എസ്എസ്എല്സി ഫലപ്രഖ്യാപനം: അബ്ദുറബ്ബിനെതിരെ പ്രതിഷേധവുമായി ലീഗ് നേതാക്കള് രംഗത്ത്, കൂടുതല് പ്ലസ്ടുസ്കൂളുകള് അനുവദിക്കാനാണെന്ന് ആക്ഷേപം
എസ്എസ്എല്സി ഫലപ്രഖ്യാപനവുമായി ബന്ധപ്പെട്ട് വിദ്യാഭ്യാസ മന്ത്രി അബ്ദുറബ്ബിനെതിരെ വ്യാപക പ്രതിഷേധം. മന്ത്രിക്കെതിരെ പരസ്യമായി പ്രതിഷേധിച്ചുകൊണ്ട് ലീഗ് നേതാക്കള് തന്നെ രംഗത്തെത്തി. എസ്എസ്എല്സി പരീക്ഷ വെറും കോമാളിത്തരമായി മാറിയിരിക്കുകയാണെന്നും 30ശതമാനം പേര് തോല്ക്കാത്ത പരീക്ഷ പരീക്ഷയല്ലെന്നും ലീഗിന്റെ നേതാവും എംഎല്എയുമായ കെഎന്എ ഖാദര് പ്രതികരിച്ചു. ഒരു സ്വകാര്യ ചാനലിലാണ് അദ്ദേഹം പ്രതിഷേധിച്ചത്. പ്രതിസന്ധിയില് നില്ക്കുന്ന സമയത്താണ് ഇത്തരത്തില് വീണ്ടുമൊരു ആക്ഷേപം വരുന്നത്. എന്നാല് സാങ്കേതിക തകരാറാണ് ഇങ്ങനെയൊരു ഫലപ്രഖ്യാപനത്തിനിടയാക്കിയതെന്ന് പറഞ്ഞ് വിദ്യാഭ്യാസ മന്ത്രി തലയൂരി. ഉടന് തന്നെ യഥാര്ത്ഥ ഫലം പ്രഖ്യാപിക്കുമെന്നും വിദ്യാഭ്യാസ മന്ത്രി പറഞ്ഞു. യുഡിഎഫിനകത്തും ഫലപ്രഖ്യാപനം പ്രതിഷേധത്തിനിടയാക്കിയിട്ടുണ്ട്. അഞ്ച്ലക്ഷം വിദ്യാര്ഥികളുടെ ഭാവി ഉപയോഗിച്ചാണ് സര്ക്കാര് കളിക്കുന്നതെന്ന് പ്രതിപക്ഷം ആരോപിച്ചു. ഭരണപക്ഷത്തും പ്രതിപക്ഷത്തുമുള്ള നിരവധി എംഎല്എമാര് ഇപ്പോള് തന്നെ പ്രതിഷേധവുമായി രംഗത്തെത്തിയിട്ടുണ്ട്.
എന്നാല് കൂടുതല് പ്ലസ്ടു സ്കൂളുകള് അനുവദിച്ച് അഴിമതി നടത്താനുള്ള ലീഗിന്റെ തന്ത്രമാണിതെന്നും ആക്ഷേപമുണ്ട്. ഇത്തരത്തിലുള്ള ആക്ഷേപങ്ങള് നേരത്തെ തന്നെ നിലനിന്നിരുന്നു,. ഇത് ശരിവെയ്ക്കുന്നതാണ് ഇപ്പോള് പുറത്തുവന്ന എസ്എസ്എല്സിയുടെ റിസള്ട്ട്. എന്നാല് എസ്.എസ്.എല്.സി. പരീക്ഷാ ഫലത്തിലെ അപാകതകള് തിരുത്തി പുതിയ ഫലം പ്രസിദ്ധീകരിക്കാന് വിദ്യാഭ്യാസവകുപ്പ് തീരുമാനിച്ചു. ഇതിനായി 54 പരീക്ഷാകേന്ദ്രങ്ങളില് നിന്നു നേരിട്ട് പുതിയഫലം ശേഖരിക്കാന് ഉദ്യോഗസ്ഥരെ ചുമതലപ്പെടുത്തി. പരീക്ഷാഭവന്റെ നേതൃത്വത്തിലാണ് നടപടിക്രമങ്ങള്. ഇതു ലഭിക്കുന്നതോടെ പൂര്ണമായ ഫലം പ്രസീദ്ധീകരിക്കാമെന്ന പ്രതീക്ഷയിലാണ് അധികൃതര്. പുതിയ ഫലത്തില് വിജയശതമാനത്തില് മാറ്റമുണ്ടാകും. നുറുശതമാനം വിജയം നേടിയ സ്കൂളുകളുടെ എണ്ണത്തിലും മാറ്റംവരും. ഫലപ്രഖ്യാപനം അടിമുടി മാറുമെന്ന ആശങ്കയിലാണ് രക്ഷിതാക്കളും വിദ്യാര്ത്ഥികളും. പലസ്ഥലങ്ങളിലും വിദ്യാര്ത്ഥികളുടെ പൂര്ണ മാര്ക്ക് വിവരങ്ങള് ഇല്ലാതെയാണ് ഫലം പ്രഖ്യാപിച്ചിരുന്നത്. പരിഷ്കരിച്ച ഫലംവരാന് രണ്ടുദിവസമെങ്കിലും വേണ്ടിവരുമെന്നാണ് റിപ്പോര്ട്ട്.
+2 സ്കൂളുകള് വര്ദ്ധിച്ചതോടെ ഈ സ്കൂളുകള്ക്ക് വിദ്യാര്ത്ഥികളെ ലഭിക്കാനായി ഏത് വിധേനയും കൂടുതല് പേരെ വിജയിപ്പിച്ചുവിടുക എന്ന തന്ത്രവും വിദ്യാഭ്യാസ വകുപ്പ് പയറ്റുന്നുണ്ടെന്നാണ് ആരോപണം. സംസ്ഥാനത്തെ വിദ്യാഭ്യാസ നിലവാരത്തെ പിന്നോട്ടടിക്കുന്നതാണ് ഈ മാര്ക്ക് ദാനമെന്ന ആരോപണം ശക്തമാണ്.
എസ്.എസ്.എല്.സി.ക്ക് പിന്നാലെ ഹയര് സെക്കന്ഡറി പരീക്ഷാഫലവും നേരത്തെയാക്കാന് സമ്മര്ദം ഉണ്ടെന്നാണ് സൂചന. അടുത്തയാഴ്ച ഫലം പ്രസിദ്ധീകരിക്കാന് തക്കവിധത്തില് മൂല്യനിര്ണയം വേഗത്തിലാക്കാനാണ് അധികൃതര് നിര്ദേശിച്ചിരിക്കുന്നത്. ഒരു ദിവസം 26 പേപ്പറുകളാണ് ഒരധ്യാപകന് നോക്കേണ്ടത്. ഫലം വേഗത്തിലാക്കാന് ഓരോ കെട്ട് പേപ്പര് കൂടി നോക്കിപ്പിക്കാനാണ് നീക്കം. 24ന് ഫലം പ്രസിദ്ധീകരിക്കാനാണ് ആദ്യം ഉദ്ദേശിച്ചത്. അത് നടക്കില്ലെന്ന് ഉറപ്പായി. ഈ സാഹചര്യത്തില് 28നെങ്കിലും പ്രസിദ്ധീകരിക്കണമെന്ന കര്ശന നിര്ദ്ദേശമാണ് ഹയര്സെക്കന്ററി വകുപ്പിന് ലഭിച്ചിരിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha