ഒന്നാം പ്രതി ഭര്ത്താവ്... മാന്നാറില് 15 വര്ഷം മുന്പ് കാണാതായ കലയെ കൊലപ്പെടുത്തിയത് യുവതിക്ക് മറ്റൊരാളുമായി ബന്ധമുണ്ടെന്ന സംശയത്തെ തുടര്ന്നെന്ന് പൊലീസിന്റെ പ്രാഥമിക അന്വേഷണ റിപ്പോര്ട്ട്; കലയെ കൊലപ്പെടുത്തിയത് പെരുമ്പുഴ പാലത്തില് വച്ച്, ഒന്നാം പ്രതി ഭര്ത്താവ് അനില്; പ്രതികള്ക്കെതിരെ കൊലക്കുറ്റം
മനുഷ്യ മനസാക്ഷിയെ ഞെട്ടിക്കുന്ന സംഭവമാണ് മാന്നാറില് നടന്നത്. ഒരിക്കലും കണ്ടുപിടിക്കില്ലെന്ന് കരുതിയ കൊലപാതകം ഒരു പരാതിയുമില്ലാതെ 15 വര്ഷത്തിന് ശേഷം പുറത്തായി. മാന്നാറില് 15 വര്ഷം മുന്പ് കാണാതായ ശ്രീകല എന്ന കലയെ കൊലപ്പെടുത്തിയത് യുവതിക്ക് മറ്റൊരാളുമായി ബന്ധമുണ്ടെന്ന സംശയത്തെ തുടര്ന്നെന്ന് പൊലീസിന്റെ പ്രാഥമിക അന്വേഷണ റിപ്പോര്ട്ട്. കേസില് കലയുടെ ഭര്ത്താവ് അനിലാണ് ഒന്നാം പ്രതി.
പെരുമ്പുഴ പാലത്തില് വച്ച് അനിലും രണ്ടും മൂന്നും നാലും പ്രതികളും ചേര്ന്ന് കലയെ കൊലപ്പെടുത്തിയെന്നാണ് കേസ്. ശേഷം മാരുതി കാറില് മൃതദേഹം കൊണ്ടുപോയി മറവ് ചെയ്തു. പിന്നീട് തെളിവെല്ലാം പ്രതികള് നശിപ്പിച്ചു. 2009 ലാണ് സംഭവം നടന്നത്. ജിനു, സോമന്, പ്രമോദ് എന്നിവര് യഥാക്രമം 2,3,4 പ്രതികളായ കേസില് എല്ലാവര്ക്കുമെതിരെ കൊലക്കുറ്റം ചുമത്തി.
എന്നാല് പ്രതികള് എങ്ങനെയാണ് കലയെ കൊലപ്പെടുത്തിയതെന്നോ എവിടെയാണ് മറവ് ചെയ്തതെന്നോ എഫ്ഐആറില് പറയുന്നില്ല. പതിനഞ്ച് വര്ഷം മുന്പുള്ള തിരോധാന കേസിലാണ് ഇപ്പോള് സത്യം മറനീക്കി പുറത്തുവരുന്നത്. ശ്രീകലയുടെയും അനിലിന്റെയും പ്രണയ വിവാഹമായിരുന്നു. അന്ന് ദക്ഷിണാഫ്രിക്കയിലായിരുന്നു അനിലിന് ജോലി. ശ്രീകല അനിലിനെ പ്രണയിച്ച് വിവാഹം കഴിച്ചത് വീട്ടുകാര് എതിര്ത്തിരുന്നു. പിന്നീട് 2008-2009 കാലത്താണ് ശ്രീകലയെ കാണാതായത്. അന്ന് ശ്രീകലയുടെ കുടുംബം പരാതിയൊന്നും നല്കിയിരുന്നില്ല. അതുകൊണ്ട് തന്നെ തിരോധാനം അന്വേഷിക്കപ്പെട്ടില്ല.
വര്ഷങ്ങള്ക്കിപ്പുറം ഒരു ഊമക്കത്തിലൂടെ പൊലീസിന് ചില വിവരങ്ങള് കിട്ടിയതോടെയാണ് അന്വേഷണത്തില് വഴിത്തിരിവുണ്ടായത്. അനിലിന്റെ സുഹൃത്തുക്കളെയും ബന്ധുക്കളെയും കസ്റ്റഡിയിലെടുത്ത പൊലീസ് മൃതദേഹം കുഴിച്ചിട്ടെന്ന സംശയത്തില് മാന്നാറിലെ വീടിന്റെ സെപ്റ്റിക് ടാങ്ക് തുറന്ന് പരിശോധിച്ചു. മൃതദേഹത്തിന്റെ അവശിഷ്ടങ്ങളെന്ന് സംശയിക്കുന്ന തരത്തിലുള്ള ചില വസ്തുക്കള് സെപ്റ്റിക് ടാങ്കില് നിന്നും കിട്ടി. ശാസ്ത്രീയ പരിശോധനകള്ക്ക് ശേഷം മാത്രമേ കേസില് കൂടുതല് കാര്യങ്ങള് വ്യക്തമാവുകയുള്ളൂവെന്ന് പൊലീസ് അറിയിച്ചു.
സെപ്റ്റിക് ടാങ്കില് ഒരു യുവതിയുടെ മൃതദേഹമെന്ന വാര്ത്ത കാട്ടു തീപോലെയാണ് ഇരമത്തൂര് ഗ്രാമത്തില് പടര്ന്നത്. ആ വാര്ത്ത ഞെട്ടലോടെയാണ് നാട് കേട്ടത്. സംഭവം അറിഞ്ഞ് വന് ജനക്കൂട്ടമാണ് കണ്ണമ്പള്ളില് വീട്ടില് എത്തിയത്. ചെന്നിത്തല തൃപ്പെരുന്തുറ പഞ്ചായത്ത് രണ്ടാം വാര്ഡ് പരേതരായ ചെല്ലപ്പന് ചന്ദ്രിക ദമ്പതികളുടെ മകളായ ശ്രീകലയുടെ തിരോധാനത്തിലെ ദുരൂഹതയാണ് ഒടുവില് മറനീക്കിയത്.
15 വര്ഷം മുമ്പു നടന്ന സംഭവത്തിന്റെ ചുരുളഴിഞ്ഞത് പൊലീസിന് ലഭിച്ച ഒരു ഊമ കത്തിന്റെ അടിസ്ഥാനത്തില് നടത്തിയ അന്വേഷണത്തിലാണ്. ശ്രീകലയുടെ ഭര്ത്താവായ അനിലാണ് കൊലപാതകത്തിന് പിന്നിലെന്നാണ് പൊലീസ് കണ്ടത്തല്. നിലവില് ഇസ്രായിലിലാണ് അനിലുള്ളത്. കണ്ണമ്പള്ളില് അനിലും ശ്രീകലയും ഇഷ്ടത്തിലായിരുന്നു. എന്നാല് ഇവരുടെ ബന്ധത്തെ അനിലിന്റെ വീട്ടുകാരും ബന്ധുക്കളും എതിര്ത്തിരുന്നു. എതിര്പ്പുകളെ അതിജീവിച്ചാണ് 2007ല് ഇവര് വിവാഹിതരായത്. അനിലിന്റെ വീട്ടില് ശ്രീകലയെ താമസിപ്പിക്കാന് വീട്ടുകാര് തയ്യാറായില്ല. തുടര്ന്ന് ഇവര് പല വീടുകളിലായി വാടകയ്ക്ക് താമസം തുടങ്ങി.
പിന്നീട് വീട്ടുകാരുമായി സൗഹൃദത്തിലായി ഒരുമിച്ച് താമസമായി ഇവര്ക്ക് ഒരാണ്കുഞ്ഞും പിറന്നു. ഇതിനിടയില് കടബാധ്യത തീര്ക്കാന് അനില് വിദേശത്ത് പോയി. എന്നാല് ഇതിന് പിന്നാലെ ശ്രീകല മറ്റൊരു പുരുഷനുമായി ഇഷ്ടത്തിലാണെന്നുള്ള സംശയവും വീട്ടുകാരിലുണ്ടായി. വിദേശത്തു നിന്നുമെത്തിയ അനില് ഈ വിഷയത്തില് ശ്രീകലയുമായി വഴക്കിട്ടിരുന്നു എന്നും പറയപ്പെടുന്നുണ്ട്. തുടര്ന്നാണ് പെട്ടന്നൊരു ദിവസം കലയെ കാണാതായത്. കലയെ കാണാനില്ലെന്ന് അനിലിന്റെ അച്ഛന് തങ്കച്ചന് മാന്നാര് പൊലീസില് പരാതി നല്കിയിരുന്നു.
ശ്രീകലയെ കാണാതായപ്പോള്, അവര് മക്കളെയും തന്നെയും ഉപേക്ഷിച്ച് മറ്റൊരാള്ക്കൊപ്പം പോയെന്നാണ് ഭര്ത്താവ് അനില് പറഞ്ഞത്. നാട്ടുകാരോ ബന്ധുക്കളോ പൊലീസോ പോലും കാര്യമായ അന്വേഷണം നടത്തിയില്ല. നാളുകള്ക്ക് ശേഷം അനില് മറ്റൊരു വിവാഹം കഴിച്ചു. ഈ ബന്ധത്തില് രണ്ടു കുട്ടികളാണ് അനിലിനുള്ളത്. ശ്രീകലയുമായുള്ള വിവാഹത്തിലും ഒരു മകനുണ്ട്. അനിലിന്റെ വീട്ടുകാരോടൊപ്പമാണ് ഈ കുട്ടിയും താമസിക്കുന്നത്. മൂന്നു മാസത്തിനു മുമ്പാണ് അനില് ജോലിക്കായി ഇസ്രായേലിലേക്ക് പോകുന്നത്.
"
https://www.facebook.com/Malayalivartha