യെമനില്‍ രൂക്ഷമാകുന്ന കലാപത്തിനിടെ കുടുങ്ങിപ്പോയ മലയാളികളുടെ പ്രശ്‌നങ്ങള്‍ പരിഹരിക്കണമെന്നാവശ്യപ്പെട്ട് പ്രതിപക്ഷ നേതാവ് വി.എസ്. അച്യുതാനന്ദന്‍ കേന്ദ്ര വിദേശകാര്യമന്ത്രി സുഷമ സ്വരാജിനു കത്തയച്ചു. മലയാളികളെ തിരിച്ചു നാട്ടിലെത്തിക്കുന്നതിനുള്ള നടപടികള്‍ സ്വീകരിക്കണമെന്നും കത്തില്‍ ആവശ്യപ്പെടുന്നു. ആഭ്യന്തര കലാപം രൂക്ഷമായ യമനില്‍ മലയാളികള്‍ ഉള്‍പ്പെടെ നിരവധി പേരാണ് ഇപ്പോള്‍ കുടുങ്ങി കിടക്കുന്നു. യമന്‍ തലസ്ഥാനമായ സനയില്‍ സംഘര്‍ഷങ്ങള്‍ രൂക്ഷമായതിനാല്‍ അവിടെയുള്ള ആളുകള്‍ക്ക് പുറത്തിറങ്ങാന്‍ പോലും സാധിക്കാത്ത അവസ്ഥയാണ് ഇപ്പോള്‍.

സനയോട് വിട്ടുള്ള പ്രദേശങ്ങളില്‍ താമസിക്കുന്നവരും ജോലി ചെയ്യുന്നവരുമായ ആളുകള്‍ സുരക്ഷിതരാണെങ്കിലും ഭീതിയുടെ നിഴലിലാണ്. കലാപം രൂക്ഷമായതിനാല്‍ പുറത്തിറങ്ങാന്‍ കഴിയാത്ത അവസ്ഥായാണെന്ന് യെമനില്‍ ജോലി ചെയ്യുന്ന മലയാളികളായ നഴ്‌സുമാര്‍ പറയുന്നു. സംഘര്‍ഷവും ബോംബാക്രമണവും തുടരുന്നതിനാല്‍ താമസ സ്ഥലത്തു നിന്നും പുറത്തു പോകാന്‍ പോലും കഴിയുന്നില്ല.
പലര്‍ക്കും പാസ്‌പോര്‍ട്ട് തൊഴിലുടമകള്‍ പിടിച്ചുവെച്ചിരിക്കുന്ന സ്ഥിതിയുമുണ്ട്. യെമനിലെ സംഘര്‍ഷം അയയാതെ മലയാളികളെ നാട്ടിലെത്തിക്കാനാകില്ലെന്ന് മന്ത്രി കെ സി ജോസഫ് പറഞ്ഞു.മലയാളി നഴ്‌സുമാര്‍ ഉള്‍പ്പെടെ യെമനില്‍ ജോലി ചെയ്യുന്ന എല്ലാ ഇന്ത്യക്കാരും എത്രയും വേഗം നാട്ടിലേക്കു മടങ്ങണമെന്ന് വിദേശകാര്യ മന്ത്രാലയം ഇന്നലെ വ്യക്തമാക്കിയിരുന്നു. വിമാനത്താവളത്തില്‍ എത്താന്‍ പോലും കഴിയാത്ത സ്ഥിതിയാണ് ഇപ്പോള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha