ഒരു നേരത്തെ ഭക്ഷണത്തിനായി എത്രയോ പേര്‍ അലഞ്ഞ് തിരിഞ്ഞ് നടക്കുന്നു. അവര്‍ക്കെല്ലാം ഭക്ഷണം എന്ന തീരുമാനവുമായി കോഴിക്കോട് ജില്ലാ കളക്ടര്‍ രംഗത്തെത്തിയിരിക്കുകയാണ്. അന്നത്തിന് വകയില്ലാത്ത കോഴിക്കോട്ടുകാര്‍ക്ക് അന്നം വിളമ്പാന്‍ ഓപ്പറേഷന്‍ സുലൈമാനി എന്ന പദ്ധതിയുമായാണ് ജില്ലാ കളക്ടര്‍ എന്‍. പ്രശാന്ത് ഐഎഎസ് മുന്നോട്ട് വന്നിരിക്കുന്നത്. ജില്ലയിലെ ഹോട്ടല്‍ വ്യവസായികളുടെ സംഘടനയുമായും മറ്റ് എന്‍ജിയോകളുമായും സഹകരിച്ചാണ് കളക്ടര്‍ എന്‍. പ്രശാന്ത് ഐഎഎസ് ഈ പദ്ധതി വിഭാവനം ചെയ്തിരിക്കുന്നത്.
വിദേശ രാജ്യങ്ങളിലും മറ്റും നിലനില്‍ക്കുന്ന പെന്‍ഡിംഗ് കോഫി സമ്പ്രദായത്തിലാണ് കോഴിക്കോടും പദ്ധതി തയാറാക്കുന്നത്. വിദേശരാജ്യങ്ങളില്‍ കോഫി ഷോപ്പുകളിലും മറ്റും ചായ കുടിക്കാന്‍ എത്തുന്നവര്‍ എണ്ണത്തില്‍ കൂടുതല്‍ ചായ ഓര്‍ഡര്‍ ചെയ്യുകയും പണമടക്കുകയും ചെയ്യും. മൂന്നു പേര്‍ ചേര്‍ന്ന് അഞ്ച് ചായയാണ് ഓര്‍ഡര്‍ ചെയ്യുന്നതെങ്കില്‍ ബാക്കിയുള്ള രണ്ട് ചായ പെന്‍ഡിംഗ് കോഫി വിഭാഗത്തിലേക്ക് പോകും. ദരിദ്രരായ ആളുകള്‍ പെന്‍ഡിംഗ് കോഫി ഉണ്ടോ എന്ന് അന്വേഷിച്ചു വരുമ്പോള്‍ കടയിലെ ജീവനക്കാര്‍ അത് അവര്‍ക്ക് നല്‍കുന്നു.
ഈ മാതൃകയുടെ മറ്റൊരു വകഭേദമാണ് കോഴിക്കോട്ട് ഇപ്പോള്‍ അവതരിപ്പിക്കുന്നത്. കോഴിക്കോട്ടുകാര്‍ക്ക് പ്രത്യേക അടുപ്പം ഈ പദ്ധതിയോട് തോന്നുന്നതിനാണ് സുലൈമാനി എന്ന് ഇതിന് പേരിട്ടിരിക്കുന്നതെന്ന് ജില്ലാ കളക്ടര്‍ പ്രശാന്ത് പറയുന്നു. ദരിദ്രരായ ആളുകളെ ഉദ്ദേശിച്ചു നടപ്പാക്കുന്ന പദ്ധതി ദുരുപയോഗം ചെയ്യാതിരിക്കാന്‍ പ്രത്യേക കൂപ്പണുകള്‍ ജില്ലാ ഭരണകൂടം വിതരണം ചെയ്യും. അടുത്ത മാസം രണ്ടാം തിയതി മുതല്‍ കോഴിക്കോട്ട് ഓപ്പറേഷന്‍ സുലൈമാനി ആരംഭിക്കും.
അഞ്ജലി മേനോന്‍ സംവിധാനം ചെയ്ത ഉസ്താദ് ഹോട്ടല്‍ സിനിമയില്‍നിന്ന് പ്രചോദനം ഉള്‍ക്കൊണ്ടാണ് പദ്ധതിക്ക് ഓപ്പറേഷന്‍ സുലൈമാനി എന്ന് പേരിട്ടിരിക്കുന്നതെന്ന് കോഴിക്കോട് ജില്ലാ കളക്ട്രേറ്റ് അനൗദ്യോഗികമായി കൈകാര്യം ചെയ്യുന്ന ഫെയ്‌സ്ബുക്ക് പേജിലെ കുറിപ്പില്‍ പറയുന്നത്. ഓപ്പറേഷന്‍ സുലൈമാനി എന്ന് പദ്ധതിക്ക് പേരിട്ടിരിക്കുന്നത് വലിയ ആദരവാണെന്ന് അഞ്ജലി മേനോന്‍ ഫെയ്‌സ്ബുക്ക് കമന്റില്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha