നാളെ മുതല്‍ എല്ലാത്തിനും തീ വില
നാളെ മുതല്‍ കെഎസ് ആര്‍ടിസി നിരക്ക് കൂടും കൂടാതെ ആവശ്യ സാധനങ്ങളുടെ നിരക്കും കുത്തനെ ഉയരരുന്നതോടെ സാധാരണക്കാരന്റെ കീശ കീറുമെന്നതില്‍ സംശയമില്ല. കേന്ദ്ര, സംസ്ഥാന ബജറ്റ് നിര്‍ദേശങ്ങള്‍ നാളെ ഒരുമിച്ചു പ്രാബല്യത്തിലാകുന്നതോടെ വിലക്കയറ്റം മൂലം സാധാരണക്കാരുടെ നടുവൊടിയും. റയില്‍വേ ചരക്കുകൂലി നാളെ മുതല്‍ വര്‍ധിക്കുന്നതോടെ നിത്യോപയോഗ സാധനങ്ങള്‍ക്കുള്‍പ്പെടെ വില കൂടുമെന്നുറപ്പ്. സംസ്ഥാന സര്‍ക്കാരിന്റെ പെട്രോള്‍, ഡീസല്‍ സെസ് കൂടി ഏര്‍പ്പെടുത്തുന്നതോടെ മറ്റു സംസ്ഥാനങ്ങളെക്കാള്‍ വിലക്കയറ്റം കേരളത്തിനു നേരിടേണ്ടിവരും. കേരളം ഇറക്കുമതി ചെയ്യുന്ന പ്രധാന ഭക്ഷ്യവസ്തുക്കളായ പയറുവര്‍ഗങ്ങളും ധാന്യങ്ങളുമുള്‍പ്പെടെയുള്ളവയുടെ ചരക്കുകൂലി 10% വരെയാണു റയില്‍വേ ബജറ്റില്‍ വര്‍ധിപ്പിച്ചത്. ഇതിനു പുറമെ മണ്ണെണ്ണ, എല്‍പിജി എന്നിവയുടെ കടത്തുകൂലിയും വര്‍ധിപ്പിച്ചിട്ടുണ്ട്. ഇതെല്ലാം വീട്ടുചെലവുകള്‍ ഗണ്യമായി കൂട്ടും. ഭവന, റോഡ് നിര്‍മാണ പദ്ധതികള്‍ക്കായി പെട്രോളിനും ഡീസലിനും ഒരു രൂപ തീരുവ ഏര്‍പ്പെടുത്താനുള്ള സംസ്ഥാന ബജറ്റിലെ നിര്‍ദേശവും നാളെ മുതല്‍ പ്രാബല്യത്തിലാകും. ഇരുചക്രവാഹനങ്ങളുടെ നികുതിയും വര്‍ധിപ്പിച്ചിട്ടുണ്ട്.
വേനല്‍ക്കാലത്തു വൈദ്യുതി ഉപയോഗം വര്‍ധിക്കുന്നതോടെ കെഎസ്ഇബി കൂടുതല്‍ കടത്തിലാകും. സിഗരറ്റിന്റെയും മദ്യത്തിന്റെയും നികുതി ഉയര്‍ത്തിയത് ആരോഗ്യപരമായി നല്ല തീരുമാനമാണെങ്കിലും പൊതുവെ രണ്ടിനും നികുതി കൂടുതലുള്ള കേരളത്തില്‍ ഇവ ഉപയോഗിക്കുന്നവരുടെ പോക്കറ്റു കാലിയാകും. ഇടയ്ക്കിടെ വിലകൂടുന്ന കേരളത്തിലെ ഹോട്ടല്‍ ഭക്ഷണത്തിന്റെ വില വീണ്ടും കൂട്ടാനും കേന്ദ്ര ബജറ്റ് തീരുമാനം വഴിവയ്ക്കും. ട്രെയിന്‍, ബസ് യാത്രയുടെ നിരക്കു കൂടില്ലെങ്കിലും വിമാനയാത്രയ്ക്കു ചെലവുകൂടും. കേന്ദ്രനികുതി വര്‍ധിപ്പിച്ച സാഹചര്യത്തില്‍ കേരളത്തിലെ ഭാഗ്യക്കുറി നടത്തിപ്പിലെ പ്രതിസന്ധി കൂടും.
സിമന്റ്, സ്റ്റീല്‍ എന്നിവയുടെ ചരക്കുകൂലി കൂട്ടിയതു നിര്‍മാണമേഖലയിലെ പ്രതിസന്ധി വരും ദിവസങ്ങളില്‍ രൂക്ഷമാക്കും. സിമന്റിന്റെ വില വര്‍ധിപ്പിക്കാന്‍ കേന്ദ്ര ബജറ്റിലും നിര്‍ദേശമുണ്ട്. രണ്ടുംകൂടിയാകുമ്പോള്‍ സിമന്റ് വില പായ്ക്കറ്റിന് അഞ്ഞൂറിനടുത്തെത്തിയാലും അദ്ഭുതപ്പെടാനില്ലെന്നാണു വ്യാപാരികള്‍ നല്‍കുന്ന സൂചന. കല്‍ക്കരിയുടെ കടത്തുകൂലി വര്‍ധിപ്പിച്ചതോടെ കേരളം പുറത്തുനിന്നു വാങ്ങുന്ന വൈദ്യുതിയുടെ നിരക്കിലും വര്‍ധനയുണ്ടാകും. അങ്ങനെ എല്ലാം കൊണ്ടും സാധാരണക്കാരന്‍ പെരുവഴിയില്‍ വിവാദങ്ങള്‍ മറ്റൊരു വഴിയേ എത്തി ഇവയെ കാര്യമായി മറയ്ക്കുന്നുമുണ്ട്.
ബജറ്റ് നിര്‍ദേശങ്ങള്‍ നടപ്പാകുന്നതിനു മുന്‍പുതന്നെ വിലക്കയറ്റം തുടങ്ങിയെന്നാണു വിപണിയില്‍നിന്നുള്ള വിവരം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
