തെക്കുവടക്കു നടന്നപ്പോള് മന്ത്രിസ്ഥാനം നല്കാന് ആളില്ല, ചെന്നിത്തലയെ മന്ത്രിയാക്കാനായി ഇപ്പോള് ഡല്ഹിയില് മത്സരം, ലോക്സഭ ഇലക്ഷന് വരെ മന്ത്രിസഭയിലേക്ക് ഇല്ലെന്ന് ചെന്നിത്തല
സര്വ്വ ഗുണഗണങ്ങളും ഒത്തിണങ്ങിയ നേതാവാണ് രമേശ് ചെന്നിത്തല എന്നതിന് ആര്ക്കും ഒരു തര്ക്കവുമില്ല. അദ്ദേഹം മന്ത്രിസഭയില് വരണമെന്ന് തന്നെയാണ് എല്ലാ കോണ്ഗ്രസുകാരുടേയും ആഗ്രഹം. പക്ഷേ, ഗണപതി കല്യാണം പോലെ അതങ്ങ് നീണ്ടു പോയി. ഒരു നേതാവിനെ മന്ത്രിസഭയില് എടുക്കുന്നത് സംബന്ധിച്ച് ഇത്രയേറെ ചര്ച്ച കോണ്ഗ്രസിന്റെ ചരിത്രത്തില് തന്നെ ഉണ്ടായിട്ടുണ്ടോ എന്ന് സംശയം. ചെന്നിത്തല ഉടന് മന്ത്രിയാകുമെന്നു തോന്നിച്ചെങ്കിലും പല പല കാരണങ്ങള് കൊണ്ട് അതങ്ങ് നീണ്ടു പോയി.
സോളാര് വിവാദം സംസഥാനത്തെ മന്ത്രിസഭയെപ്പോലും ബാധിക്കുമെന്നായപ്പോള് ചെന്നിത്തലയെ മന്ത്രിയാക്കണമെന്ന വാദം വീണ്ടും വന്നു. ഇത്തവണ അതിന് മുന്കൈ എടുക്കുന്നത് ഹൈക്കമാന്ഡും മുഖ്യമന്ത്രിയുമാണ്. കേരളത്തിലെ നേതാക്കളെല്ലാം ഇപ്പോള് ചെന്നിത്തലയെ മന്ത്രിയാക്കാനുള്ള തത്രപ്പാടിലുമാണ്. ഏത് വകുപ്പ് വേണമോ നല്കും. ഒന്ന് വന്നാല് മതി. രമേശ് ചെന്നിത്തലയെ മന്ത്രിസഭയിലെത്തിച്ച് യു.ഡി.എഫിന്റെ പ്രതിഛായ വീണ്ടെടുക്കാനുള്ള ശ്രമങ്ങളാണ് ഹൈക്കമാന്ഡ് നടത്തുന്നത്.
കാര്യങ്ങളെല്ലാം ഒത്തു വന്നപ്പോള് ചെന്നിത്തലയ്ക്ക് ഒരു മനം മടുപ്പ്. ലോകസഭാ തെരഞ്ഞെടുപ്പുവരെ കെ.പി.സി.സി പ്രസിഡന്റ് സ്ഥാനത്ത് തുടരാനാണ് താല്പര്യമെന്നും മന്ത്രിസഭയിലേക്കില്ലെന്നും മുകുള് വാസ്നികുമായുള്ള കൂടിക്കാഴ്ച്ചക്കിടെ ചെന്നിത്തല തന്റെ അഭിപ്രായം വ്യക്തമാക്കി.
കാരണം ലോക്സഭ ഇലക്ഷനോടെ കോണ്ഗ്രസ് നിലം പൊത്തിയാല് അതിന്റെ പേരുദോഷം ചെന്നിത്തലയ്ക്കും കൂടിയുണ്ടാവും. അതിനാല് ഇലക്ഷന് കഴിയട്ടെ. ഒരുപക്ഷെ മുഖ്യമന്ത്രി പദമാണ് യോഗമെങ്കിലോ...
https://www.facebook.com/Malayalivartha