മുഖ്യമന്ത്രിക്കെതിരെ ലേഖനം; ചന്ദ്രശേഖരന് സ്ഥാനമൊഴിയും
ഐ.എന്.ടി.യു.സി സംസ്ഥാന പ്രസിഡന്റും രമേശ് ചെന്നിത്തലയുടെ അടുത്ത അനുയായിയുമായ ആര്.ചന്ദ്രശേഖരന് ഉമ്മന്ചാണ്ടിക്കെതിരെ രംഗത്ത്. മുഖ്യമന്ത്രി ഇരിക്കേണ്ടിടത്ത് ഇരുന്നില്ലെങ്കില് മറ്റവന് കയറി ഇരിക്കുമെന്ന പരാമര്ശവുമായി ഐ.എന്.ടി.യു.സിയുടെ പ്രസിദ്ധീകരണം എന്ന് അവകാശപ്പെടുന്ന ഇന്ത്യന് തൊഴിലാളിയുടെ പുതിയ ലക്കം പുറത്തിറങ്ങി. എന്നാല് പ്രസിദ്ധീകരണം ഐ.എന്.ടി.യു.സിയുടേതല്ലെന്നും പ്രൊഫ. പി.ഗോപകുമാറിന്റേതാണെന്നും ആരോപണം ഉയര്ന്നു.
മുഖ്യമന്ത്രിയെ നിശിതമായി വിമര്ശിക്കുന്ന ലേഖനം ഐ.എന്.ടി.യു.സി പ്രസിദ്ധീകരണത്തില് പ്രത്യക്ഷപ്പെട്ടത് ആശയക്കുഴപ്പങ്ങള്ക്കിടയാക്കിയിട്ടുണ്ട്. ദേശാഭിമാനി പോലും എഴുതാന് മടിക്കുന്ന ഭാഷയിലാണത്രേ ലേഖനം എഴുതിയിരിക്കുന്നത്. ചന്ദ്രശേഖരന്റെ നിര്ദേശാനുസരണമാണ് ലേഖനം പ്രസിദ്ധീകരിച്ചതെന്ന് അറിയുന്നു. രാഷ്ട്രീയകാര്യ ലേഖകന് എന്ന പേരിലുള്ളതാണ് ലേഖനം.
രാഷ്ട്രീയ പത്മവ്യൂഹത്തില് അകപ്പെട്ട മുഖ്യമന്ത്രിയെ എല്ലാവരും കൈവിട്ടു എന്നതിന്റെ ഉദാഹരണമായും കോണ്ഗ്രസുകാര് ലേഖനത്തെ ചൂണ്ടിക്കാണിക്കുന്നു. ഉമ്മന്ചാണ്ടിയെ അധിക്ഷേപിച്ച് ലേഖനം പ്രസിദ്ധീകരിച്ചതിനെതിരെ മന്ത്രി കെ ബാബു, കെ സി ജോസഫ് എന്നിവര് രംഗത്തെത്തി കഴിഞ്ഞു. മുഖ്യമന്ത്രിയെ വിമര്ശിക്കാന് പ്രസാധകര്ക്ക് അവകാശമില്ലെന്നാണ് വാദം.
കശുവണ്ടി കോര്പ്പറേഷന് ചെയര്മാന് സ്ഥാനത്തുനിന്നും രാജി വച്ചശേഷം മതി ലേഖനം എഴുത്ത് എന്നും ഇവര് ആവശ്യപ്പെടുന്നു. വിവാദം മൂര്ച്ഛിച്ച പശ്ചാത്തലത്തില് ചന്ദ്രശേഖരന് കശുവണ്ടി കോര്പ്പറേഷന് ചെയര്മാന് സ്ഥാനം രാജി വയ്ക്കാനാണ് സാധ്യത. ലേഖനം രമേശ് ചെന്നിത്തലയേയും ചൊടിപ്പിച്ചിട്ടുണ്ട്. പ്രൊഫ. പി. ഗോപകുമാറാണ് മാസികയുടെ പ്രിന്ററും പബ്ളിഷറും.
https://www.facebook.com/Malayalivartha