തോട്ടക്കാരനായിരുന്ന വികെ ഇബ്രാഹിംകുഞ്ഞ് 32 കൊല്ല കൊണ്ടെങ്ങനെ കോടീശ്വരനായി, തെളിവുകളുമായി കെബി ഗണേശ് കുമാര് ലോകായുക്തയ്ക്ക് മുന്നില്
പൊതുമരാമത് മന്ത്രി ഇബ്രാഹിംകുഞ്ഞിനെതിരെ ഉന്നയിച്ച അഴിമതി ആരോപണങ്ങളില് ശേഖരിച്ച തെളിവുകള് കെബി ഗണേശ് കുമാര് എംഎല്എ ഇന്ന് ലോകായുക്തയ്ക്ക് കൈമാറി. 1983ല് തോട്ടക്കാരനായിരുന്ന വികെ ഇബ്രാഹിംകുഞ്ഞ് 32 കൊല്ലം കൊണ്ട് കോടീശ്വരനായത് എങ്ങനെയെന്ന് അന്വേഷിക്കണമെന്ന് ഗണേശ് കുമാര് ആവശ്യപ്പെട്ടു. ലോകായുക്തയുടെ മേല്നോട്ടത്തില് ആദായ നികുതി വകുപ്പിനെ സഹകരിപ്പിച്ച് അന്വേഷണം നടത്തിയാല് ഇബ്രാഹിംകുഞ്ഞിന്റെ അവിഹിത സ്വത്ത് പുറംലോകത്ത് എത്തുമെന്ന് ഗണേശ് കുമാര് വ്യക്തമാക്കി. അടുത്ത മാസം 16ന് മുമ്പ് ഇവ ക്രോഡീകരിച്ച് സത്യവാങ്മൂലമായി നല്കാന് ഗണേശ് കുമാറിനോട് കോടതി നിര്ദ്ദേശിക്കുകയും ചെയ്തു.
വികാരാധീനനായാണ് ലോകായുക്തയ്ക്ക് മുന്നില് ഗണേശ് കുമാര് കാര്യങ്ങള് വിശദീകരിച്ചത്. താനുന്നയിച്ച ആരോപണങ്ങള്ക്ക് മാനത്തിന്റേയും ജീവന്റേയും വിലയാണ്.1983ല് കൊച്ചിയിലെ വെറുമൊരു തോട്ടക്കാരനായിരുന്നു ഇബ്രാഹിംകുഞ്ഞ്. 1991ല് ഒരു പൊതുമേഖലാ സ്ഥാപനത്തില് ചെയര്മാനായി. ആയിരം രൂപയാണ് ചെയര്മാന്മാര്ക്ക് പ്രതിമാസം ലഭിക്കുക. ഇബ്രാഹിംകുഞ്ഞിന്റെ കുടുംബ സ്വത്ത് സഹോദരനുമൊത്ത് ഒരു പോലെയാണ് വീതിച്ചത്. ഇബ്രാഹിംകുഞ്ഞിന്റെ ഭാര്യയും മക്കളും ജോലി ചെയ്ത് വരുമാനം ഉണ്ടാക്കുന്നുമില്ല. പിന്നെ എങ്ങനെ ഇബ്രാഹിംകുഞ്ഞിന് കോടിക്കണക്കിന് രൂപയുടെ സ്വത്തുണ്ടായെന്നാണ് ഗണേശ് കുമാര് ലോകായുക്തയില് ഉന്നയിച്ചത്. ആദായ നികുതി വകുപ്പിന്റെ സഹകരണത്തോടെ അന്വേഷണം നടന്നാല് എല്ലാം പുറത്തുവരും. ലോകായുക്തയുടെ അന്വേഷണ സംവിധാനം ഇതിനായി ആദായ നികുതി വകുപ്പുമായി സഹകരിക്കണമെന്നും ഗണേശ് കുമാര് പറഞ്ഞു.
പൊതുമരാമത്ത് മന്ത്രിയുടെ ഓഫീസിലുള്ളവര്ക്കെതിരെ ഉന്നയിച്ച ആരോപണങ്ങളില് ശേഖരിച്ച തെളിവുകള് ഗണേശ് കുമാര് നല്കി. പൊതുമരാമത്തിലെ അഴിമതിയിലെ രേഖകള് വിവരാവകാശ പ്രകാരം ചോദിച്ചിട്ട് നല്കുന്നില്ല. അഴിമതി മറച്ചുവയ്ക്കാനുള്ള ബോധപൂര്വ്വമായ ശ്രമമാണ് ഇത്. അതുകൊണ്ട് തന്നെ അധികാരം ഉപയോഗിച്ച് ഈ രേഖകള് ലോകായുക്ത പിടിച്ചെടുക്കണമെന്നും ഗണേശ് ആവശ്യപ്പെട്ടു. എല്ലാ കേട്ടശേഷമാണ് ഉള്ളതെളിവുകള് സത്യവാങ്ങ്മൂലമായി അഭിഭാഷകന് മുഖേന നല്കാന് കോടതി ആവശ്യപ്പെട്ടത്.
വയനാടിലെ സൈഡ് ബീം നിര്മ്മാണത്തില് വലിയ അഴിമതിയുണ്ടെന്നും ആരോപിച്ചു. ആദ്യം പാലക്കാട്ടു നടന്ന ഒരു യോഗത്തിലും തുടര്ന്ന് നിയമസഭയിലുമായിരുന്നു ഗണേശ്കുമാര് മുമ്പ് ആരോപണങ്ങള് ഉന്നയിച്ചത്. മന്ത്രിയുടെ ഓഫീസ് കേന്ദ്രീകരിച്ച് അഴിമതി നടക്കുന്നുണ്ടെന്നായിരുന്നു ഗണേശ്കുമാറിന്റെ ആരോപണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha