വോട്ടര്‍മാരാകാന്‍ ഓണ്‍ലൈന്‍ സംവിധാനമില്ല; തിരിച്ചറിയില്‍ കാര്‍ഡ് വിതരണം അവതാളത്തില്‍; ആകെ മൊത്തം ആശയക്കുഴപ്പം
വിവാദങ്ങള്‍ക്കു പിന്നാലെ എല്ലാവരും പായുമ്പോള്‍ സാധാരണക്കാരുടെ പ്രശ്‌നങ്ങള്‍ ആരും ശ്രദ്ധിക്കുന്നില്ല. പുതിയ വോട്ടര്‍ ഐ.ഡി കാര്‍ഡുകള്‍ സമര്‍പ്പിക്കുന്നത് ഓണ്‍ലൈന്‍ സംവിധാനങ്ങള്‍ മരവിപ്പിച്ചതോടെ പൂര്‍ണമായും അവതാളത്തിലായി. അപേക്ഷകരുടെ വിവരങ്ങള്‍ ശേഖരിച്ച് സമര്‍പ്പിക്കാന്‍ ചുമതലയുള്ള ബൂത്ത് ലെവല്‍ ഓഫീസര്‍മാര്‍ പോലും ആശയക്കുഴപ്പത്തിലാണ്.
ഏപ്രില്‍ 23 മുതല്‍ മെയ് അഞ്ചുവരെയായിരുന്നു അപേക്ഷകള്‍ സമര്‍പ്പിക്കാനായി തെരഞ്ഞെടുപ്പ് കമ്മീഷന്‍ നിശ്ചയിച്ചിരുന്നത്. എന്നാല്‍ ഈ സമയപരിധിക്കുള്ളില്‍ സംസ്ഥാനത്തെ അമ്പതു ശതമാനം പേര്‍ക്കു പോലും അപേക്ഷകള്‍ സമര്‍പ്പിക്കാനായിട്ടില്ല. തുടര്‍ന്ന് ഈ മാസം 15 വരെ നീട്ടിയെങ്കിലും ഇതിനും ഒരു വ്യക്തതയില്ല.
അതേസമയം തിരിച്ചറിയല്‍ കാര്‍ഡ് ആധാറുമായി ബന്ധിപ്പിക്കാന്‍ ഓണ്‍ലൈന്‍ വഴി നേരത്തെ അപേക്ഷ സമര്‍പ്പിച്ചവരും ഇനി ബൂത്ത് ലെവല്‍ ഓഫീസര്‍മാര്‍ വരുന്നത് കാത്തിരിക്കണം. കഴിഞ്ഞ മാസം 15 മുതല്‍ ഇതിനായുള്ള ഓണ്‍ലൈന്‍ സംവിധാനങ്ങള്‍ പൂര്‍ണമായും മരവിപ്പിച്ചതോടെ അതുവരെ ഓണ്‍ലൈനായി അപേക്ഷിച്ചവരില്‍ ഭൂരിഭാഗത്തിനും ബൂത്ത് ലെവല്‍ ഓഫീസര്‍മാര്‍ മുഖേന അപേക്ഷിക്കേണ്ട അവസ്ഥയിലായി. നേരത്തെ ഓണ്‍ലൈന്‍ വഴി അപേക്ഷിച്ചവരുടെ പ്രിന്റ് ഔട്ട് സ്വീകരിക്കാതെ പുതിയ അപേക്ഷാഫോറത്തില്‍ അപേക്ഷ നല്‍കാനാണ് ബൂത്ത് ലെവല്‍ ഓഫീസര്‍മാര്‍ ആവശ്യപ്പെടുന്നത്.
നേരത്തെ ഓണ്‍ലൈന്‍ വഴി നല്‍കിയതിന്റെ പ്രിന്റ് ഔട്ട്, ബൂത്ത് ലെവല്‍ ഓഫീസര്‍ക്ക് പരിശോധനയ്ക്ക് വിധേയമാക്കാമായിരുന്നു. പുതിയ അപേക്ഷകള്‍ ബൂത്ത് ലെവല്‍ ഓഫീസര്‍മാരെ കൂടാതെ സ്ഥലത്തെ പോസ്റ്റ്മാന്‍ വഴിയും നല്‍കണമെന്നും നിഷ്‌കര്‍ഷിക്കുന്നുണ്ട്. ഏതെങ്കിലും ഒരാള്‍ക്ക് അപേക്ഷ നല്‍കിയാല്‍ മതിയോ രണ്ടു പേര്‍ക്കും ഒരെ സമയം നല്‍കണമോ എന്ന കാര്യത്തിലും ആശയക്കുഴപ്പം പലയിടങ്ങളിലും നിലനില്‍ക്കുന്നുണ്ട്.
നാട്ടിന്‍പുറങ്ങളെ അപേക്ഷിച്ച് നഗരങ്ങളിലാണ് ഇക്കാര്യത്തില്‍ ബൂത്ത് ലെവല്‍ ഓഫീസര്‍മാരെ കാണാനില്ലാത്തത്. ലക്ഷക്കണക്കിന് അപേക്ഷകരുള്ള ഈ ജോലി ബൂത്ത് ലെവല്‍ ഓഫീസര്‍മാര്‍ വഴിയും മറ്റും പെട്ടെന്ന് പൂര്‍ത്തിയാക്കാന്‍ കഴിയില്ലെന്നിരിക്കെ ഓണ്‍ലൈന്‍ സംവിധാനം അട്ടിമറിച്ചത് ദുരൂഹമാണെന്നാണ് ഐ.ടി.അസോസിയേഷന്‍ ആരോപിക്കുന്നത്. മറ്റൊരു കാര്യം ഓണ്‍ലൈന്‍ വഴി കാര്‍ഡിലെ തെറ്റുകള്‍ തിരുത്താന്‍ സൗകര്യമുണ്ടായിരുന്നത് ബൂത്ത് ലെവല്‍ ഓഫീസര്‍മാര്‍ വഴി അപേക്ഷിക്കുമ്പോള്‍ സാധ്യമാകുന്നില്ല എന്നൊരു ന്യൂനതയുമുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
