ഇ ഡി നടപടിക്കെതിരെ പ്രതികരിച്ചു കൊണ്ട് രംഗത്ത് വരികയാണ് എം വി ഗോവിന്ദൻ .കരുവന്നൂര്‍ ബാങ്ക് തട്ടിപ്പ് കേസില്‍ സിപിഎമ്മിനെ പ്രതി ചേര്‍ത്ത ഇഡി നടപടിക്കെതിരെ സിപിഎം സംസ്ഥാന സെക്രട്ടറി എംവിഗോവിന്ദന്‍. കരുവന്നൂർ ബാങ്കിലുണ്ടായ തട്ടിപ്പ് ഫലപ്രദമായി കൈകാര്യം ചെയ്യണം എന്നതിൽ ഞങ്ങൾക്ക് തർക്കമില്ല. എന്നാലിവിടെ രാഷ്ട്രീയ പാർട്ടികളെ പ്രതി ചേർക്കുന്നത് രാഷ്ട്രീയ പ്രേരിതമായാണ്. ഇതിൽ സിപിഎമ്മിനെ പ്രതിചേർത്ത് പുകമറ സൃഷ്ടിക്കാനാണ് ഇഡിയുയെ ശ്രമം.

സിപിഎമ്മിന് കരുവന്നൂർ ബാങ്ക് തട്ടിപ്പിൽ പങ്കുണ്ടെന്ന് വരുത്തിത്തീർത്ത് രാഷ്ട്രീയ പ്രേരിതമാക്കുകയാണ് കാര്യങ്ങൾ. അതിൻ്റെ വിവരങ്ങളൊന്നും ഞങ്ങൾക്ക് ലഭിച്ചിട്ടില്ല. മാധ്യമങ്ങളിലൂടെ ലഭിച്ച അറിവുകൾ മാത്രമേയുള്ളൂ. കഴിഞ്ഞ തിരഞ്ഞെടുപ്പിനോടനുബന്ധിച്ച് ബാങ്കിൽ നിന്ന് പിൻവലിച്ച ഒരു കോടി രൂപ മരവിപ്പിക്കാനുള്ള നീക്കം നിലവിൽ നിയമപരമായി നേരിടുകയാണ്. ഇപ്പോൾ പുതിയ വാദവുമായാണ് അന്വേഷണ ഏജൻസികൾ രംഗത്തെത്തിയിരിക്കുന്നത്. സംസ്ഥാനത്തുടനീളം സിപിഎമ്മിൻ്റെ ബ്രാഞ്ചുകൾക്ക് ഓഫീസുകളുണ്ട്. ഇത് ഇന്നോ ഇന്നലെയോ തുടങ്ങിയതല്ല.

ഈ ഓഫീസ് വാങ്ങുന്നത് ജില്ലാ കമ്മിറ്റിയുടെ പേരിലാണ്. ലോക്കൽ കമ്മിറ്റിയുടെ കീഴിലുള്ള സ്വത്ത് ജില്ലാ കമ്മിറ്റിയുടെ പേരിലാണ് രജിസ്റ്റർ ചെയ്യുക. എല്ലാ രേഖകളും ഇത്തരത്തിൽ തന്നെയാണുള്ളത്. ഈ ഓഫീസ് പിടിച്ചെടുക്കാനാണ് ഇഡി ശ്രമിക്കുന്നത്. തികച്ചും തെറ്റായ പ്രവർത്തിയാണിത്.മറ്റൊരു വിഷയവും ഉന്നയിക്കാൻ ഇല്ലാത്ത ഘട്ടത്തിൽ ഇഡി ശ്രമിക്കുന്നത് പാർട്ടിയുടെ പേരിൽ പഴിചാരാനാണ്. എല്ലാ പ്രതിപക്ഷ പാർട്ടികളോടും ചെയ്യുന്ന നിലപാടിൻ്റെ മറ്റൊരു പതിപ്പാണ് ഇവിടെ ഇപ്പോൾ കണ്ടത്. ഇതിനെ നിയമപരമായും രാഷ്ട്രീയപരമായും നേരിടാനുള്ള ശ്രമത്തിലാണ് പാർട്ടി.

സിപിഎമ്മിനെതിരെ വരുന്നു എന്ന് പറയുമ്പോൾ എന്തടിസ്ഥാനത്തിലാണ് അത്തരത്തിൽ അവകാശപ്പെടുന്നത്. ഏതെങ്കിലും ഒരു ലോക്കൽ കമ്മിറ്റിയുടെ ഓഫീസ് രേഖയെടുത്ത് എങ്ങനെ പാർട്ടിയുടെ പേരിൽ കേസെടുക്കാനാണ്. പ്രതിക്ഷത്തെ ആക്രമിച്ച് ജനാധിപത്യത്തെ അട്ടിമറിക്കുകയുമാണ് ഇവരുടെ ശ്രമമെന്നും എംവി ഗോവിന്ദൻ മാധ്യമങ്ങളോട് വ്യക്തമാക്കി.