ബാര് കോഴക്കേസില് അടുത്തമാസം കുറ്റപത്രം, ബാറുടമകളും ബിജുരമേശും മൊഴിമറ്റിയാല് കേസ് തോല്ക്കും
ബാര് കോഴക്കേസില് മെയ് ആദ്യം കുറ്റപത്രം സമര്പ്പിക്കും. ഇതിന്റെ മുന്നോടിയായാണ് വിജിലന്സിന്റെ ആവശ്യപ്രകാരം ബിജു രമേശിന്റെ മൊഴി മജിസ്ട്രേറ്റ് മുന്പാകെ രേഖപ്പെടുത്തിയത്. മജിസ്ട്രേറ്റിനു നല്കിയ മൊഴിയുടെ അടിസ്ഥാനത്തിലും അന്വേഷണം ഉണ്ടാകും.
2014 ഏപ്രില് രണ്ടാം തീയതി മന്ത്രിക്ക് കോഴ നല്കിയതിന് ദൃക്സാക്ഷിയുണ്ടെന്നാണ് വിജിലന്സ് കണ്ടെത്തിയത്. കഴിഞ്ഞ വര്ഷം മാര്ച്ച് 20 നും, ഏപ്രില് മൂന്നിനുമിടക്കായി മൂന്ന് ഗഡുക്കളായി കോഴ നല്കിയെന്നതിനും തെളിവുകള് ശേഖരിച്ചിരുന്നു. ബാറുടമകള് മൊഴിമാറ്റിയത് കൊണ്ട് പ്രാഥമികാന്വേഷണത്തില് കണ്ടെത്തിയ തെളിവുകള് അപ്രസക്തമായെന്ന് ചൂണ്ടിക്കാട്ടി കേസവസാനിപ്പിച്ചാല് അന്വേഷണ ഉദ്യോഗസ്ഥര് തീരാത്ത നിയമക്കുരുക്കുകളില് പെടും. ഇക്കാര്യത്തില് ലളിതാകുമാരി കേസില് സുപ്രീംകോടതിയുടെ കര്ശനമായ മാര്ഗനിര്ദേശങ്ങളുമുണ്ട്.
കേസ് റജിസ്റ്റര് ചെയ്യുന്നതിന് മുന്പ് വിജിലന്സ് നടത്തിയ പ്രാഥമികാന്വേഷണത്തില് തന്നെ സര്ക്കാരിന്റെ അബ്കാരി നയവുമായി ബന്ധപ്പെട്ട് കോഴക്ക് സ്ഥിരീകരണമുണ്ട്. പണം നല്കിയതിനും വാങ്ങിയതിനുമുള്ള തെളിവ് പ്രാഥമികാന്വേഷണത്തില് തന്നെ കണ്ടെത്തിയിരുന്നു. ബാറുടമകളുടെ മിനിറ്റ്സിലെ തെളിവുകള്ക്ക് പുറമെ പണം നല്കുന്നതിന് ദൃക്സാക്ഷിയുണ്ടെന്നും അന്വേഷണ റിപ്പോര്ട്ട് വ്യക്തമാക്കുന്നുണ്ട്.
വിജിലന്സ് ശേഖരിച്ച തെളിവുകളെ പ്രധാനമായും പിന്തുണക്കേണ്ടത് ബിജു രമേശിന്റെ മൊഴിയാണ്. മറ്റ് ബാറുടമകളെ പോലെ ഏതെങ്കിലും സാഹചര്യത്തില് ബിജു രമേശും മൊഴി മാറ്റിയാല് കേസ് തോല്ക്കും. എഫ്ഐആര് റജിസ്റ്റര് ചെയ്ത വിജിലന്സിന്റെ നടപടി വിമര്ശനവിധേയമാവുകയും ചെയ്യും. ഇതൊഴിവാക്കാനും, കുറ്റപത്രത്തിന് ഉറപ്പുണ്ടാക്കാനുമാണ് ബിജു രമേശിന്റെ മൊഴി മജിസ്ട്രേറ്റ് മുന്പാകെ രേഖപ്പെടുത്തണമെന്ന് വിജിലന്സ് തന്നെ ആവശ്യപ്പെട്ടതും, രേഖപ്പെടുത്തിയതും. രഹസ്യമൊഴിയിലെ വിവരങ്ങളുടെ കൂടെ അടിസ്ഥാനത്തില് കൂടുതല് അന്വേഷണം നടത്തിയ ശേഷമാകും അടുത്ത മാസം ആദ്യത്തോടെ കുറ്റപത്രം സമര്പ്പിക്കുക.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha