സോളാര് കേസില് രണ്ടാംഘട്ട സമരം ഉടനുണ്ടാകുമെന്ന് വി.എസ്, ഗൗരിയമ്മ എല്ഡിഎഫിലേയ്ക്കു വരുന്നതു സ്വാഗതാര്ഹമാണ്
സോളാര് വിഷയത്തില് രണ്ടാംഘട്ട സമരം ഉടനുണ്ടാകുമെന്നു പ്രതിപക്ഷ നേതാവ് വി.എസ്. അച്യുതാനന്ദന് പറഞ്ഞു. ഇടതുമുന്നണി ഇതു സംബന്ധിച്ച് ആലോചിച്ചു തീരുമാനമെടുക്കും. സരിതയുടെ കത്ത് സംബന്ധിച്ച് അന്വേഷണം നടത്തണം. കത്തില് യുവ എംഎല്എമാരുടെ പേരുകളും ഉണ്ട്. ഇതും അന്വേഷിക്കണമെന്നും വി.എസ്. ആവശ്യപ്പെട്ടു. ഗൗരിയമ്മ എല്ഡിഎഫിലേയ്ക്കു വരുന്നതു സ്വാഗതാര്ഹമാണെന്നും വി.എസ്. പറഞ്ഞു.
സോളാര്കേസ് പ്രതി സരിത എസ് നായരുടെ കത്തിനെക്കുറിച്ച് ക്രൈംബ്രാഞ്ച് അന്വേഷിക്കുമെന്നും ഡിജിപി വ്യക്തമാക്കി. വിവിധ രാഷ്ടീയ നേതാക്കള്ക്കെതിരെ ഗുരുതര ലൈംഗിക ആരോപണങ്ങള് ഉള്ക്കൊള്ളുന്ന സരിത എസ് നായരുടെ കത്ത് അന്വേഷിക്കണമെന്ന് നേരത്തെ തന്നെ ആവശ്യമുയര്ന്നിരുന്നു. ജോസ് കെ മാണി എംപി ഡിജിപിക്ക് നല്കിയ പരാതിയിലാണ് ക്രൈം ബ്രാഞ്ചിന് അന്വേഷണ ചുമതല നല്കിയത്.
സരിതയുടെ കത്ത് രാഷ്ട്രീയപരമായും അല്ലാതെയും വളരെയധികം വിവാദം ഉന്നയിച്ചിരുന്നു. നിരവധി രാഷ്ടീയക്കാര്ക്കും മന്ത്രിമാര്ക്കുമെതിരെയായിരുന്നു കത്തില് പ്രധാന ആരോപണം.സരിത എസ് നായര് മാധ്യമങ്ങള്ക്ക് മുന്നില് പ്രദര്ശിപ്പിച്ച കത്തില് കെ.സി. വേണുഗോപാല്, പി.സി. വിഷ്ണുനാഥ്, അടുര് പ്രകാശ്, ഹൈബി ഈഡന്, ആര്യാടന് മുഹമ്മദ്, ജോസ് കെ മാണി തുടങ്ങിയ യുഡിഎഫ് നേതാക്കളുടെ പേരുകളും നടന് മോഹന്ലാലിന്റെ പേരും പരാമര്ശിച്ചിരുന്നു. ഈ സാഹചര്യത്തിലാണ് കത്തിന്റെ ഉറവിടം അന്വേഷിക്കണമെന്നും ഇതിന്റെ നിജസ്ഥിതി അന്വേഷിക്കണമെന്നും ആവശ്യപ്പെട്ട് ജോസ് കെ മാണി എംപി പരാതി നല്കിയത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha