ചീഫ് വിപ്പ് സ്ഥാനം കൈയ്യാലപ്പുറത്തായതോടെ എങ്ങനേയും ആ പദവി നിലനിര്‍ത്താനുള്ള ശ്രമത്തിലാണ് പിസി ജോര്‍ജ്. ബ്ലാക്ക്‌മെയിലിംഗും ഭീക്ഷണിയും ഉന്നത സമ്മര്‍ദ്ദവുമായി അവസാനവട്ട പരിശ്രമത്തിലാണ് പിസി ജേര്‍ജ്ജ്. തിങ്കളാഴ്ചയോടെ ചീഫ് വിപ്പ് സ്ഥാനത്തു നിന്നും നീക്കുമെന്ന് ഉറപ്പായതോടെയാണ് ജോര്‍ജ്ജ് അന്തിമ പൂരത്തിന് ഇറങ്ങിയത്. 
ഇതിനിടെ പിസി ജോര്‍ജിനെ രക്ഷിക്കാനുള്ള ചെന്നിത്തലയുടെ ശ്രമങ്ങളും പരാജയപ്പെട്ടു. മാണിയുമായി വളരെ അടുപ്പം പുലര്‍ത്തുന്ന എന്‍എസ്എസ് സെക്രട്ടറി സുകുമാരന്‍ നായരെ പോയി കണ്ടത് എങ്ങനെയാണ് ജോര്‍ജ്ജിന്റെ ചീഫ് വിപ്പ് സ്ഥാനം രക്ഷിക്കുക എന്ന ഉദ്ദേശത്തോടെയാണ്. എന്നാല്‍ ജോര്‍ജ്ജിന്റെ കാര്യത്തില്‍ ഇടപെടാന്‍ താല്‍പര്യമില്ല എന്ന് സുകുമാരന്‍ നായര്‍ തുറന്നു പറഞ്ഞതായാണ് സൂചന. 
ചെന്നിത്തല ഈ വഴി ഉപയോഗിച്ചേക്കുമെന്ന് മുന്‍കൂട്ടി കണ്ട മാണി മുമ്പ് തന്നെ നായരെ വിളിച്ച് ഇക്കാര്യത്തില്‍ മാത്രം വിട്ടുവീഴ്ചയില്ലെന്ന് അറിയിച്ചിരുന്നതായാണ് സൂചന. എന്നാല്‍ എങ്ങനെയും ചെന്നിത്തല തന്നെ സംരക്ഷിക്കുമെന്ന പ്രതീക്ഷയിലാണ് ജോര്‍ജ്ജ് ഇപ്പോഴും. മുഖ്യമന്ത്രി ഉമ്മന്‍ ചാണ്ടിയും ജോര്‍ജ്ജിനെ കൈവിട്ടതോടെയാണ് പെരുന്നയിലെത്തി സുകുമാരന്‍ നായരെ പിടിക്കാന്‍ ചെന്നിത്തല തീരുമാനിച്ചത്. 
അതിനിടെ അനേകംപേര്‍ ജോര്‍ജ്ജിനുവേണ്ടി ശുപാര്‍ശയുമായി മാണിയെ സമ്മര്‍ദ്ദത്തിലാക്കുന്നുണ്ട്. ഐ ഗ്രൂപ്പ് നേതാക്കളാണ് മുന്നില്‍. ബാര്‍കോഴ കേസ് മുറുക്കുമെന്ന ഭീഷണി മുതല്‍ ജോസ് കെ മാണിയെ സരിതയുമായി ബന്ധപ്പെടുത്തി വിവാദം സൃഷ്ടിക്കുമെന്നുവരെ ഭീഷണിയുണ്ട്. ഫെനി ബാലകൃഷ്ണന്‍ അനേകംപേരെക്കുറിച്ച് പറയുന്ന ഒരു ഫോണ്‍ സന്ദേശത്തില്‍ ജോസ് കെ മാണിയുടെ പേരും ഉണ്ടെന്നാണ് ഇവരുടെ അവകാശവാദം. ഒട്ടേറെ കോണ്‍ഗ്രസ് നേതാക്കളുടെയും മന്ത്രിമാരുടെയും അനധികൃത ഇടപാടുകളുടെ വിവരങ്ങള്‍ കൈവശമുള്ള ജോര്‍ജ്ജിനെ പിണക്കേണ്ടെന്ന നിലപാടിലാണ് കോണ്‍ഗസ് നേതാക്കളില്‍ പലരും.
മുഖ്യമന്ത്രിയുടെ കുടുംബവുമായി ബന്ധപ്പെട്ട ചില വെളിപ്പെടുത്തലുകള്‍ നടത്തുമെന്ന ഭീഷണി ജോര്‍ജ്ജ് ഉയര്‍ത്തിയിട്ടുണ്ട്. ജോര്‍ജ്ജ് ഇനി നല്ല പിള്ളയായി കഴിയുമെന്നും എങ്ങനെയും പ്രശ്‌നം തീര്‍ക്കണമെന്നും ആവശ്യപ്പെട്ടാണ് ധാരാളം കോണ്‍ഗ്രസ് നേതാക്കള്‍ മാണിയുമായി അടുത്ത വൃത്തങ്ങളെ ബന്ധപ്പെട്ട് വരുന്നത്. 
ബാര്‍ കോഴ വിവാദത്തിലും പിസി ജോര്‍ജ്ജ് വിഷയത്തിലും ഉറച്ച നിലപാട് എടുത്തപ്പോള്‍ അണികള്‍ക്കിടയിലുണ്ടായ ആവേശമാണ് മാണിയെ പിന്നോട്ട് പോകുവാന്‍ ബുദ്ധിമുട്ടിക്കുന്നത്. ഇതുവരെ മിണ്ടാതിരുന്ന മാണിക്ക് നഷ്ടമായ മാനം ഇപ്പോള്‍ തിരിച്ചു വരുന്നു എന്നും ഇനി പിന്നോട്ടുപോയാല്‍ കേരളാ കോണ്‍ഗ്രസിനു വന്‍ ഭീഷണിയായേക്കുമെന്നാണ് മാണിയുടെ വിലയിരുത്തല്‍. അതുകൊണ്ടുതന്നെ ചീഫ് വിപ്പ് സ്ഥാനത്തുനിന്നും പുറത്താക്കുന്ന കാര്യത്തില്‍ യാതൊരു വിട്ടുവീഴ്ചക്കും ഇല്ലെന്ന് മാണി തറപ്പിച്ചു പറയുന്നു. യുഡിഎഫില്‍ തുടരുന്നതടക്കമുള്ള കാര്യങ്ങളെക്കുറിച്ച് മാണി ചര്‍ച്ചയ്ക്ക് തയ്യാറാണ്. എന്നാല്‍ തിങ്കളാഴ്ച തന്നെ നടപടി വേണമെന്ന വാശിയിലാണ്. മാണിയുടെ നിലപാടിനോട് മുഖ്യമന്ത്രിക്കും യോജിപ്പാണ്. ചെന്നിത്തലയെ എങ്ങനെയും അനുനയിപ്പിക്കാനുള്ള ശ്രമം മുഖ്യമന്ത്രി തന്നെ ഏറ്റെടുത്തിരിക്കുകയാണ്. 
ഈസ്റ്റര്‍ വരെ ധ്യാനത്തിലാണ് മാണി. അതുകൊണ്ട് തന്നെ വലിയ രാഷ്ട്രീയ ചര്‍ച്ചകള്‍ക്കൊന്നും ധനമന്ത്രിയെ കിട്ടുന്നുമില്ല. നാളെ ഉച്ചയ്ക്ക് ശേഷം മാണിയുമായി മുഖ്യമന്ത്രി സംസാരിക്കും. തന്റെ നിലപാടുകളും അറിയിക്കും. ഏതായാലും ജോര്‍ജിനെ ചീഫ് വിപ്പ് സ്ഥാനത്ത് നിന്ന് മാറ്റുമെന്ന് മുഖ്യമന്ത്രി തീരുമാനിച്ചു കഴിഞ്ഞു. അത് മാണിക്കുമറിയാം. മറ്റു വിഷയങ്ങളിലാകും ചര്‍ച്ച. ജോര്‍ജിനെ യുഡിഎഫുമായി എങ്ങനെ സഹകരിപ്പിക്കാമെന്നാകും ആലോചന. ഏതായാലും സെക്യുലര്‍ പുനര്‍ജീവിപ്പിച്ച് മുന്നണിയില്‍ ഘടക കക്ഷിയാകാനുള്ള ജോര്‍ജിന്റെ നീക്കം ഫലിക്കില്ല. തല്‍ക്കാലം കേരളാ കോണ്‍ഗ്രസിന്റെ ഭാഗമായി എംഎല്‍എയായി ജോര്‍ജിന് തുടരാമെന്നാണ് മാണിയുടെ നിലപാട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha