നല്ല പഴുത്ത മാമ്പഴം കണ്ടാല്‍ ആര്‍ക്കാണ് കഴിക്കാന്‍ തോന്നത്തത്. കൊതിയൂറും മാമ്പഴം എല്ലാ പ്രായക്കാര്‍ക്കും എന്നും ഇഷ്ടവിഭവമാണ്. എന്നാല്‍ ഇനി രാസപ്രയോഗത്തിലൂടെ പഴുപ്പിച്ചെടുക്കുന്ന വിഷമാമ്പഴം വിറ്റാല്‍ കച്ചവടക്കാര്‍ക്ക് പണി കിട്ടും. വിഷമാമ്പഴം പിടിച്ചെടുക്കാന്‍ തദ്ദേശസ്ഥാപനങ്ങളുടെ സഹകരണത്തോടെ ഭക്ഷ്യസുരക്ഷാ വിഭാഗം ജനകീയാരോഗ്യ സേന രൂപീകരിക്കുന്നു.

വരും ദിവസങ്ങളില്‍ മാമ്പഴക്കടകളിലും ഗോഡൗണുകളിലും റെയ്ഡ് ഊര്‍ജിതമാക്കുമെന്ന് ഭക്ഷ്യസുരക്ഷാ വിഭാഗം അസി. കമ്മിഷണര്‍ വി. ഹരിലാല്‍ പറഞ്ഞു. രാസലായനിയാണ് മറുനാടന്‍ ഇനങ്ങള്‍ക്ക് പ്രയോഗിക്കുന്നതെങ്കില്‍ കാന്‍സറിന് വരെ ഇടയാക്കുന്ന കാല്‍സ്യം കാര്‍ബൈഡ് പൊടി ഉപയോഗിച്ചാണ് നാടന്‍മാങ്ങ പഴുപ്പിക്കുന്നത്. ഇരിട്ടി പയഞ്ചേരിയിലെ ഒരു ഹാര്‍ഡ്‌വെയര്‍ കടയില്‍ നിന്നും മറ്റൊരാളില്‍ നിന്നും കാല്‍സ്യം കാര്‍ബൈഡ് ശേഖരം പിടികൂടിയിരുന്നു. മതിയായ രേഖകള്‍ ഹാജരാക്കാനോ തക്കതായ വിശദീകരണം നല്‍കാനോ ഇവര്‍ക്കായില്ല.

കേസ് തലശ്ശേരി ആര്‍. ഡി. ഒ വിനുവിന് കൈമാറിയിരിക്കുകയാണ്. മൂവാണ്ടനും കിളിച്ചുണ്ടനും കോട്ടുക്കോണവുമൊക്കെ രുചിപകര്‍ന്ന മലയാളിയുടെ നാവില്‍ മറുനാട്ടില്‍ നിന്ന് വരുന്ന വിഷമാമ്പഴം രോഗാണുക്കള്‍ നിറയ്ക്കുന്നുണ്ട്. വിഷമാമ്പഴത്തിലൂടെ ഗുരുതരമായ ദഹനക്കേടും ആമാശയ കാന്‍സര്‍വരെ ഉണ്ടാകുന്നു. മാമ്പഴം പെട്ടെന്ന് പഴുപ്പിക്കാന്‍ കച്ചവടക്കാര്‍ കാല്‍സ്യം കാര്‍ബൈഡ് പൊടി വിതറാറുണ്ടെന്നും അധികൃതര്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha