ഥിരീകരിച്ചു. രാജിക്കത്തുമായാണ് പോയതെങ്കിലും അത് സ്വീകരിച്ചില്ലെന്ന് ജോര്ജ് പറഞ്ഞു. തന്നെ അപമാനിക്കുന്ന ഒരു കാര്യവും ഉമ്മന്ചാണ്ടി, രമേശ് ചെന്നിത്തല, പി.കെ. കുഞ്ഞാലിക്കുട്ടി എന്നിവരില് നിന്നുണ്ടായിട്ടില്ല. തന്റെ നിലപാട് അവരോട് വിശദീകരിച്ചു. അവര് ചര്ച്ച ചെയ്ത് ഉചിതമായ തീരുമാനമെടുക്കട്ടെ. അതിനനുസരിച്ച് തന്റെ പ്രവര്ത്തനവുമായി മുന്നോട്ടുപോകുമെന്നും ജോര്ജ് പ്രതികരിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha