മാണിയുടെ വിരട്ടലില് മുഖ്യമന്ത്രി വീണു, പിസി ജോര്ജ്ജിനോട് ചിഫ് വിപ്പ്സ്ഥാനമൊഴിയാന് നിര്ദ്ദേശിച്ച് ഉമ്മന്ചാണ്ടി
സര്ക്കാര് ചീഫ് വിപ്പ് സ്ഥാനം ഒഴിയാന് പി സി ജോര്ജ്ജിനോട് മുഖ്യമന്ത്രി ഉമ്മന് ചാണ്ടി ആവശ്യപ്പെട്ടു. കേരളാ കോണ്ഗ്രസ് ചെയര്മാന് കെ എം മാണി നിര്ബന്ധത്തിന് വഴങ്ങിയാണ് ജോര്ജ്ജിനോട് സ്ഥാനം ഒഴിയാന് മുഖ്യമന്ത്രി ആവശ്യപ്പെട്ടത്. ഇന്നലെയും ഇന്നുമായി നടന്ന ചര്ച്ചകള്ക്കൊടുവിലാണ് മുഖ്യമന്ത്രി ജോര്ജ്ജിന് സ്ഥാനം ഒഴിയേണ്ടി വരുമെന്ന വ്യക്തമായ നിര്ദ്ദേശം നല്കിയത്.ഇന്ന് വൈകുന്നേരം യുഡിഎഫ് യോഗത്തിന് ശേഷം ജോര്ജ്ജിനെ പുറത്താക്കിക്കൊണ്ടുള്ള തീരുമാനം ഉമ്മന് ചാണ്ടി പ്രഖ്യാപിക്കുമെന്നാണ് അറിയുന്നത്. അതേസമയം മാണി അനുനയത്തിന് വഴങ്ങിയാല് തീരുമാനം വൈകാനും സാധ്യതയുണ്ട്. മാണിയുമായും ജോര്ജുമായും ഇതിന് മുമ്പ് ഒരു വട്ടം കൂടി മുഖ്യമന്ത്രി ആശയ വിനിമയം നടത്താന് ശ്രമിക്കുന്നുണ്ട്.
അതേസമയം സ്ഥാനം ഒഴിയാന് പറ്റില്ലെന്ന നിലപാടില് ജോര്ജ്ജും നിലപാട് മയപ്പെടുത്താതെ കെ എം മാണിയും തുടരുന്നതോടെ യുഡിഎഫിനകത്തെ സംഘര്ഷത്തിന് യാതൊരു അയവും സംഭവിച്ചിട്ടില്ല.
പുതിയ പാര്ട്ടി രൂപീകരിക്കാന് യുഡിഎഫ് അനുവദിക്കണമെന്ന് ചീഫ് വിപ്പ് പി സി ജോര്ജ്ജ് ഒരു ചാനലിന് നല്കിയ അഭിമുഖത്തില് ആവശ്യപ്പെട്ടു. താനടക്കമുള്ള ജനപ്രതിനിധികളെ കൂറുമാറ്റ നിരോധന നിയമത്തില് നിന്ന് സംരക്ഷിക്കാന് മുന്നണി നേതൃത്വം തയ്യാറാകണമെന്നും അദ്ദേഹം ആവശ്യപ്പെട്ടു. ഇതിന് തയ്യാറായില്ലെങ്കില് ചീഫ് വിപ്പ് സ്ഥാനം ഒഴിയില്ലെന്നും പി സി ജോര്ജ്ജ് പറഞ്ഞു.
നിബന്ധനകള് അംഗീകരിച്ചില്ലെങ്കില് ചീഫ് വിപ്പ് സ്ഥാനം ഒഴിയില്ലെന്ന് ജോര്ജ്ജ് വ്യക്തമാക്കി. യുഡിഎഫിന് തന്നെ പുറത്താക്കാം. രാജ്യസഭാ തിരഞ്ഞെടുപ്പില് യുഡിഎഫിന് വോട്ട് ചെയ്യണമെന്നാണ് ആഗ്രഹം. വോട്ടിന്റെ നിയമപ്രശ്നമൊന്നും പറയേണ്ട, യുഡിഎഫിന് നാണക്കേട് ഉണ്ടാകാതിരിക്കട്ടെ. പറയാനുള്ളത് മാണി തന്നോട് നേരിട്ട് പറയണമെന്ന് പി സി ജോര്ജ്ജ് പറഞ്ഞു. സ്ഥാനത്തുനിന്ന് നീക്കുമെന്ന ഭീഷണി വിലപ്പോകില്ലെന്ന് പി സി ജോര്ജ്ജ് പറഞ്ഞു. രാജി വയ്ക്കണമെന്ന് പറയാന് മാണിക്ക് അവകാശമില്ല. യുഡിഎഫ് വോട്ട് വാങ്ങി ജയിച്ച താന് അഞ്ചു കൊല്ലവും മുന്നണിയുടെ ഭാഗമായിരിക്കുമെന്നും പി സി ജോര്ജ്ജ് പറഞ്ഞു.
യുഡിഎഫിനും കേരള കോണ്ഗ്രസ് നേതൃത്വത്തിനും തലവേദനയുണ്ടാക്കുന്ന പ്രസ്താവനകളും നടപടികളും നിരന്തരമായി ജോര്ജ് നടത്തുന്നു എന്നു ചൂണ്ടിക്കാട്ടിയാണ് അദ്ദേഹത്തെ ചീഫ് വിപ്പ് പദത്തില് നിന്നു മാറ്റാന് മാണി ആവശ്യപ്പെട്ടത്. എന്നാല് അതിനു തുനിഞ്ഞാല് കടുത്ത നീക്കങ്ങള്ക്കു മുതിരുമെന്ന സൂചന ജോര്ജും നല്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha