ഹൈക്കോടതിയിലെ ആറ് ജഡ്ജിമാര് ഒരേ ക്ലാസ്റൂമിലെ സഹപാഠികള്
കോളേജിലെ പുലികള് ഹൈക്കോടതിയില് ഒന്നിച്ചു. എറണാകുളം ലോകോളേജിലെ 1979 ബാച്ച് വിദ്യാര്ഥികളായിരുന്ന ആറുപേരാണ് ഹൈക്കോടതിയില് ജഡ്്ജിമാരായി എത്തിയത്. പഴയ ക്ലാസ് മുറിയില് ബെഞ്ച് മേറ്റ്സായിരുന്ന അവര് ആറു പേരും ഇനിയും ബെഞ്ച് മേറ്റ്സായിരിക്കും. കേരള ഹൈക്കോടതിയിലെ ഡിവിഷന് ബെഞ്ചിലും സിംഗിള്ബെഞ്ചിലെയും പുലുകളായിരിക്കുമര് ഇനി.
ജസ്റ്റിസ് ബി. സുധീന്ദ്രകുമാര് ഇന്നലെ സത്യപ്രതിജ്ഞ ചെയ്തതോടെ ചരിത്രത്തിലാദ്യമായി ഒരേ ക്ലാസ് മുറിയില് നിന്ന് ആറ് ജഡ്ജിമാരെയാണ് കേരള ഹൈക്കോടതിക്ക് ലഭിച്ചത്. ജസ്റ്റിസ് പി.ആര്. രാമചന്ദ്ര മേനോന്, ജസ്റ്റിസ് വി.കെ. മോഹനന്, ജസ്റ്റിസ് പി. വി. ആശ, ജസ്റ്റിസ് എ.എം. ഷെഫീഖ്, ജസ്റ്റിസ് സി.കെ. അബ്ദുള് റഹീം എന്നിവരാണ് മറ്റു ജഡ്ജിമാര്. ഇവര് എല്ലാവരും എറണാകുളം ഗവണ്മെന്റ് ലാ കോളേജിലെ 1979 -1982 ബാച്ചില് നിന്നുള്ളവരാണ്. ഇന്നലെ സഹപാഠിയായ സുധീന്ദ്ര കുമാറിന്റെ സത്യപ്രതിജ്ഞയ്ക്ക് ഏറെ കൗതുകത്തോടെയും സന്തോഷത്തോടെയുമാണ് പഴയ സഹപാഠികള് അഞ്ചുപേരും പങ്കെടുത്തത്. സത്യപ്രതിജ്ഞയ്ക്കു ശേഷം പഴയ ഓര്മ്മകള് പുതുക്കിയ ഇവര് ഒരുമിച്ച് നിന്നൊരു ഫോട്ടോയുമെടുത്തു, പഴയ കോളേജു കാലത്തെ ഓര്മ്മകള്ക്കൊപ്പം ചേര്ത്തു വെക്കാന്.
എറണാകുളം ഗവ. ലാ കോളേജിലെ 1979 -1982 ബാച്ചിലെ മിടുക്കരുടെ പട്ടിക ഈ ആറുപേരില് ഒതുങ്ങുന്നില്ല. ആന്റോ ആന്റണി എം.പി, മുന് എം.എല്.എയും കാര്ട്ടൂണിസ്റ്റുമായ അഡ്വ. എം.എം. മോനായി, എറണാകുളം ഗവ. ലാ കോളേജിന്റെ ഇപ്പോഴത്തെ പ്രിന്സിപ്പല് ഡോ. ലൗലി ജയിംസ്, ഭര്ത്താവ് ഐ.എ.എസ് ഉദ്യോഗസ്ഥന് കൂടിയായ ജയിംസ്, കെ.ജി. രാജു ഐ.എ.എസ്, ഐ.പി.എസ് ഉദ്യോഗസ്ഥനായ രാമചന്ദ്രന്, അഡീഷണല് പ്രോസിക്യൂഷന് ഡയറക്ടര് ജനറല് അബ്ദുള് റഷീദ് ഇങ്ങനെ 29 പേരാണ് ഒരു ക്ളാസ് മുറിയില് നിന്ന് വിവിധ മേഖലകളില് കഴിവു തെളിയിച്ചത്. മൂന്ന് ജില്ലാ ജഡ്ജിമാരും ഇക്കൂട്ടത്തിലുണ്ട്.
ഇവരെല്ലാം ഒത്തുകൂടാനൊരുങ്ങുകയാണ്. സഹപാഠിയായ സുധീന്ദ്ര കുമാറിന്റെ സ്ഥാനാരോഹണവും ലൗലി ജയിംസിന്റെ വിരമിക്കലും ഒരുമിച്ച് ആഘോഷിക്കാനൊരു ഒത്തുചേരല്. പലരും പല തീയതികളും പരസ്പരം അറിയിച്ചു കഴിഞ്ഞു. എല്ലാവര്ക്കും ഒത്തുചേരാന് ഒരു ദിവസം കണ്ടെത്താനുള്ള തിരക്കിലാണ് ആന്റോ ആന്റണി എം.പി ഉള്പ്പെടെയുള്ളവര്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha