കേരളത്തിന്റെ ഉന്നത വിദ്യാഭ്യാസ മേഖലയെ ആഗോള നിലവാരത്തിലേക്കുയര്‍ത്തും: മുഖ്യമന്ത്രി; നാല് വര്‍ഷ ബിരുദ കോഴ്‌സുകള്‍ക്ക് തുടക്കമായി
കേരളത്തിന്റെ ഉന്നത വിദ്യാഭ്യാസ മേഖലയെ ആഗോള നിലവാരത്തിലേക്കുയര്‍ത്തുമെന്നും അതിനുള്ള സുപ്രധാന ചുവടുവയ്പ്പാണ് നാല് വര്‍ഷ ബിരുദ കോഴ്സുകളെന്നും മുഖ്യമന്ത്രി പിണറായി വിജയന്‍ പറഞ്ഞു. നാല് വര്‍ഷ ബിരുദ കോഴ്സുകളുടെ പ്രവേശനോത്സവ പരിപാടി വിജ്ഞാനോത്സവത്തിന്റെ സംസ്ഥാനതല ഉദ്ഘാടനം തിരുവനന്തപുരം വിമന്‍സ് കോളേജില്‍ നിര്‍വഹിക്കുകയായിരുന്നു മുഖ്യമന്ത്രി.
പൊതുവിദ്യാഭ്യാസത്തിന്റെ സ്വാഭാവിക തുടര്‍ച്ചയെന്ന നിലയിലാണ് ഉന്നതവിദ്യാഭ്യാസത്തിന് സംസ്ഥാന സര്‍ക്കാര്‍ പ്രഥമ പരിഗണന നല്‍കുന്നത്. വൈജ്ഞാനിക മേഖലയിലെയും തൊഴില്‍ മേഖലകളിലെയും മാറ്റത്തിനനുസരിച്ച് അക്കാദമിക രീതികളും മാറണം. ഒരു ദശാബ്ദം മുന്‍പുള്ള അവസ്ഥയുമായി താരതമ്യപ്പെടുത്തുമ്പോള്‍ ലോകത്താകെ ഉന്നത വിദ്യാഭ്യാസ സ്ഥാപനങ്ങളുടെ പ്രവര്‍ത്തനങ്ങള്‍ മാറിയതായി കാണാം. ജ്ഞാനോല്‍പ്പാദനം നടത്തുക എന്നതിനപ്പുറം നൈപുണിയും തൊഴിലും ലഭ്യമാക്കുന്ന കേന്ദ്രങ്ങളെന്ന നിലയില്‍ അവ മാറി. ഡാറ്റ സയന്‍സ്, മെഷീന്‍ ലേണിങ്ങ്, ആര്‍ട്ടിഫിഷ്യല്‍ ഇന്റലിജന്‍സ് തുടങ്ങിയ പുതിയ വൈജ്ഞാനിക ശാഖകള്‍ വളരുവാന്‍ ആരംഭിച്ചു. ഇതുക്കൊണ്ടാണ് നമ്മുടെ ഉന്നത വിദ്യാഭ്യാസ രംഗത്ത് കാലാനുസൃതമായ മാറ്റങ്ങള്‍ക്ക് ഉന്നത വിദ്യാഭ്യാസ പരിഷ്‌ക്കരണ കമ്മീഷനെ സംസ്ഥാന സര്‍ക്കാര്‍ നിയോഗിച്ചത്.
ഉള്ളടക്കത്തിലും ഘടനയിലും വലിയ മാറ്റങ്ങള്‍ക്ക് വിധേയമാക്കി ഉന്നതവിദ്യാഭ്യാസ രംഗത്ത് മാറ്റങ്ങള്‍ വരുത്താന്‍ സര്‍ക്കാര്‍ തീരുമാനിച്ചു. ഇതിന്റെ തുടര്‍ച്ചയെന്ന നിലയില്‍ കരിക്കുലം പരിഷ്‌ക്കരിക്കുകയും കാലാനുസൃത മാറ്റങ്ങള്‍ വരുത്തുകയും ചെയ്തു. ഒരു വര്‍ഷക്കാലം ഇന്‍ഡസ്ട്രിയല്‍ ട്രയിനിംഗടക്കം നല്‍കാന്‍ കഴിയുന്ന രീതിയിലാണ് നാല് വര്‍ഷ ബിരുദ കോഴ്സുകള്‍ നടപ്പിലാക്കുന്നത്. സാമ്പ്രദായിക പഠന രീതികളില്‍ നിന്നും പൂര്‍ണമായും മാറി ഗുണമേന്മ പഠനം എന്നതാണ് ലക്ഷ്യം. നവീന അധ്യാപന രീതികളോടൊപ്പം സാമൂഹികവും സമ്പത്തികവുമായ അര്‍ഹമായ പരിഗണന വിദ്യാര്‍ഥികള്‍ക്ക് ലഭിക്കും എന്നതും ഉറപ്പ് വരുത്തുന്നുണ്ട്. ഒറ്റ അച്ചില്‍ വാര്‍ത്തെടുത്തവര്‍ എന്നതിനപ്പുറം വിദ്യാര്‍ഥികളുടെ വ്യത്യസ്തമായ ശേഷികളെ പരിപോഷിപ്പിക്കാന്‍ കഴിയുന്ന ഒരു അക്കാദമിക സാഹചര്യമാണ് സൃഷ്ടിക്കപ്പെടുന്നത്.
തൊഴില്‍ രംഗത്തിനാവശ്യമായ നൈപുണ്യം ലഭിക്കുന്നതോടെ പഠനത്തോടൊപ്പം തൊഴിലും മുന്നോട്ട് കൊണ്ടു പോകാനുള്ള അവസരവും വിദ്യാര്‍ഥികള്‍ക്ക് ലഭിക്കും. സാമൂഹിക പ്രതിബദ്ധത, പ്രകൃതി സൗഹൃദ നിലപാടുകള്‍, ജനാധിപത്യബോധം എന്നിവ നിലനിര്‍ത്തുന്ന മൂല്യാധിഷ്ഠിത കരിക്കുലം0 കോഴ്സുകളില്‍ ഉള്‍പ്പെടുത്തിയിരിക്കുന്നു എന്നത് ശ്രദ്ധേയമാണ്. പരീക്ഷ മാത്രം മുന്നില്‍ക്കണ്ടുള്ള വിദ്യാഭ്യാസ രീതി തെറ്റാണെന്നും വിദ്യാഭ്യാസത്തെ തുടര്‍പ്രക്രിയായി കാണണമെന്നും മുഖ്യമന്ത്രി പറഞ്ഞു. ഇത് സമയബന്ധിതമായി വിലയിരുത്താന്‍ സര്‍വകലാശാലകളും കോളേജുകളും തയാറാകണം. താല്‍പര്യങ്ങള്‍ക്കും അഭിരുചികള്‍ക്കുമനുസരിച്ച് മറ്റ് വിദ്യാഭ്യാസ സ്ഥാപനങ്ങളില്‍ നിന്നടക്കം കോഴ്സുകള്‍ തെരഞ്ഞെടുക്കാന്‍ കഴിയുന്ന വിപുലമായ സാധ്യതയാണ് വിദ്യാര്‍ഥികള്‍ക്ക് ലഭിക്കുന്നത്.
ഏതു വിഷയമായാലും ഒരു കോഴ്സിലും പരാജയപ്പെടാതെ പഠിച്ചു കഴിവു തെളിയിക്കുന്ന വിദ്യാര്‍ഥികളുണ്ടാകും. അവര്‍ക്ക് തുടക്കം മുതല്‍ ബിരുദാനന്തര പഠനം പൂര്‍ത്തിയാക്കുന്നതുവരെ ഉന്നതവിദ്യാഭ്യാസ കൗണ്‍സില്‍ മുഖേന സ്‌കോളര്‍ഷിപ്പുകള്‍ നല്‍കിവരുന്നുണ്ട്. അതിനുപുറമെ പ്രതിഭ തെളിയിക്കുന്ന ഗവേഷകര്‍ക്കായി പല തലങ്ങളിലുള്ള സ്‌കോളര്‍ഷിപ്പുകളും അവാര്‍ഡുകളും ലഭ്യമാക്കുന്നുണ്ട്. സമാനമായ ഇത്തരം ധാനസഹായമോ പ്രോത്സാഹനങ്ങളോ അംഗീകാരങ്ങളോ രാജ്യത്ത് മറ്റേതെങ്കിലും സംസ്ഥാനങ്ങളിലോ വിദേശരാജ്യങ്ങളിലോ ഇല്ല എന്ന വസ്തുത നമ്മുടെ വിദ്യാര്‍ഥികളും അധ്യാപകരും അറിഞ്ഞിരിക്കണം.
മൂന്നു വര്‍ഷത്തിലൂടെ ബിരുദം നേടുന്നതിനോടൊപ്പം നാല് വര്‍ഷം പൂര്‍ത്തിയാക്കിയവര്‍ക്ക് ഹോണേഴ്സ് ഡിഗ്രിയിലൂടെ പി എച്ച് ഡി ചെയ്യാനുള്ള അവസരവും നിലവിലെ നാല് വര്‍ഷ ഡിഗ്രി കോഴ്സിലുണ്ട്. അക്കാദമിക പ്രവര്‍ത്തനങ്ങള്‍ ഏത് ദിശയിലാണ് പോകേണ്ടതെന്ന് വിദ്യാര്‍ഥികള്‍ക്ക് നിര്‍ദേശിക്കാന്‍ കഴിയുന്നുവെന്ന പ്രത്യേകതയുമുണ്ട്. ഇത്തരത്തില്‍ ആര്‍ജിക്കുന്ന ഗവേഷണ ഫലങ്ങള്‍ സമൂഹത്തിന് ഉപയോഗപ്പെടുത്താന്‍ കഴിയുന്ന രീതിയിലേക്ക് മാറ്റാന്‍ വിദ്യാര്‍ഥി, അധ്യാപക സമൂഹങ്ങള്‍ ശ്രദ്ധിക്കണം. ട്രാന്‍സ്ലേഷണല്‍ ഗവേഷക ലാബുകള്‍, സ്റ്റാര്‍ട്ടപ്പ് ഇന്‍കുബേഷന്‍ സെന്ററുകള്‍, ക്യാംപസ് ഇന്‍ഡസ്ട്രിയല്‍ പാര്‍ക്കുകള്‍ എന്നിവക്ക് സാധ്യമായ എല്ലാ പ്രോത്സാഹനവും സര്‍ക്കാര്‍ നല്‍കി വരികയാണ്. ദേശീയ അന്തര്‍ദേശീയ റാങ്കിങ്ങില്‍ മുന്നിലെത്തിയ നിരവധി ഉന്നത വിദ്യാഭ്യാസ സ്ഥാപനങ്ങളാണ് നമുക്കുള്ളത്. ഉന്നത വിദ്യാഭ്യാസ സ്ഥാപനങ്ങളുടെ ശേഷി വര്‍ധിപ്പിച്ച് 21-ാം നൂറ്റാണ്ടിലെ വെല്ലുവിളികളെ നേരിടാന്‍ വിദ്യാര്‍ഥികളെ പ്രാപ്തമാക്കണമെന്നും അതിനുള്ള മികച്ച അവസരങ്ങളിലൊന്നാണ് നാല് വര്‍ഷ ബിരുദ കോഴ്സുകളെന്നും മുഖ്യമന്ത്രി പറഞ്ഞു.
ഉന്നത വിദ്യാഭ്യാസ വകുപ്പ് മന്ത്രി ഡോ. ആര്‍ ബിന്ദു അധ്യക്ഷത വഹിച്ച ചടങ്ങില്‍ ആന്റണി രാജു എം എല്‍ എ, മേയര്‍ ആര്യ രാജേന്ദ്രന്‍, കേരള സര്‍വകലാശാല വൈസ് ചാന്‍സലര്‍ പ്രൊഫ. മോഹനന്‍ കുന്നുമ്മല്‍, ഉന്നത വിദ്യാഭ്യാസ കൗണ്‍സില്‍ മെമ്പര്‍ സെക്രട്ടറി രാജന്‍ വര്‍ഗീസ്, ഡയറക്ടറേറ്റ് ഓഫ് കോളേജിയേറ്റ് എഡ്യൂക്കേഷന്‍ സുധിര്‍ കെ എന്നിവര്‍ സംബന്ധിച്ചു. ഉന്നത വിദ്യാഭ്യാസ പ്രിന്‍സിപ്പല്‍ സെക്രട്ടറി, ഇഷിതാ റോയ് ചടങ്ങിന് സ്വാഗതവും കോളേജ് പ്രിന്‍സിപ്പല്‍ ഡോ. അനുരാധ വി.കെ. നന്ദിയും പറഞ്ഞു. എന്‍ പി ചന്ദ്രശേഖരന്‍ രചിച്ച് സംഗീത വിഭാഗം അധ്യാപിക ഡോ. കെ.ആര്‍. ശ്യാമ സംഗീതം നല്‍കിയ ശീര്‍ഷകഗാനത്തോടെയാണ് ചടങ്ങ് ആരംഭിച്ചത്. നവാഗത വിദ്യാര്‍ഥികള്‍ക്കായി ഓറിയന്റേഷന്‍ ക്ലാസും തുടര്‍ന്ന് കലാപരിപാടികളും പരിപാടിയോടനുബന്ധിച്ച് സംഘടിപ്പിച്ചു.
സംസ്ഥാനത്തെ മുഴുവന്‍ ക്യാമ്പുസകളിലും, സര്‍വകലാശാല കേന്ദ്രങ്ങളിലും വിപുലമായ പരിപാടികളോടെയാണ് നാലു വര്‍ഷ ബിരുദ പ്രോഗ്രാം ആരംഭിച്ചത്.
https://www.facebook.com/Malayalivartha
