വീട്ടുകാര്‍ ഓണാഘോഷത്തിന് തയ്യാറെടുക്കുന്നതിനിടെ രണ്ടു വയസ്സുകാരന്‍ മുറിയില്‍ കയറി അകത്ത് നിന്ന താഴ് അമര്‍ത്തി, ഇരട്ടത്താഴ് വീണ വാതില്‍ തുറക്കാനാവാതെ വീട്ടുകാര്‍..കുഞ്ഞിന്റെ നിലവിളി തുടക്കത്തിലുണ്ടായിരുന്നെങ്കിലും പിന്നീട് കേള്‍ക്കാതായി, പരിഭ്രാന്തിയിലായ വീട്ടുകാര്‍ ഒടുവില്‍ അഗ്നിരക്ഷാസേനയില്‍ വിവരം അറിയിച്ചു.

പത്തുനില ഫ്‌ളാറ്റ് സമുച്ചയത്തിലെ അഞ്ചാംനിലയിലെ മുറിയില്‍ കുടുങ്ങിയ രണ്ടുവയസ്സുകാരനെ ആറാംനിലയില്‍നിന്ന് കയര്‍ വഴി തൂങ്ങിയിറങ്ങി അഗ്‌നിരക്ഷാസേന സാഹസികമായി രക്ഷിച്ചു. വിദ്യാനഗറിലെ ഫ്‌ളാറ്റിലാണ് സംഭവം നടന്നത്. സഹോദരിയുടെ ഫ്‌ളാറ്റിലേക്ക് ഓണത്തിന് വിരുന്നെത്തിയതായിരുന്നു കളനാട്ടെ അമ്മയും മകനും.

ഞായറാഴ്ച ഫ്‌ളാറ്റിലെ ഓണാഘോഷത്തിന് വീട്ടുകാര്‍ തയ്യാറെടുക്കുമ്പോഴാണ് സംഭവം നടന്നത്. ഉച്ചയ്ക്ക് രണ്ടിന് മുറിയില്‍ കയറിയ കുഞ്ഞ് ഉള്ളില്‍നിന്ന് താഴ് അമര്‍ത്തുകയായിരുന്നു.

ഇരട്ടത്താഴ് വീണ വാതില്‍ പുറത്തുനിന്ന് തുറക്കാന്‍ വീട്ടുകാര്‍ ശ്രമിച്ചെങ്കിലും നടന്നില്ല. മുറിയിലേക്കുള്ള പ്രധാന വാതിലാണ് അടഞ്ഞത്. ബാല്‍ക്കണിയിലുള്ള മറ്റൊരു വാതിലിലേക്ക് എത്താന്‍ മറ്റ് മാര്‍ഗവുമുണ്ടായിരുന്നില്ല.തുടക്കത്തില്‍ നിലവിളിച്ച കുഞ്ഞിന്റെ ശബ്ദം കേള്‍ക്കാതായതോടെ പരിഭ്രാന്തിയിലായ വീട്ടുകാര്‍ കാസര്‍കോട് അഗ്‌നിരക്ഷാസേനയില്‍ വിവരം അറിയിച്ചു.

ഉടനെത്തിയ സേനാസംഘം വാതില്‍ തുറക്കാന്‍ കഴിയില്ലെന്ന് മനസ്സിലായതോടെ ആറാം നിലയിലെ ഫ്‌ളാറ്റിലെത്തി. കുഞ്ഞിരിക്കുന്ന മുറിയുടെ നേരെ മുകളിലുള്ള മുറിയുടെ ബാല്‍ക്കണിയിലൂടെ ഫയര്‍മാനായ എം. ഉമ്മര്‍ കയറിട്ട് തൂങ്ങിയിറങ്ങി. ബാല്‍ക്കണിയില്‍നിന്ന് മുറിയിലേക്കുള്ള വാതില്‍ തുറന്നിരുന്നതിനാല്‍ ഉമ്മറിന് കുട്ടിക്കരികിലേക്ക് പെട്ടെന്ന് എത്താനായി. അപ്പോഴേക്കും കുഞ്ഞ് കരഞ്ഞുതളര്‍ന്ന് ഉറങ്ങിപ്പോയിരുന്നു.

കുട്ടിയുടെ പിതാവ് വിദേശത്താണ്. അഗ്‌നിരക്ഷാസേന സ്‌റ്റേഷന്‍ ഓഫീസര്‍ പി.വി. പ്രകാശ് കുമാര്‍, അസി. സ്‌റ്റേഷന്‍ ഓഫീസര്‍ കെ.ബി. ജോസ്, പ്രവീണ്‍ കുമാര്‍, വി. ഗോപാലകൃഷ്ണന്‍, ഡി.എല്‍. നിഷാന്ത്, കെ. ഗോപാലകൃഷ്ണന്‍ എന്നിവരാണ് സംഘത്തിലുണ്ടായത്.

ഒരിക്കലും കുട്ടികള്‍ക്ക് കൈയെത്തും ദൂരത്ത് താഴ് വെക്കരുത് . കുട്ടികളെ സംബന്ധിച്ച് ഇത് അപകടകരമാണ്. രക്ഷാപ്രവര്‍ത്തനത്തിന് കൂടുതല്‍ സമയം വേണ്ടിവന്നാല്‍ കുട്ടികളെ അത് ബാധിക്കും. വലിയവരും ഇതുപോലെ കുടുങ്ങാറുണ്ട്.