പിണറായി അടുത്ത മുഖ്യമന്ത്രി സ്ഥാനാര്ത്ഥിയെന്ന് എ കെ ബാലന്; ഇതുവരെ തീരുമാനമായിട്ടില്ലെന്ന തിരുത്തുമായി യച്ചൂരി രംഗത്ത്
പിണറായി വിജയന് മുഖ്യമന്ത്രിയാകണമെന്നാണ് സമൂഹത്തിന്റെ പൊതുവികാരമെന്ന് എ കെ ബാലന്. കേന്ദ്രത്തില് പുതിയ പാര്ട്ടി ജനറല് സെക്രട്ടറി വന്നതോടെ കേരളത്തിന്റെ അടുത്ത മുഖ്യമന്ത്രി ആരെന്ന ചോദ്യങ്ങള്ക്കും ചൂടുപിടിച്ചു.
ഇതോടെ, പിണറായിയെ അനുകൂലിക്കുന്നവര് മുഖ്യമന്ത്രിയാകാന് യോഗ്യന് അദ്ദേഹമാണെന്ന് പറഞ്ഞു രംഗത്തെത്തി. ഇക്കൂട്ടത്തില് ആദ്യമെത്തിയത് പുതിയതായി കേന്ദ്രകമ്മിറ്റിയില് എത്തിയ എ കെ ബാലന് ആണ്. എന്നാല്, പാര്ട്ടി ഇക്കാര്യത്തില് തീരുമാനം എടുത്തിട്ടില്ല. പ്രതിപക്ഷ നേതാവ് വി എസ്. അച്യുതാനന്ദന് തിരഞ്ഞെടുപ്പില് മല്സരിക്കാന് താല്പര്യപ്പെട്ടാല് അക്കാര്യം പാര്ട്ടി ചര്ച്ച ചെയ്യുമെന്നും എ.കെ.ബാലന് മനോരമ ന്യൂസിന് നല്കിയ അഭിമുഖത്തില് പറഞ്ഞു.
അതേസമയം പിണറായി മുഖ്യമന്ത്രിയാകുമെന്ന എ കെ ബാലന്റെ പ്രസ്താവന സിപിഐ(എം) അഖിലേന്ത്യാ സെക്രട്ടറി സീതാറാം യെച്ചൂരി തള്ളിക്കളഞ്ഞു. മുഖ്യമന്ത്രി സ്ഥാനാര്ത്ഥിയെ ഇതുവരെ തീരുമാനിച്ചിട്ടില്ലെന്ന് യെച്ചൂരി പറഞ്ഞു. ഇത് പിന്നീട് തീരുമാനിക്കേണ്ട കാര്യമാണെന്നും അദ്ദേഹം പറഞ്ഞു. എല്ഡിഎഫില് നിന്നും പിരിഞ്ഞുപോയ ഘടകകക്ഷികളെ തിരികെ കൊണ്ടുവരാന് ശ്രമിക്കുമെന്നും യെച്ചൂരി വ്യക്തമാക്കി. തന്റെ പിന്തുണ വിഎസിനല്ലെന്നും വി എസ് ഉയര്ത്തുന്ന വിഷയങ്ങള്ക്കാക്കാണെന്നും പാര്ട്ടി സെക്രട്ടറി സ്ഥാനത്തേക്ക് ഒന്നിലധികം പേരുകള് ഉയര്ന്നിരുന്നതായും അദ്ദേഹം അറിയിച്ചു.
വി എസ്. അച്യുതാനന്ദനെക്കുറിച്ചുള്ള സിപിഐ(എം) പൊളിറ്റ് ബ്യൂറോ കമ്മിഷന് അന്വേഷണത്തില് ഒരു മാറ്റവും വരില്ല. പഴയ കേന്ദ്രകമ്മിറ്റിയുടെ തീരുമാനം അനുസരിച്ചുള്ള നടപടികള് തുടരും. പുതിയ നേതൃത്വത്തിന് ഒരു ഇടപെടലിനും കഴിയില്ലെന്നും എ.കെ. ബാലന് പറഞ്ഞു. സീതാറാം യച്ചൂരിക്കു പരസ്യമായ വിജയാശംസ നേര്ന്ന വി എസ്. അച്യുതാനന്ദന്റെ നടപടി പാര്ട്ടി രീതിയല്ലെന്നും ബാലന് വ്യക്തമാക്കി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha