കേരളത്തില്‍ നീണ്ട കാലതാമസം എടുക്കുന്ന മറ്റു പ്രോജക്ടുകളുടെ പട്ടികയിലേക്ക് കൊച്ചി മെട്രോയും എത്തുമെന്ന് ആശങ്ക. കൊച്ചി മെട്രോ ജൂണിലും ഓടിത്തുടങ്ങില്ല, പണികള്‍ വൈകുന്നു. കൊച്ചി മെട്രോ റയില്‍ നിര്‍മാണം കാലതാമസം നേരിടുന്നതില്‍ ഡിഎംആര്‍സി മുഖ്യകരാറുകാര്‍ക്ക് നോട്ടീസ് നല്‍കി. നിര്‍മാണപ്രവര്‍ത്തനങ്ങള്‍ വേഗത്തിലാക്കിയില്ലെങ്കില്‍ കരാര്‍ റദ്ദാക്കുന്നതുകള്‍പ്പെടെയുളള നടപടികളിലേക്ക് കടക്കുമെന്നും കൂടുതല്‍ തൊഴിലാളികളെ എത്തിച്ച് ജോലികള്‍ വേഗത്തിലാക്കണമെന്നും കരാറുകാരായ സോമ കണ്‍സ്ട്രക്ഷന്‍സിനും എല്‍ആന്‍ഡ്ടിക്കും നിര്‍ദ്ദേശം നല്‍കി.
മുഖ്യമന്ത്രി ഉമ്മന്‍ചാണ്ടിയുടെ സാന്നിധ്യത്തില്‍ ചേര്‍ന്ന യോഗത്തിന്റെ അടിസ്ഥാനത്തിലായിരുന്നു നിര്‍ദേശം. നിലവിലെ സാഹചര്യത്തില്‍ മെട്രോ വൈകുമെന്നുറപ്പായതോടെയാണ് കരാറുകാര്‍ക്ക് ഡിഎംആര്‍സി നോട്ടീസ് നല്‍കിയത്. അടുത്ത ജൂണില്‍ കൊച്ചിയില്‍ മെട്രോ റയില്‍ ഓടിക്കുമെന്നായിരുന്നു ഡിഎംആര്‍സിയുടെ പ്രഖ്യാപനമെങ്കിലും നിലവിലെ സാഹചര്യത്തില്‍ നടക്കില്ലെന്ന് ഉറപ്പാകുകയാണ്. നിര്‍മ്മാണ പ്രവര്‍ത്തനങ്ങള്‍ പ്രതിസന്ധിയിലായതോടെ അടുത്ത ജൂണില്‍ മെട്രോറയില്‍ കമ്മിഷന്‍ ചെയ്യാനുളള സാധ്യത വിരളമായി.
കോച്ച് നിര്‍മാണം പൂര്‍ത്തിയാകും മുമ്പ് ആലുവ മുതല്‍ കലൂര്‍ രാജ്യാന്തര സ്‌റ്റേഡിയം വരെയുളള മെട്രോ പാളങ്ങളുടെയും സ്‌റ്റേഷനുകളുടെയും നിര്‍മാണം പൂര്‍ത്തിയാക്കണമെന്നായിരുന്നു ഡിഎംആര്‍സി കരാറുകാര്‍ക്ക് നിര്‍ദ്ദേശം നല്‍കിയിരുന്നത്.എന്നാല്‍ നിര്‍ദ്ദേശം നടപ്പായില്ല. മാത്രമല്ല കൊച്ചി മെട്രോ നിര്‍മാണത്തില്‍ ഏര്‍പ്പെട്ടിരുന്ന തൊഴിലാളികളില്‍ വലിയൊരു വിഭാഗത്തിനെ ചെന്നൈ മെട്രോ ജോലികളിലേക്ക് നിയോഗിക്കുകയും ചെയ്തു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha