അധ്യാപകന്റെ കൈവെട്ടല്: വിധി പറയല് മാറ്റിവച്ചു
മതനിന്ദ ആരോപിച്ച് അധ്യാപകന്റെ കൈപ്പത്തി വെട്ടിയ കേസില് വിധി പറയുന്നത് എറണാകുളം എന്ഐഎ കോടതി മാറ്റി. 37 പ്രതികളുള്ള കേസില് ദേശീയ അന്വേഷണ ഏജന്സി (എന്ഐഎ) ആണ് കുറ്റപത്രം സമര്പ്പിച്ചത്. കേസില് ചില കാര്യങ്ങളില് കൂടി വ്യക്തത വരുത്താനുണ്ടെന്ന് കോടതി നിരീക്ഷിച്ചു. ഇരു ഭാഗത്തുനിന്നും കോടതി വിശദീകരണം തേടും. വിശദീകരണം ലഭിച്ചശേഷം വിധി പറയുന്ന ദിവസം തീരുമാനിക്കുമെന്നും കോടതി അറിയിച്ചു. 2010 ജൂലൈ നാലിനാണ് തൊടുപുഴ ന്യൂമാന് കോളേജിലെ അധ്യാപകനായിരുന്ന പ്രൊഫ. ടി ജെ ജോസഫിന്റെ കൈപ്പത്തി പോപ്പുലര് ഫ്രണ്ട് പ്രവര്ത്തകര് വെട്ടിമാറ്റിയത്. മൂവാറ്റുപുഴയില് ജോസഫിന്റെ വീടിന് സമീപത്തായിരുന്നു കേരളത്തെ നടുക്കിയ ആക്രമണം.
പള്ളിയില്നിന്ന് മടങ്ങുകയായിരുന്ന ജോസഫിനെ അമ്മയുടെയും ഭാര്യയുടെയും മുന്നിലിട്ടാണ് ആക്രമിച്ചത്. െ്രെകംബ്രാഞ്ച് എസ് പി ഉണ്ണിരാജയുടെ നേതൃത്വത്തില് പ്രത്യേകസംഘത്തിന്റെ അന്വേഷണം പുരോഗമിക്കുന്നതിനിടെ ഭീകരവാദവുമായി ബന്ധപ്പെട്ട നാലു കേസുകള്ക്കൊപ്പം ഈ കേസും ആഭ്യന്തര സുരക്ഷാ അന്വേഷണ ഏജന്സിക്ക് (ഐഎസ്ഐടി) കൈമാറി. പിന്നീട് കേന്ദ്ര ആഭ്യന്തരമന്ത്രാലയത്തിന്റെ ഉത്തരവിനെത്തുടര്ന്ന് എന്ഐഎക്ക് കൈമാറി. അശമന്നൂര് നൂലേലിക്കര മുടശേരി വീട്ടില് സവാദ് (27) ആണ് കേസിലെ ഒന്നാം പ്രതി. സവാദ്, നാലാംപ്രതി സജില്, 28ാം പ്രതി എം കെ നാസര്, 30, 31, 33 പ്രതികളായ ഷഫീഖ്, നജീബ്, അസീസ് എന്നിവര് ഒളിവിലാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha