2000 ചതുരശ്ര അടി വരെയുള്ള വീടുകള്ക്ക് നികുതി വര്ധനയില്ല; 660 ചതുരശ്ര അടി വരെ വിസ്തീര്ണ്ണമുള്ള വീടുകളെ നികുതിയില് നിന്ന് ഒഴിവാക്കി
കെട്ടിട നികുതി വര്ധനയില് നിന്ന് 2000 ചതുരശ്ര അടി വരെ വിസ്തൃതിയുള്ള വീടുകളെ ഒഴിവാക്കാന് മന്ത്രിസഭായോഗം തീരുമാനിച്ചു. 2013 ഏപ്രില് ഒന്നിനു വര്ധിപ്പിച്ച കരം അടച്ചവര്ക്ക് അധികത്തുക അടുത്ത തവണ തട്ടിക്കിഴിക്കുമെന്നും മന്ത്രിസഭാ യോഗത്തിനു ശേഷം മുഖ്യമന്ത്രി ഉമ്മന്ചാണ്ടി അറിയിച്ചു.
660 ചതുരശ്ര അടി വരെ വിസ്തീര്ണമുള്ള വാസഗൃഹങ്ങളെ 2015 ഏപ്രില് ഒന്നുമുതല് കെട്ടിട നികുതിയില് നിന്ന് ഒഴിവാക്കാനും തീരുമാനിച്ചു. 2000 ചതുരശ്ര അടിക്കുമേല് വിസ്തൃതിയുള്ള വീടുകള്ക്കു നികുതി നിശ്ചയിക്കുമ്പോള് കെട്ടിട ഉടമകള്ക്ക് 25 ശതമാനത്തില് കൂടുതല് അധികഭാരം ഉണ്ടാകാന് പാടില്ല. അതേസമയം, നേരത്തേ നികുതി നിശ്ചയിച്ചപ്പോള് ഉണ്ടായിരുന്നതിനേക്കാള് കൂടുതല് സ്ഥലം
വിപുലീകരിച്ചുവെങ്കില് പഴയ നികുതിയുടെ ആനുപാതികമായി വര്ധന ആകാം. അതും പഴയ നിരക്കില് വേണം.
വാണിജ്യ കെട്ടിടങ്ങളുടെ വാര്ഷിക നികുതി പുതുക്കി നിശ്ചയിക്കുമ്പോള് നേരത്തേ നിശ്ചയിച്ച നികുതി വര്ധനയുടെ 100 ശതമാനത്തില് അധികരിക്കാന് പാടില്ല. 150 ശതമാനമേ വര്ധിപ്പിച്ചിട്ടുള്ളൂ എന്നാണു ബന്ധപ്പെട്ട വകുപ്പ് പറയുന്നതെങ്കിലും രണ്ടും മൂന്നും നാലും ഇരട്ടി വരെ വര്ധനയുണ്ടായെന്ന് സര്ക്കാരിനു പരാതി ലഭിച്ചിട്ടുണ്ട്. ഏതായാലും ഇരട്ടിയിലധികം വാങ്ങാന് പാടില്ലെന്ന് മുഖ്യമന്ത്രി പറഞ്ഞു. പഞ്ചായത്ത്, മുനിസിപ്പല് നിയമങ്ങളില് ഇതിനാവശ്യമായ ഭേദഗതി കൊണ്ടു വരുമെന്നും അദ്ദേഹം പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha