ജോര്ജിനെ ഭയമില്ല... കത്ത് കിട്ടിയപ്പോള് താന് ഞെട്ടിപ്പോയി; അപ്പോള് തന്നെ ജോര്ജിനെ വിളിച്ചിരുന്നു; കത്തിലുള്ള കാര്യങ്ങളൊന്നും നേരത്തെ പറഞ്ഞിട്ടുള്ളതല്ല
പി.സി. ജോര്ജിനെ ഭയമില്ലെന്ന് മുഖ്യമന്ത്രി ഉമ്മന് ചാണ്ടി. ചീഫ് വിപ് സ്ഥാനത്തുനിന്ന് പുറത്താക്കപ്പെട്ട ശേഷം പി.സി. ജോര്ജ് മുഖ്യമന്ത്രിക്ക് അയച്ച കത്തിന്റെ കാര്യം സംസാരിക്കുകയായിരുന്നു. കത്ത് കിട്ടിയപ്പോള് താന് ഞെട്ടിപ്പോയി. അപ്പോള് തന്നെ ജോര്ജിനെ വിളിച്ചിരുന്നു. ജോര്ജ് ഇപ്പോള് ഉന്നയിച്ചിരിക്കുന്ന കാര്യങ്ങളൊന്നും നേരത്തെ പറഞ്ഞിട്ടുള്ളതല്ല. ഇന്നലെ മാണി ചര്ച്ചയ്ക്ക് തയാറായില്ലെന്നു ജോര്ജ് പറഞ്ഞത് ശരിയായില്ല. അദ്ദേഹം ഇനി ചര്ച്ചയ്ക്ക് താല്പര്യമില്ലെന്ന് അറിയിച്ചിരുന്നു. ജോര്ജിനെ പുറത്താക്കിയ നടപടിയെക്കുറിച്ച് കൂടുതല് പ്രതികരിക്കാനില്ല. കേരള കോണ്ഗ്രസ് ആവശ്യപ്പെട്ടതനുസരിച്ചാണ് ജോര്ജിനെ നീക്കിയത്. മുന്നണി സംവിധാനത്തില് ചില മര്യാദകളൊക്കെയുണ്ട്. അതാണ് താന് പാലിച്ചത്. താന് കേരളത്തിന്റെ മുഖ്യമന്ത്രിയും യുഡിഎഫ് ചെയര്മാനുമാണ്.
ഒരു പാര്ട്ടിക്ക് നല്കിയ സ്ഥാനം ആര്ക്ക് നല്കണമെന്നത് പാര്ട്ടിയാണ് തീരുമാനിക്കുക. കെ.എം. മാണിയുടെ കത്തിന്റെ അടിസ്ഥാനത്തില് ചില ചര്ച്ചകള് നടത്തിയെന്നത് സത്യമാണ്. ചീഫ് വിപ്പിനെ പുറത്താക്കിയത് മുന്നണി തീരുമാനമാണ്, അല്ലാതെ അത് മാണിയുടെ മുന്നിലെ കീഴടങ്ങല് അല്ല.
സരിതയുടെ പുതിയ കത്തിനെ കുറിച്ചും മുഖ്യമന്ത്രി പ്രതികരിച്ചു. രണ്ടു കൊല്ലം മുന്പ് നടന്ന കാര്യത്തിലെ കത്ത് എങ്ങനെ ഇപ്പോള് പുറത്തുവന്നുവെന്ന് പരിശോധിക്കണം. ബാര് കോഴക്കേസില് മാണിക്കെതിരെ തെളിവില്ലെന്ന് വീണ്ടും ഉമ്മന് ചാണ്ടി വ്യക്തമാക്കി. മാണിക്കെതിരായ അന്വേഷണത്തില് സര്ക്കാര് ഇടപെടില്ലെന്നും അദ്ദേഹം കൂട്ടിച്ചേര്ത്തു.
സര്ക്കാര് വിവാദങ്ങളുടെ പുറകേ പോവില്ലെന്നും ഇതുവരെ ഭരണത്തില് ഒരു തരത്തിലുള്ള വീഴ്ചയും ഉണ്ടായിട്ടില്ലെന്നും മുഖ്യമന്ത്രി പറഞ്ഞു. യുഡിഎഫിനെ നല്ല നിലയില് മുന്നോട്ടു കൊണ്ടുപോവുകയെന്നത് വലിയ ഉത്തരവാദിത്വമാണ്. സര്ക്കാര് എല്ലാ ജോലിയും ചെയ്യുന്നുണ്ട്. ഭരണ സ്തംഭനം എന്നത് തെറ്റാണ്. ഏതു കാര്യത്തിലാണ് വീഴ്ചവരുത്തിയതെന്ന് ആരോപണം ഉന്നയിക്കുന്നവര് തെളിയിക്കട്ടേ. വിവാദങ്ങള് മാത്രം മതിയെന്ന് ആരെങ്കിലും വിചാരിച്ചാല് അതിനു പുറകേ പോവില്ല. ഞങ്ങള് ഞങ്ങളുടെ കടമകള് ചെയ്യും. വിവാദങ്ങള് എല്ലാം ആഘോഷിക്കുന്നുണ്ടല്ലാ? എന്നിട്ട് കഴിഞ്ഞ പാര്ലമെന്റ് തിരഞ്ഞെടുപ്പിന്റെ ഫലം ഓര്മയുണ്ടല്ലോ?. ജനങ്ങള് എല്ലാം കാണുണ്ട്. ജനങ്ങള്ക്കൊപ്പമുള്ള പ്രവര്ത്തനങ്ങളുമായി മുന്നോട്ടു പോവുമെന്നും മുഖ്യമന്ത്രി പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha