റയില്വേ ട്രാക്കില് കുഴഞ്ഞു വീണ വീട്ടമ്മ ട്രെയിന് തട്ടി മരിച്ചു, കണ്ട് നിന്ന യുവാക്കള് വീഡിയോ എടുത്ത് രസിച്ചു
റയില്വേ ട്രാക്കില് കുഴഞ്ഞുവീണ വീട്ടമ്മയെ ട്രെയിനിനു മുന്നില് നിന്നു രക്ഷിക്കാന് ശ്രമിക്കാത്ത യുവാക്കള്ക്കെതിരെ പ്രതിഷേധം. റയില്വേ ട്രാക്കില് കുഴഞ്ഞുവീണ ലൈലാ തങ്കച്ചന് എന്ന വീട്ടമ്മയെ രക്ഷിക്കാതെ ആദൃശ്യം മൊബൈലില് പകര്ത്താനായിരുന്നു യുവാക്കള്ക്ക് താല്പര്യം.
മുട്ടമ്പലം പുതുപ്പറമ്പില് പി.കെ. തങ്കച്ചന്റെ ഭാര്യ ലൈല തങ്കച്ചനാണു (47) പരശുറാം എക്സ്പ്രസ് തട്ടി മരിച്ചത്.
ഇന്നലെ വൈകിട്ടു മൂന്നരയോടെ കോട്ടയം നഗരത്തിലെ മുട്ടമ്പലത്താണു സംഭവം. സര്ക്കാര് ക്വാര്ട്ടേഴ്സ് ഭാഗത്തേക്കു പോകുന്നതിനായി ട്രാക്കില് കൂടി നടക്കുകയായിരുന്നു ലൈല. സ്റ്റേഷനില് നിന്ന് അടുത്തായതിനാല് ട്രെയിന് വേഗം കുറച്ചാണ് ഓടിയിരുന്നത്. ഗേറ്റ് കീപ്പറുടെ ക്യാബിനു നാല്പതു മീറ്ററോളം ദൂരെ ട്രാക്കിനു നടുവിലായി ലൈല കുഴഞ്ഞുവീണു. ഈ സമയം ട്രെയിന് ഗേറ്റ് കീപ്പറുടെ ക്യാബിനു സമീപം എത്തിയിരുന്നു.
ലൈല വീഴുന്നതു കണ്ട ഗേറ്റ് കീപ്പര് തോമസ് സെബാസ്റ്റ്യന് ചുവപ്പുകൊടി ഉയര്ത്തി എന്ജിന് െ്രെഡവര്ക്ക് അപായ സിഗ്നല് നല്കി. ലൈലയോടു മാറാന് വിളിച്ചു പറയുകയും ചെയ്തു. എന്നാല്, കുഴഞ്ഞു വീണ ലൈലയെ ഇടിച്ചശേഷമാണു ട്രെയിന് നിന്നത്. ഈ സമയം അവിടെ നിന്ന രണ്ടു യുവാക്കള് അപകടദൃശ്യങ്ങള് പകര്ത്തുകയായിരുന്നുവെന്നു തോമസ് സെബാസ്റ്റ്യന് പറഞ്ഞു. ഇവര് ലൈലയെ പിടിച്ചെഴുന്നേല്പ്പിച്ചിരുന്നെങ്കില് ദുരന്തം ഒഴിവാകുമായിരുന്നു.
ട്രെയിന് നിര്ത്താന് സിഗ്നല് കാട്ടുന്നതു മുതലുള്ള രംഗങ്ങള് യുവാക്കള് മൊബൈലില് പകര്ത്തി. ഇവ സോഷ്യല് മീഡിയയില് വൈറലാകുമോയിരിക്കും. പക്ഷേ നഷ്ടപ്പെട്ട വീട്ടമ്മയുടെ ജീവിതം അതിലേറെ പ്രധാനപ്പെട്ടത് തന്നെയായിരുന്നു. ഓടിയെത്താന് പറ്റുന്ന ദൂരത്തായിരുന്നില്ല വീട്ടമ്മയെന്നും യുവാക്കള് നിന്നിടത്തു നിന്നു കൂടുതല് അടുത്തായിരുന്നതിനാല് അവര്ക്കു രക്ഷിക്കാമായിരുന്നുവെന്നും തോമസ് സെബാസ്റ്റ്യന് പറയുമ്പോഴാണ് ഈ യുവാക്കളുടെ തെറ്റിന്റെ വ്യാപ്തി വലുതാകുന്നത്.
ഈസ്റ്റ് പൊലീസ് മൃതദേഹം മെഡിക്കല് കോളജ് ആശുപത്രി മോര്ച്ചറിയിലേക്കു മാറ്റി. സംസ്കാരം ഇന്നു നാലിനു മുട്ടമ്പലം എസ്എന്ഡിപി ശ്മശാനത്തില്. മക്കള്: ലയ, സോയാ, വൈശാഖ്. മരുമക്കള്: സന്തോഷ് (ചങ്ങനാശേരി), സജി (വടശേരിക്കര). കോട്ടയം റയില്വേ ഗുഡ്ഷെഡിലെ തൊഴിലാളിയും ബിഎംഎസ് നേതാവുമാണു ലൈലയുടെ ഭര്ത്താവ് തങ്കച്ചന്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha