ഇനി വെറും പൂഞ്ഞാര് മെമ്പര്... പി സി ജോര്ജിനെ കേരള കോണ്ഗ്രസിലെ സ്ഥാനങ്ങളില് നിന്ന് സസ്പെന്ഡ് ചെയ്തു; പുറത്താക്കിയത് ചെയര്മാന്റെ അധികാരം ഉപയോഗിച്ച്
കെഎം മാണിയെ പലപ്പോഴും പാലാ മെമ്പറെന്ന് അധിഷേപിച്ചതിന് അതേ നാണയത്തില് തിരിച്ചടിയും വന്നു. പി സി ജോര്ജ് ഇനി വെറും പൂഞ്ഞാര് മെമ്പര് മാത്രം. പിസി ജോര്ജിനെ പാര്ട്ടിയുടെ എല്ലാ സ്ഥാനങ്ങളില് നിന്നും സസ്പെന്ഡു ചെയ്തതായി കേരള കോണ്ഗ്രസ് ചെയര്മാനും ധനമന്ത്രിയുമായ കെ എം മാണി പറഞ്ഞു. ചെയര്മാന്റെ പ്രത്യേക അധികാരം ഉപയോഗിച്ചാണ് നടപടി. പി സി ജോര്ജ് പാര്ട്ടിക്കെതിരെ അപവാദ പ്രചാരണം നടത്തുന്നത് പാര്ട്ടി ഗൗരവമായി കാണുന്നു. ജോര്ജിനെതിരെ നടപടിയെടുക്കണമെന്നാണ് പാര്ട്ടിക്കുള്ളില് ഉയര്ന്നുവന്ന അഭിപ്രായം. അതിനാല് ചെയര്മാന്റെ പ്രത്യേക അധികാരം ഉപയോഗിച്ച് ജോര്ജിനെ സസ്പെന്ഡു ചെയ്യുകയാണ്.
ഇപ്പോള് പാര്ട്ടി വൈസ് ചെയര്മാനാണ് ജോര്ജ്. അതില് നിന്നു മാത്രമല്ല, പാര്ട്ടിയുടെ ഏതൊക്കെ തലത്തില് അംഗമാണോ അതില് നിന്നെല്ലാം അന്വേഷണ വിധേയമായി സസ്പെന്ഡു ചെയ്യുകയാണെന്നും മാണി പറഞ്ഞു.
അംഗത്വത്തില് നിന്ന് ജോര്ജിനെ മാറ്റിയിട്ടില്ല. ഭാരവാഹിത്വത്തില് നിന്നാണ് മാറ്റിയതെന്നും മാണി വ്യക്തമാക്കി. മെയ് 30ന് പാര്ട്ടിയുടെ സ്റ്റിയറിങ് കമ്മിറ്റി കൂടാന് തീരുമാനിച്ചു. കേരള കോണ്ഗ്രസിന്റെ പ്രാഥമിക അംഗത്വത്തില് ജോര്ജ് തുടരും. അദ്ദേഹത്തോട് പ്രതികാര മനോഭാവം ഇല്ലെന്നും മാണി മാദ്ധ്യമപ്രവര്ത്തകരോട് പറഞ്ഞു.
രാജ്യസഭ തെരഞ്ഞെടുപ്പ് അടുത്തിരിക്കെ ജോര്ജിനെതിരായ നടപടി ഉണ്ടാകില്ലെന്നായിരുന്നു പൊതുവെയുള്ള വിലയിരുത്തല്. എന്നാല്, ജോര്ജിനെതിരായി നടപടി എടുക്കുന്നതില് ഇതൊന്നും കണക്കിലെടുക്കാന് കേരള കോണ്ഗ്രസ് നേതാക്കള് തയ്യാറായില്ല.
ഇന്ന് തിരുവനന്തപുരത്ത് ചേര്ന്ന കേരള കോണ്ഗ്രസ് എം ഉന്നതാധികാര സമിതി യോഗമാണ് ജോര്ജിനെ വൈസ് ചെയര്മാന് സ്ഥാനത്ത് നിന്ന് സസ്പെന്ഡ് ചെയ്യാന് തീരുമാനിച്ചത്.
എന്നാല് പാര്ട്ടി ഭരണഘടന അനുസരിച്ച് തനിക്കെതിരെ നടപടിയെടുക്കാന് കെ എം മാണിക്ക് അധികാരമില്ലെന്നാണ് പി സി ജോര്ജ് പറഞ്ഞത്. കോട്ടയത്ത് നടത്തിയ വാര്ത്താസമ്മേളനത്തിലാണ് പി സി ജോര്ജ് സസ്പെന്ഷനെതിരെ പ്രതികരിച്ചത്. സസ്പെന്ഡ് ചെയ്യുന്നതിന് മുമ്പാണ് ജോര്ജ് വാര്ത്താസമ്മേളനത്തില് ഇക്കാര്യം ചൂണ്ടിക്കാട്ടിയത്. പാര്ട്ടി ഭരണഘടനയിലെ 28 (1) വകുപ്പ് അനുസരിച്ചാണ് നടപടി എടുത്തത് എന്നാണ് കെ എം മാണി മാദ്ധ്യമപ്രവര്ത്തകരോട് പറഞ്ഞത്. എന്നാല്, ഭരണഘടന അനുസരിച്ച് ഇത്തരത്തില് നടപടി എടുക്കാനുള്ള അവകാശം സംസ്ഥാന കമ്മിറ്റിക്കാണ്. ചെയര്മാന് സംസ്ഥാന കമ്മിറ്റിയുടെ അംഗീകാരത്തോടെ മാത്രമേ ഇത്തരം നടപടി സ്വീകരിക്കാന് ആകൂ എന്നാണ് പി സി ജോര്ജ് പറയുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha