ബാര് കോഴ: തെളിവുണ്ടെങ്കില് മന്ത്രിമാര്ക്കെതിരെ കേസ് എടുക്കാന് വിജിലന്സിന് ലോകായുക്തയുടെ നിര്ദ്ദേശം
ബാര് കോഴക്കേസില് ബിജു രമേശിന്റെ മൊഴി കേരള സര്ക്കാരിന് മുകളില് വീഴുന്ന വാളായി നില്ക്കുന്നു. എപ്പോള് വേണമെങ്കിലും താഴേക്കെത്താവുന്ന വാള് മന്ത്രി സഭയുടെ അന്തകനാകുന്ന വിധത്തിലാണ് കാര്യങ്ങള് നീങ്ങുന്നത്.
ബിജുവിന്റെ ആരോപണത്തില് തെളിവുണ്ടെങ്കില് എന്തുകൊണ്ടാണ് നടപടി വൈകുന്നതെന്ന് വിജിലന്സിനോട് ലോകായുക്ത ആവശ്യപ്പെട്ടതോടെ കെ ബാബുവിനെതിരെയും കേസ് രജിസ്റ്റര് ചെയ്യുമെന്ന സൂചനയാണ് പുററത്തുവരുന്നത്. അന്വേഷണ പുരോഗതിയുടെ റിപ്പോര്ട്ടും ലോകായുക്ത വിജിലന്സിനോട് ആവശ്യപ്പെട്ടു.
കേസില് ബാര് അസോസിയേഷന് വര്ക്കിങ് പ്രസിഡന്റ് ബിജു രമേശിന്റെ രഹസ്യ മൊഴിയുടെ അടിസ്ഥാനത്തില് ആരോപണ വിധേയരായ മന്ത്രിമാര്ക്കെതിരെ നടപടി സ്വീകരിക്കാമെന്നാണ് ലോകായുക്ത വ്യക്തമാക്കിയത്. എന്നാല് കേസെടുക്കുന്നത് സുപ്രീംകോടതി നിര്ദ്ദേശിച്ച മാനദണ്ഡങ്ങള്ക്ക് അനുസരിച്ച് ആയിരിക്കണം എന്നും കോടതി നിര്ദ്ദേശിച്ചു. മന്ത്രിമാര്ക്കെതിരെ തെളിവുണ്ടെങ്കില് എന്തുകൊണ്ടാണ് നടപടി സ്വീകരിക്കാത്തത് എന്ന് വിജിലന്സിനോട് കോടതി ചോദിച്ചു. കേസിന്റെ ഇതുവരെയുള്ള അന്വേഷണ പുരോഗതി റിപ്പോര്ട്ട് ജൂണ് 22നകം സമര്പ്പിക്കാനും കോടതി അന്വേഷണ സംഘത്തോട് നിര്ദ്ദേശിച്ചു. ഇതോടൊപ്പം മന്ത്രിമാര്ക്കെതിരെ എന്ത് നടപടി സ്വീകരിച്ചു എന്നും വ്യക്തമാക്കണമെന്നും ലോകായുക്ത നിര്ദേശിച്ചിട്ടുണ്ട്.
അതേസമയം ബാര് കോഴ കേസിന്റെ അന്വേഷണത്തില് തെളിവ് ലഭിച്ചാല് കുറ്റക്കാര്ക്കെതിരെ നിയമപരമായും രാഷ്ട്രീയമായും നടപടി ഉണ്ടാവുമെന്ന് കെപിസിസി പ്രസിഡന്റ് വി എം.സുധീരനും വ്യക്തമക്കി. തെളിവില്ലാതെ ആരെയും ബലിയാടാക്കില്ലെന്നും അദ്ദേഹം കോഴിക്കോട്ട് മാദ്ധ്യമപ്രവര്ത്തകരോട് പറഞ്ഞു. ബാര് കോഴ കേസില് തെളിവ് ലഭിച്ചാല് അത് ഗൗരവമായി തന്നെ കാണും. കേസില് തെളിവ് കണ്ടെത്തേണ്ടത് വിജിലന്സ് സംഘമാണ്. നിലവില് ബാര് കോഴ ആരോപണത്തിന് ഇതുവരെ തെളിവ് കിട്ടിയതായി അന്വേഷണ സംഘം പറഞ്ഞിട്ടില്ലെന്നും സുധീരന് വിശദീകരിത്തു. പാലക്കാട് വീരേന്ദ്ര കുമാറിന്റെ തോല്വി സംബന്ധിച്ച് യു.ഡി.എഫ് ഉപസമിതിയുടെ റിപ്പോര്ട്ട് ലഭിച്ച ശേഷം നടപടി സ്വീകരിക്കും.
അതേസമയം തന്റെ പേരില് കേസെടുത്താല് താന് രാജിവെക്കുമെന്ന നിലപാടിലാണ് എക്സൈസ് മന്ത്രി കെ ബാബു. ബിജു രമേശിന്റെ ആരോപണത്തില് വിശ്വസനീയമായ സാഹചര്യമുണ്ടായാല് രാജി വെക്കാന് മടിക്കില്ലെന്നാണഅ കെ.ബാബു വ്യക്തമാക്കിയത്. സാങ്കേതികത്വം പറയാന് ഇഷ്ടപ്പെടുന്ന ആളല്ല താന്. മാണിക്കും തനിക്കും രണ്ട് നീതിയാണെന്ന ആരോപണത്തോട് ഇപ്പോള് പ്രതികരിക്കുന്നില്ല. നിയമമുണ്ടെങ്കില് വിജിലന്സ് അതിനനുസരിച്ചുള്ള നടപടികള് സ്വീകരിക്കട്ടെയെന്നും കെ.ബാബു പറഞ്ഞു.
ബാറുകളുടെ ലൈസന്സ് പുതുക്കുന്നതിനായുള്ള തുക കുറച്ചു നല്കുന്നതിനായി മന്ത്രി ബാബുവിന് 10 കോടി രൂപ നല്കിയെന്ന ബിജു രമേശിന്റെ മൊഴി പുറത്തായതാണ് കെ.ബാബുവിനെ പ്രതിസന്ധിയിലാക്കിയിരിക്കുന്നത്. ലൈസന്സ് പുതുക്കാനുള്ള ഫീസ് 30 ലക്ഷത്തില് നിന്ന് 23 ലക്ഷം രൂപയാക്കി കുറച്ചത് കോഴ വാങ്ങിയതിന് ശേഷമാണെന്നും ബിജു രമേശിന്റെ മൊഴിയിലുണ്ട്. 164ാം വകുപ്പനുസരിച്ചുള്ള മൊഴിയായതിനാല് വിജിലന്സിന് കേസെടുക്കാനും ബാബുവിനെതിരെ എഫ്.ഐ.ആര് രജിസ്റ്റര് ചെയ്യാനും കഴിയുമെന്നാണ് നിരീക്ഷിക്കപ്പെടുന്നത്.
ബിജു രമേശിന്റെ ആരോപണങ്ങള് അടിസ്ഥാനരഹിതമാണെന്നും അദ്ദേഹത്തിനെതിരെ കേസ് കൊടുക്കുമെന്നും കെ.ബാബു നേരത്തെ വ്യക്തമാക്കിയിരുന്നു. മദ്യവില്പ്പനക്കാരന്റെ ജല്പ്പനങ്ങള് മാത്രമാണ് ബിജു നടത്തുന്നതെന്നും പ്രതിപക്ഷത്തോടൊപ്പം ചേര്ന്ന് സര്ക്കാരിനെ അട്ടിമറിക്കുകയാണ് അദ്ദേഹത്തിന്റെ ലക്ഷ്യമെന്നും കെ.ബാബു ആരോപിച്ചിരുന്നു.
എന്നാല് ബാറുടമ ബിജു രമേശ് ആരോപണം ഉന്നയിച്ചു എന്നതിന്റെ പേരില് മാത്രം മന്ത്രി കെ.ബാബു രാജിവെക്കേണ്ട കാര്യമില്ലെന്ന് കോണ്ഗ്രസ് നേതാവ് കെ.സുധാകരന് വ്യക്തമാക്കി. അങ്ങനെ ആരോപണവിധേയരായ മന്ത്രിമാര് രാജിവച്ച് തുടങ്ങിയാല് ഏതെങ്കിലും സര്ക്കാര് നിലനില്ക്കുമോ? ഏതുകാലത്താണ് സര്ക്കാരിനെതിരെ അഴിമതി ആരോപണങ്ങള് ഉണ്ടാകാത്തത്? അത് എല്.ഡി.എഫ് സര്ക്കാരിന്റെ കാലത്തായാലും യു.ഡി.എഫിന്റെ ആയാലും. ഒരാള് അഴിമതി ആരോപിച്ചാല് അതിനെ ആധികാരിക രേഖയായി കാണുന്നത് ഏത് അടിസ്ഥാനത്തിലാണ്? ആരോപണം നിയമപരമായി തെളിയിച്ചാലേ അത് കുറ്റമാകുകയുള്ളുവെന്നും അദ്ദേഹം പറഞ്ഞു.
എന്നാല് കേസെടുത്താല് ബാബു രാജിവച്ചാല് ധാര്മ്മികതയുടെ പേരില് ധനമന്ത്രി കെ എം മാണിയും രാജിവെക്കേണ്ടി വരുമെന്നതാണ് ഉമ്മന് ചാണ്ടി സര്ക്കാറിന് തലവേദന സൃഷ്ടിച്ചിരിക്കുന്നത്. ഇത് യുഡിഎഫിന് കൂടുതല് പ്രതിസന്ധിയിലാക്കും. ബാര്കോഴ കേസ് മറയാക്ക ഐ ഗ്രൂപ്പ് നേതൃമാറ്റത്തിന് ശ്രമിക്കുമ്പോവാണ് ബിജു രമേശിന്റെ രഹസ്യമൊഴി കൂടുതല് കുരുക്കായി സര്ക്കാറിന് മാറിയിരിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha