പ്രായപൂര്ത്തി പതിനെട്ടാം വയസില്, പക്ഷേ കേരളത്തില് മധുരപതിനാറിനു തന്നെ മുസ്ലീം പെണ്കുട്ടികള്ക്ക് വിവാഹിതരാവാം, മറ്റൊരു സര്ക്കാര് ഉത്തരവ്
എന്നാല് കേരളത്തില് മുസ്ലീം പെണ്കുട്ടികളുടെ വിവാഹം 16 വയസില് നടത്തിക്കൊടുക്കാമെന്നാണ് പുതിയ സര്ക്കാര് ഉത്തരവ്. മുസ്ലിം വിവാഹങ്ങള് രജിസ്റ്റര് ചെയ്യാന് സ്ത്രീയുടെ പ്രായം 16 വയസിന് മുകളിലാണെങ്കില് തദ്ദേശ സ്ഥാപനങ്ങളിലെ രജിസ്ട്രാര്മാര് ആശങ്കപ്പെടേണ്ടതില്ലെന്ന് സര്ക്കാര്. ഇത്തരം വിവാഹങ്ങള് മതാധികാര സ്ഥാപനം നല്കുന്ന സാക്ഷ്യപത്രത്തിന്റെ അടിസ്ഥാനത്തില് രജിസ്റ്റര് ചെയ്ത് നല്കണമെന്ന് തദ്ദേശസ്വയം ഭരണ വകുപ്പ് പ്രിന്സിപ്പല് സെക്രട്ടറി ജെയിംസ് വര്ഗീസാണ് ഉത്തരവിറക്കിയത്. ഇത് കര്ശനമായി പാലിക്കണമെന്നും ഉത്തരവില് പറയുന്നു. ഇതുസംബന്ധിച്ച് 2013 ഏപ്രില് ആറിന് തദ്ദേശസ്വയംഭരണ വകുപ്പിന് കീഴിലുള്ള തദ്ദേശസ്വയംഭരണ ഇന്സ്റ്റിട്യൂട്ടിന് (കില) നിര്ദേശം നല്കിയിരുന്നു. എന്നാല് ചില ഉദ്യോഗസ്ഥര് പതിനെട്ട് വയസിന് താഴെയുള്ള വിവാഹങ്ങള് രജിസ്റ്റര് ചെയ്തു നല്കാന് വിസമ്മതിച്ചു. ഇതിനാലാണ് ബുധനാഴ്ച സര്ക്കാര് പ്രത്യേക ഉത്തരവ് നല്കിയത്. 1957ലെ മുസ്ലിം വിവാഹനിയമത്തില് വിവാഹസമയം പുരുഷന്മാര്ക്ക് 21 വയസും സ്ത്രീകള്ക്ക് 18 വയസും തികഞ്ഞിരിക്കണമെന്ന് സര്ക്കാര് നിഷ്കര്ഷിച്ചിട്ടില്ലെന്നാണ് സര്ക്കാരിന്റെ നിലപാട്. മാത്രമല്ല, 2006ലെ ശൈശവവിവാഹ നിരോധന നിയമപ്രകാരം 21 വയസ് തികയാത്ത പുരുഷനും 18 വയസ് തികയാത്ത സ്ത്രീയും തമ്മിലുള്ള വിവാഹം അസാധുവാണെന്ന് പറഞ്ഞിട്ടില്ലെന്നതും സര്ക്കാരിന്റെ ഇപ്പോഴത്തെ നീക്കത്തിന് കരുത്ത് പകരുന്നു. സംസ്ഥാന സര്ക്കാരിന്റെ ഈ നിലപാടിനെതിരെ വന് വിമര്ശനം ഇതിനകം തന്നെ ഉയര്ന്നു കഴിഞ്ഞു. ഈ നിയമം സാമൂഹ്യ വിരുദ്ധ പ്രവണതകള്ക്ക് വഴിവെക്കുമെന്ന് അഖിലേന്ത്യാ മഹിളാ അസോസിയേഷന് ആരോപിച്ചു. മഹിളാ കോണ്ഗ്രസും ഇതിനെതിരെ രംഗത്തെത്തി. സോഷ്യല് നെറ്റ്വര്ക്കിംഗ് സൈറ്റുകളിലും ഇത് വന് ചര്ച്ചാവിഷയമായിട്ടുണ്ട്. കേരളത്തിലെ മുസ്ലീം ജനത വിദ്യാഭ്യാസ കാര്യത്തിലൊന്നും ഒട്ടും പുറകിലല്ല. പിന്നെന്തിനാണ് ഇത്രയും ചെറിയ പ്രായത്തില് വിവാഹം നടത്തിക്കൊടുക്കാന് സര്ക്കാര് തന്നെ മുന്കൈയ്യെടുക്കുന്നത് എന്നാണ് അത്ഭുതം.
https://www.facebook.com/Malayalivartha