സരിതയുടെ കത്തിലെ രഹസ്യങ്ങള് വെളിപ്പെടുത്തി പിള്ള മുഖ്യമന്ത്രിക്കെതിരെ രംഗത്ത്; തോമസ് കുരുവിള ആരെന്ന ചോദ്യം വീണ്ടും ഉയരുന്നു
സരിത ശ്രീധരന് നായരുമൊത്ത് മുഖ്യമന്ത്രിയെ കണ്ടെന്നതടക്കം സരിതയുടെ കത്തിലെ ഞെട്ടിക്കുന്ന വെളിപ്പെടുത്തലുകളുമായി ബാലകൃഷ്ണ പിള്ള രംഗത്ത്. സോളാര് കമ്മിഷന് മുന്പാകെ മൊഴി നല്കിയശേഷം മാദ്ധ്യമങ്ങളോടു സംസാരിക്കുകയായിരുന്നു അദ്ദേഹം.
തോമസ് കുരുവിളയ്ക്കു സരിത 25 ലക്ഷം രൂപ നല്കിയതായി ബാലകൃഷ്ണ പിള്ള വെളിപ്പെടുത്തി. ഡല്ഹിയില്വച്ച് 15 ലക്ഷം രൂപയും തിരുവനന്തപുരത്തുവച്ച് 10 ലക്ഷവും കൈമാറി. എറണാകുളം ജില്ലയിലെ എംഎല്എയ്ക്ക് സരിത അഞ്ചു ലക്ഷം കൊടുത്തുവെന്നും പിള്ള പറഞ്ഞു. ശ്രീധരന് നായരുമൊത്ത് സരിത സെക്രട്ടേറിയറ്റില് മുഖ്യമന്ത്രിയെ കണ്ടതായി കത്തിലുണ്ടെന്നും ബാലകൃഷ്ണ പിള്ള പറഞ്ഞു. മുഖ്യമന്ത്രിയുടെ സാന്നിധ്യത്തിലാണ് ശ്രീധരന്നായര് പണം കൈമാറിയതെന്നു സരിത കത്തില് പറഞ്ഞിട്ടുണ്ടെന്നും പിള്ള പറഞ്ഞു.
ജയിലില് വച്ചെഴുതിയ കത്തും മാദ്ധ്യമങ്ങളിലൂടെ പുറത്തുവന്ന കത്തും ഒന്നാണെന്നും കത്തിലുള്ളതും തനിക്കറിയാവുന്നതുമായ അഡല്ട്സ് ഓണ്ലി അല്ലാത്ത കാര്യങ്ങള് ജസ്റ്റിസ് ശിവരാജന് കമ്മീഷനു മുമ്പാകെ പറഞ്ഞിട്ടുണ്ടെന്നും പിള്ള പറഞ്ഞു. തനിക്കു പറയാന് കൊള്ളാവുന്നതും എന്റെയും നാടിന്റെയും സംസ്കാരത്തിന് നിരക്കുന്നതുമായ കാര്യങ്ങള് പറഞ്ഞു. വീട്ടിലും കുടുംബത്തിലും ഇരുന്നു കുട്ടികളടക്കമുള്ളവര് കാണുന്നതും അച്ചടി മാദ്ധ്യമങ്ങളിലൂടെ വായിക്കുന്നതുമാണ് ഇക്കാര്യങ്ങള്. ഇത്തരം കാര്യങ്ങള് പറയാന് തന്റെ ധാര്മികത അനുവദിക്കുന്നില്ല.
തനിക്ക് അറിയാവുന്ന കാര്യങ്ങളെല്ലാം സോളാര് കമ്മിഷനില് മൊഴിയായി നല്കിയെന്ന് പിള്ള പറഞ്ഞു. സരിത പറഞ്ഞ കത്തും താന് കണ്ട കത്തും ഒന്നാണ്. ചില മന്ത്രിമാരും നേതാക്കളും സരിതയെ പീഡിപ്പിച്ചതായി കത്തിലുണ്ട്. കത്തില് ഇക്കാര്യങ്ങള് പറയുന്നുണ്ട്. ധാര്മികതയുടെ പേരില് മറ്റു മന്ത്രിമാരുടെ പേരുകള് പറയാന് കഴിയില്ല.
സരിതയുടെ കത്ത് താന് നേരത്തെ കണ്ടിട്ടുണ്ടെന്നും എന്നാല് പി.സി ജോര്ജിന് കത്ത് കൈമാറിയത് താനല്ലെന്നും ആര് ബാലകൃഷ്ണപിള്ള മുമ്പ് വെളിപ്പെടുത്തിയിരുന്നു. ബാര് കോഴക്കേസിലെ കാര്യങ്ങള് ബിജു രമേശ് വെളിപ്പെടുത്തുന്നതിന് ഒരു മാസം മുമ്പേ തന്നെ താന് മുഖ്യമന്ത്രിയുമായി ചര്ച്ച നടത്തിയിരുന്നുവെന്നും അദ്ദേഹം പറഞ്ഞിരുന്നു. മാണിക്കെതിരായും പിള്ള നേരത്തെ ആഞ്ഞടിച്ചിരുന്നു.
തോമസ് കുരുവിളയ്ക്കു സരിത 25 ലക്ഷം രൂപ പണം കൊടുത്തു എന്നു കത്തിലുണ്ട്. ഈ തോമസ് കുരുവിള മുഖ്യമന്ത്രിയുടെ സഹായിയാണോ എന്നറിയില്ല. മുന്നണി വിട്ടതുകൊണ്ട് അധാര്മികത കാണിക്കാന് ഇല്ല. തട്ടിപ്പിന്റെ പുറകില് താനായിരുന്നെങ്കില് രണ്ടു വര്ഷം മുമ്പ് സര്ക്കാര് വീഴുമായിരുന്നു. കത്ത് ഞാന് കണ്ടതാണെന്ന് ഉമ്മന് ചാണ്ടിക്കറിയാം. അതുപയോഗിച്ച് സര്ക്കാരിനെ ബ്ലാക്ക് മെയില് ചെയ്യാന് മാത്രം ഞാന് മ്ലേച്ഛനല്ല. എംഎല്എമാരും മന്ത്രിമാരും പീഡിപ്പിച്ചെന്ന് സരിതയുടെ കത്തിലുണ്ട്.
സരിത ജയിലില് കിടക്കുമ്പോഴാണ് കത്തു തന്റെ കൈയില് കിട്ടിയത്. രണ്ടു മണിക്കൂര് മാത്രമാണ് കത്ത് കൈയിലുണ്ടായിരുന്നതെന്നും പിള്ള പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha