ചങ്ങാതിമാരെ ഫോണില് വിളിക്കാന് ആവശ്യപ്പെട്ട് ഒന്നും അറിയാതെ ഡോ. അബിന്..
അവരുടെ സൗഹൃദത്തിന് വിള്ളല് വീഴ്ത്താന് ആ ഭൂമികുലുക്കത്തിന് കഴിഞ്ഞില്ല. തന്റെ ചങ്ങാതിമാരെ ഫോണില് വിളിക്കാന് അബിന് ആവശ്യപ്പെടുമ്പോള് വീട്ടുകാര് ആ വാര്ത്ത പറയാന് കഴിയാതെ വിങ്ങിപ്പൊട്ടുകയായിരുന്നു. അപ്പോഴേക്കും സുഹൃത്തുക്കളുടെ മൃതദേഹവും വഹിച്ചുകൊണ്ട് വിമാനം ഡല്ഹിയില് എത്തിയിരുന്നു. ഉറ്റ ചങ്ങാതിമാരായിരുന്ന അബിനും ഇര്ഷാദും ദീപക്കും ഒന്നിച്ചാണ് നേപ്പാളിലേക്ക് പോയത്. ഒന്നിച്ച് പഠിച്ച് ഡോക്ടര്മാരായതാണ് മൂവരും.
ബുധനാഴ്ച പുലര്ച്ചെ എയര്ഫോഴ്സിന്റെ പ്രത്യേക വിമാനത്തില് കാഠ്മണ്ഡുവില്നിന്ന് ന്യൂഡല്ഹിയിലെ എയിംസ് ആശുപത്രിയിലേക്ക് എത്തിച്ചപ്പോഴായിരുന്നു അബിന്സൂരി ഉറ്റവരെ അടുത്തുകണ്ടപ്പോഴും ചങ്ങാതിമാരെക്കുറിച്ചറിയാനുള്ള ആധി പങ്കുവച്ചത്. നേപ്പാളില് നിന്നും എയര്ഫോഴ്സിന്റെ വിമാനത്തില് കയറും വരെ ദീപക്കും ഇര്ഷാദും ആശുപത്രിയില് ചികിത്സയിലാണ് എന്ന വിവരമാണ് അബിന് ലഭിച്ചിരുന്നത്. സുഹൃത്തുക്കളെ അബിന് തിരക്കിയതോടെ ഡോ. ഇര്ഷാദും ദീപക്കും കാഠ്മണ്ഡുവിലെ ആശുപത്രിയില് ചികിത്സയിലാണെന്നും അബോധാവസ്ഥയിലായതിനാല് ഫോണില് സംസാരിക്കാന് കഴിയില്ലെന്ന് പറഞ്ഞ് അനുജനെ വിശ്വസിപ്പിച്ചതായി എയിംസ് ആശുപത്രിയിലുള്ള സഹോദരന് ഡോ. അജുന്സൂരി പറഞ്ഞു.
അടുത്ത സുഹൃത്ബന്ധമായിരുന്നു ഈ മൂവര്സംഘത്തിന്റേത്. കോഴിക്കോട് മെഡിക്കല് കോളേജില് എംബിബിഎസ് പഠനത്തിനിടയില് ഇര്ഷാദിന്റെയും ദീപക്കിന്റെയും അബിന്സൂരിയുടെയും സഹപാഠികളായ എയിംസിലെ ഡോക്ടര്മാരും ആശുപത്രിയില് അബിന്റെ ആരോഗ്യ പരിപാലനത്തിനുണ്ട്. ബുധനാഴ്ച പുലര്ച്ചെ 6.54ന് ന്യൂഡല്ഹി വിമാനത്താവളത്തില് എത്തുമ്പോള് ബന്ധുക്കള്ക്കൊപ്പം സഹപാഠികളുമുണ്ടായിരുന്നു. ശനിയാഴ്ച ഭൂകമ്പമുണ്ടാകുമ്പോള് നേപ്പാള് ടാമേല് സ്ട്രീറ്റിലുള്ള ബജറ്റ്മള്ട്ടിപ്ലക്സ് ഹോട്ടലിലായിരുന്നു ഡോ. അബിന്സൂരിയും സുഹൃത്തുക്കളും.
ആറുനിലയുള്ള ഹോട്ടല് തകര്ന്ന് വീഴുമ്പോള് താന് മുറിക്കകത്തും സുഹൃത്തുക്കള് പുറത്തെ വരാന്തയിലുമായിരുന്നുവെന്ന് അബിന് പറഞ്ഞതായി ബന്ധുക്കള് അറിയിച്ചു. അബിന്റെ ആരോഗ്യനിലയില് പുരോഗതിയുണ്ടെന്നും ആന്തരാവയവങ്ങള്ക്ക് കുഴപ്പമില്ലെന്നും എയിംസിലെ ഡോക്ടര്മാര് അറിയിച്ചതായി ബന്ധുക്കള് പറഞ്ഞു. അമ്മ അനിത കുമാരിയും സഹോദരി അഞ്ജന സൂരിയും പിതൃസഹോദരന് ബാലകൃഷ്ണനും അബിനിനൊപ്പം ആശുപത്രിയിലുണ്ട്. ഡോ. അബിന്സൂരിയുടെ ചികിത്സാ ചെലവ് കേരള സര്ക്കാറാണ് വഹിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha