രമേഷ്‌ ചെന്നിത്തലയുടെ മന്ത്രിസഭ പ്രവേശനം വീണ്ടും തലപൊക്കുകയാണ്‌. പല തവണ ഇപ്പോള്‍ മന്ത്രിയാകുമെന്ന്‌ തോന്നിപ്പിച്ചു എങ്കിലും അതൊന്നും ഫലം കണ്ടില്ല. അവസാനം നാണം കെട്ട്‌ താന്‍ മന്ത്രിസഭയിലേക്കില്ലെന്നും പറഞ്ഞ്‌ രമേശ്‌ തന്നെ പല പ്രാവശ്യം രംഗത്തു വരികയും ചെയ്‌തു. മുഖ്യമന്ത്രിയുടേയും എ ഗ്രൂപ്പുകാരുടേയും എതിര്‍പ്പ്‌ കാരണമാണ്‌ ചെന്നിത്തലയുടെ മന്ത്രിസഭ പ്രവേശനം വൈകുന്നതെന്ന്‌ എല്ലാ ഐ ഗ്രൂപ്പുകാരും വിശ്വസിച്ചു. അങ്ങനെ സോളാര്‍ വന്നതോടെ മുഖ്യമന്ത്രിയും മന്ത്രിമാരും എല്ലാം പ്രതിരോധത്തിലായി. കിട്ടിയ തക്കം അവര്‍ പാഴാക്കിയില്ല. ഐ ഗ്രൂപ്പു നേതാക്കള്‍ പ്രതികരണവുമായി രംഗത്തു വന്നതോടെ മുഖ്യമന്ത്രി തികച്ചും ഒറ്റപ്പെട്ടു. കേരളത്തിലെ പ്രശ്‌നത്തില്‍ ഹൈക്കമാന്‍ഡിനെ ഇടപെടുത്തുവാനുള്ള ശ്രമവും ഐ ഗ്രൂപ്പ്‌ നടത്തി. ഇതിന്റെ ഫലസമാപ്‌തിയാണ്‌ കോണ്‍ഗ്രസ്‌ ഹൈക്കമാന്‍ഡിന്റ്‌ മന്ത്രിസഭ പുന:സംഘടനയ്‌ക്കൊരുങ്ങുന്നത്‌. രമേശ്‌ ചെന്നിത്തലയെ ഭാഗമാക്കിയുളള ഒരു പുനഃസംഘടനയ്‌ക്കായിരിക്കും മുന്‍തൂക്കം. ഇതിനായി, വീണ്ടും ചര്‍ച്ചകള്‍ നടത്തുമെന്നുമാണ്‌ റിപ്പോര്‍ട്ടുകള്‍. ഇപ്പോഴത്തെ നിലയില്‍ പാര്‍ട്ടിക്ക്‌ ലോക്‌സഭാ തെരഞ്ഞെടുപ്പിനെ നേരിടാന്‍ ബുദ്ധിമുട്ടാണെന്ന അഭിപ്രായം ഉയര്‍ന്നതോടെയാണ്‌ പുനഃസംഘടനയിലൂടെ പ്രതിഛായ മെച്ചപ്പെടുത്താനുളള തീരുമാനത്തിലേക്ക്‌ കേന്ദ്ര നേതൃത്വം എത്തിച്ചേര്‍ന്നത്‌. കേരളത്തിലെ മന്ത്രിസഭാ പുനഃസംഘടന സോളാര്‍ കേസ്‌ അന്വേഷണത്തിന്‌ ശേഷമുണ്ടാകുമെന്നാണ്‌ ഹൈക്കമാന്‍ഡ്‌ നല്‍കുന്ന സൂചന. കേരളാ നേതാക്കളുമായി ചര്‍ച്ച നടത്താന്‍ മുകുള്‍ വാസ്‌നിക്കിനെ ചുമതലപ്പെടുത്തി. സോളാര്‍ അന്വേഷണം എത്രയും വേഗം പൂര്‍ത്തിയാക്കും. കേസ്‌ താഴേതട്ടിലുള്ള പ്രവര്‍ത്തകരേയും ബാധിച്ചിട്ടുണ്ട്‌. അതിനാല്‍ അവരുമായും പുനഃസംഘടനയ്‌ക്ക് മുന്‍പ്‌ ആശയവിനിമയം നടത്തി വിശ്വാസമാര്‍ജിക്കും.