കെഎസ്ആര്ടിസിയില് അപകട ഇന്ഷുറന്സ് ഏര്പ്പെടുത്തുന്നതിന്റെ ഭാഗമായി ഇന്നു മുതല് അധിക നിരക്ക്
കെഎസ്ആര്ടിസിയില് അപകടഇന്ഷുറന്സ് ഏര്പ്പെടുത്തുന്നതിന്റെ ഭാഗമായി 15 രൂപയ്ക്കു മുകളിലുള്ള ടിക്കറ്റുകള്ക്ക് ഇന്നു മുതല് സെസ് ഉണ്ടായിരിക്കും. ഒരുരൂപ മുതല് പത്തുരൂപ വരെയാണു സെസ്. 14 രൂപ വരെയുള്ള ടിക്കറ്റിനു നിരക്കു കൂടില്ല. 15-24 നിരക്കിന് ഒരുരൂപ, തുടര്ന്ന് 49 രൂപ വരെയുള്ള ടിക്കറ്റിന് രണ്ടുരൂപ, തുടര്ന്ന് 74 വരെ മൂന്നുരൂപ, 75 മുതല് 99 വരെ നാലുരൂപ നിരക്കില് സെസ് ഉണ്ടാകും. 100 നു മുകളിലുള്ള ടിക്കറ്റിനു പത്തുരൂപയുടെ വര്ധന വരും.
യാത്രയ്ക്കിടെ അപകട മരണമുണ്ടായാല് അഞ്ചുലക്ഷം രൂപവരെ ധനസഹായം നല്കാനാണു പദ്ധതി. ടിക്കറ്റ് റിസര്വ് ചെയ്തു യാത്ര ചെയ്യുന്നവര്ക്കാണ് അഞ്ചുലക്ഷത്തിന്റെ ആനുകൂല്യം. അല്ലാത്തവര്ക്ക് ഒരുലക്ഷം രൂപയും. മരണപ്പെടുന്നവര്ക്കു മക്കളുണ്ടെങ്കില് പഠനസഹായമായി 10,000 രൂപവരെ ലഭിക്കും. പരുക്കേറ്റാല് റിസര്വേഷന് ഉള്ളവര്ക്ക് 50,000 രൂപയും മറ്റുള്ളവര്ക്കു 15,000 രൂപയും നല്കും. റിസര്വേഷന് ഉള്ളവരുടെ കൂടെ ആശുപത്രിയില് നില്ക്കുന്നവര്ക്ക് 500 രൂപവീതം നല്കും.
ഒപിയില് ചികില്സ തേടുന്നവര്ക്ക് 3000 മുതല് 10000 രൂപ വരെയാണു ധനസഹായം. റിസര്വു ചെയ്തവരുടെ സാധനങ്ങള് നഷ്ടപ്പെട്ടാലും 3000 രൂപവരെ നഷ്ടപരിഹാരം ലഭിക്കും. ന്യൂ ഇന്ത്യ അഷ്വറന്സ് കമ്പനിയുമായി ചേര്ന്നാണു പദ്ധതി നടപ്പാക്കുന്നത്. സെസ് വഴി മാസം 15 കോടി അധിക വരുമാനമുണ്ടാകുമെന്നാണു കെഎസ്ആര്ടിസിയുടെ പ്രതീക്ഷ. ഈ തുക പെന്ഷന് ഫണ്ടിലേക്കു മാറ്റും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha