മുടവന്മുകളിലെ ഇരട്ടകൊലപാതകം... പ്രതിക്ക് ജീവപര്യന്തം തടവും അഞ്ച് ലക്ഷം രൂപ പിഴയും വിധിച്ച് കോടതി
![](https://www.malayalivartha.com/assets/coverphotos/w657/313741_1719671083.jpg)
പൂജപ്പുര മുടവന്മുകള് സ്വദേശികളായ സിഐടിയു തൊഴിലാളി സുനില്കുമാര്, മകന് എസ്.അഖില് എന്നിവരെ കുത്തി കൊലപ്പെടുത്തിയ കേസില് സുനില്കുമാറിന്റെ മരുമകന് മുട്ടത്തറ പുതുവല് പുത്തന് വീട്ടില് അരുണിനെ ജീവപര്യന്തം തടവും അഞ്ച് ലക്ഷം രൂപ പിഴയും ശിക്ഷിച്ചു. വീട്ടില് അതിക്രമിച്ചു കയറിയതിന് 5 വര്ഷം കഠിനതടവും 50,000 രൂപ പിഴയും വിധിച്ചിട്ടുണ്ട്.
തിരുവനന്തപുരം അഡിഷനല് സെഷന്സ് ജഡ്ജ് കെ.വിഷ്ണുവിന്റേതാണ് വിധി. പിഴത്തുക മുഴുവനും മരണപ്പെട്ട സുനില്കുമാറിന്റെ ഭാര്യയായ ഷീനയ്ക്ക് നല്കാന് കോടതി ഉത്തരവായി. പൂജപ്പുര സര്ക്കിള് ഇന്സ്പെക്ടറായിരുന്ന ആര്.റോജ്, എസ്.ഐ: എന്.ജി.ഷിബു എന്നിവരുടെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതിയെ അറസ്റ്റ് ചെയ്തു കുറ്റപത്രം സമര്പ്പിച്ചത്.
2021 ഒക്ടോബറിലാണ് കേസിനാസ്പദമായ സംഭവം നടന്നത്. അരുണ് ഭാര്യയായ അപര്ണയെ ക്രൂരമായി ഉപദ്രവിക്കുമായിരുന്നു. രണ്ടു വയസ്സായ മകളെയും കൂട്ടി അപര്ണ പൂജപ്പുരയിലെ സ്വന്തം വീട്ടിലേക്കു വന്നു.
തുടര്ന്ന്, അരുണ് ഫോണിലൂടെ കൊല്ലപ്പെട്ട സുനില്കുമാറിനെയും അഖിലിനെയും ഭീഷണിപ്പെടുത്തി. 2021 ഒക്ടോബര് 12ന് രാത്രി 8 മണിയോടെ അരുണ് അപര്ണയെ ഫോണില് വിളിച്ച് ചീത്ത പറഞ്ഞു. തുടര്ന്ന് ഫോണെടുത്ത അഖിലിനെ ഭീഷണിപ്പെടുത്തി.
എട്ടര മണിയോടെ പൂജപ്പുരയിലുള്ള ഭാര്യവീട്ടില് വന്ന് അരുണ് വഴക്കുണ്ടാക്കി. സുനില്കുമാറിനെയും അഖിലിനെയും കൈയില് കരുതിയിരുന്ന കത്തി ഉപയോഗിച്ച് കുത്തി പരുക്കേല്പ്പിച്ചു. തടസം നിന്ന സുനില്കുമാറിന്റെ ഭാര്യ ഷീനയെ കുത്താന് ഓടിച്ചു. കുത്തുകൊണ്ട സുനില്കുമാറിനെയും അഖിലിനെയും നാട്ടുകാരും പൊലീസും ചേര്ന്ന് തിരുവനന്തപുരം മെഡിക്കല് കോളജില് എത്തിച്ചെങ്കിലും ജീവന് രക്ഷിക്കാനായില്ല.
അപര്ണയും അമ്മ ഷീനയും അയല്വാസിയായ വിനോദും പ്രതിക്കെതിരെ മൊഴി നല്കി. കുത്താനുപയോഗിച്ച കത്തിയിലും പ്രതി ധരിച്ചിരുന്ന വസ്ത്രത്തിലും അഖിലിന്റെ രക്തത്തിന്റെ അവശിഷ്ടം ശാസ്ത്രീയ പരിശോധനയില് കണ്ടെത്തി. പ്രതി ഡോക്ടറോട് പറഞ്ഞ കുറ്റസമ്മത മൊഴിയും പ്രധാന തെളിവായി.
https://www.facebook.com/Malayalivartha