സ്റ്റിംഗ് ഓപറേഷൻ വെളിപ്പെടുത്തലുകൾ പാരയായി!; കോഴിക്കോട് എം.പി എം.കെ രാഘവനെതിരെ വിജിലന്സ് അന്വേഷണം; വിജിലൻസ് നടപടി നിയമോപദേശത്തിന് ശേഷം
2019ലെ ലോക്സഭ തിരഞ്ഞെടുപ്പ് സമയത്ത് പുറത്ത്വന്ന കന്നട ന്യൂസ് ചാനല് ടി.വി 9ന്റെ സ്റ്റിംഗ് ഓപറേഷനിലെ വെളിപ്പെടുത്തലുകളില് കോഴിക്കോട് എം.പി എം.കെ രാഘവനെതിരെ വിജിലന്സ് അന്വേഷണം. വിജിലന്സ് കോഴിക്കോട് യൂണിറ്റാണ് കേസെടുത്ത് അന്വേഷിക്കുക. വലിയ ഹോട്ടല് തുടങ്ങുന്നതിന് സഹായം ചോദിച്ചാണ് ടി.വി ചാനല് സംഘം എം.കെ രാഘവനടുത്തെത്തിയത്.
ലോക്സഭ തിരഞ്ഞെടുപ്പ് നടക്കുന്ന സമയമാണെന്നും തിരഞ്ഞെടുപ്പ് ഫണ്ടിലേക്ക് തനിക്ക് 5 കോടി രൂപ നല്കണമെന്നും ആവശ്യപ്പെടുന്ന തരത്തിലുളള ദൃശ്യങ്ങളാണ് ചാനല് അന്ന് പുറത്തുവിട്ടത്. മാത്രമല്ല 2014ലെ തിരഞ്ഞെടുപ്പില് തനിക്ക് 20 കോടി രൂപ ചിലവായി എന്ന് വെളിപ്പെടുത്തലും ചാനല് പുറത്ത്വിട്ട വീഡിയോയിലുണ്ട്. കൊണ്ടുവരേണ്ട പണം ഡല്ഹിയിലെ ഓഫീസില് കൊണ്ടുവരാന് ആവശ്യപ്പെടുന്നതും വീഡിയോയിലെ ദൃശ്യങ്ങളിലുണ്ട്.
നിലവില് എം.കെ രാഘവന് ലോക്സഭാംഗമായതിനാല് അന്വേഷണത്തിന് ലോക്സഭ സ്പീക്കറുടെ അനുമതി വേണോയെന്ന സംശയത്തെ തുടര്ന്ന് വിജിലന്സ് നിയമോപദേശം തേടി. അതിന്റെ ആവശ്യമില്ലെന്ന് മറുപടി ലഭിച്ചതിനെ തുടര്ന്നാണ് വിജിലന്സ് കേസെടുത്തത്.
https://www.facebook.com/Malayalivartha