ഒന്നര വര്‍ഷത്തോളമായി ചര്‍ച്ച ചെയ്തിരുന്ന സ്വന്തം കത്തുമായി സരിത രംഗത്ത്. ഇപ്പോള്‍ പ്രചരിക്കുന്ന കത്തും എന്റെ കത്തുമായി ഒരു ബന്ധവുമില്ലെന്ന് സരിത എസ് നായര്‍. ജോസ് കെ മാണിയുടെ പേര് കത്തില്‍ പരാമര്‍ശിക്കുന്നില്ലെന്നും സരിത തിരുവനന്തപുരത്ത് വാര്‍ത്താസമ്മേളനത്തില്‍ പറഞ്ഞു. രാഷ്ട്രീയ പ്രത്യാഘാതം ഭയന്ന് താന്‍ കത്തു പുറത്തുവിടുന്നില്ലെന്നും സരിത പറഞ്ഞു.
30 പേജുള്ള കത്താണ് താന്‍ എഴുതിയത്. ഇപ്പോള്‍ പ്രചരിക്കുന്ന കത്തിന് സത്യവുമായി ബന്ധമില്ല. ചാനല്‍ റേറ്റിങ് കൂട്ടാനായി നടത്തുന്ന നടപടികളാണ് ഇപ്പോള്‍ നടക്കുന്നത്. തന്റെ കൈയക്ഷരം കോപ്പിയടിച്ചാണ് വ്യാജ കത്ത് എഴുതിയിരിക്കുന്നത്. തന്റെ പേരു ചൂഷണം ചെയ്യുകയാണെന്നും സരിത പറഞ്ഞു.
തന്റെ ജീവിതാനുഭവം മാത്രമാണ് കത്തില്‍ ഉള്ളത്. അബ്ദുള്ളക്കുട്ടിക്കെതിരെ പരാതി നല്‍കിയ കത്ത് വേറൊരാളെക്കൊണ്ടാണ് എഴുതിച്ചത്. ഈ കത്തിലെ അക്ഷരം കോപ്പിയടിച്ചാണ് ഇപ്പോള്‍ പുറത്തുവന്നിരിക്കുന്ന കത്ത് എഴുതിയത്. പി സി ജോര്‍ജിനെ കണ്ടത് നാലുമാസം മുമ്പാണ്. ബ്ലാക് മെയില്‍ രാഷ്ട്രീയത്തിനുള്ള പുറപ്പാടാണ് ജോര്‍ജിന്റേത് എന്നു കണ്ടപ്പോള്‍ താന്‍ പിന്മാറുകയായിരുന്നു.
കത്തിന്റെ യാഥാര്‍ഥ്യം തെളിയിക്കേണ്ട ബാധ്യത തനിക്കില്ലെന്നും സരിത പറഞ്ഞു. താന്‍ എഴുതിയ കത്ത് ഉയര്‍ത്തിക്കാണിച്ചാണ് സരിത വാര്‍ത്താസമ്മേളനത്തില്‍ എത്തിയത്. പക്ഷേ, കത്ത് മാദ്ധ്യമങ്ങള്‍ക്കു കൈമാറാന്‍ സരിത തയ്യാറായില്ല.
ജോസ് കെ മാണിക്ക് ഇക്കാര്യത്തില്‍ ഒരു റോളുമില്ലെന്ന് സരിതയ്‌ക്കൊപ്പം വാര്‍ത്താസമ്മേളനത്തില്‍ പങ്കെടുത്ത അഡ്വ. ഫെനി ബാലകൃഷ്ണന്‍ പറഞ്ഞു. ഇതുവരെ സോളാര്‍ കേസുമായി ബന്ധപ്പെട്ട് ജോസ് കെ മാണിയുടെ പേര് ഉയര്‍ന്നു കേട്ടിരുന്നില്ലെന്നും ഇപ്പോഴത്തെ രാഷ്ട്രീയ സാഹചര്യത്തില്‍ മാത്രമാണ് ഈ പേരു പരാമര്‍ശിക്കപ്പെട്ടതെന്നും ഫെനി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha