കേരളവും പ്രളയക്കെടുതിയിലേക്ക്, നെടുമ്പാശ്ശേരി വിമാനത്താവളം അടച്ചു, കൊച്ചി, മധുര-കൊച്ചി ദേശീയ പാതയിലെ ഗതാഗതം തടസപ്പെട്ടു
കനത്ത മഴയെത്തുടര്ന്ന് നെടുമ്പാശ്ശേരി വിമാനത്താവളത്തിന്റെ റണ്വേ അടച്ചു. വിമാനം തിരുവനന്തപുരത്തേക്കും, കോഴിക്കോട്ടേക്കും തിരിച്ചു വിട്ടു. റണ്വേയില് വെള്ളം കയറിയതിനാലാണ് റണ്വേ അടച്ചത്. മഴ വെള്ളം കെട്ടി നില്ക്കുന്ന റണ്വേയില് വിമാനം ലാന്ഡ് ചെയ്യുന്നതും ടേക്ക് ഓഫ് ചെയ്യുന്നതും അപകടകരമാണ്.
അതേസമയം വെള്ളം കയറിയതിനെ തുടര്ന്ന് കൊച്ചി-മധുര ദേശീയ പാതയിലെ ഗതാഗതം തടസ്സപ്പെട്ടു. നാലടിയോളം വെള്ളമാണ് ദേശീയ പാതയില് കയറിയിരിക്കുന്നത്.
ഇന്നലെ മുതലാണ് സംസ്ഥാനത്ത് മഴ വീണ്ടും ശക്തിപ്പെട്ടത്. സംസ്ഥാനത്തൊട്ടാകെ പെയ്യുന്ന മഴയെ തുടര്ന്ന് വിവിധ സ്ഥലങ്ങളില് ഉരുള്പ്പൊട്ടലും മണ്ണിടിച്ചിലുമുണ്ടായി. വിവിധ ഡാമുകള് തുറന്നു വിട്ടതോടെ മിക്ക നദികളിലും വെള്ളം നിറഞ്ഞിരിക്കുകയാണ്.
സംസ്ഥാനത്ത് രണ്ട് ദിവസം കൂടി കനത്ത മഴ തുടരും. കാലാവസ്ഥാ നിരീക്ഷണ കേന്ദ്രമാണ് ഇക്കാര്യം അറിയിച്ചത്. മഴയെത്തുടര്ന്ന് എറണാകുളത്തെ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചിരുന്നു.
https://www.facebook.com/Malayalivartha